Ang “mga Panahon sa Pagpasig-uli” Haduol Na!
Sa dayon nang mokayab si Jesus sa langit, ang pipila sa iyang matinumanong mga tinun-an nangutana kaniya: “Ginoo, ipasig-uli mo ba ang gingharian sa Israel niining panahona?” Ang tubag ni Jesus nagpasabot nga molabay ang taas nga panahon una pa moabot ang Gingharian. Sulod nianang panahona, ang iyang mga sumusunod adunay usa ka dakong buluhaton nga pagabuhaton. Sila kinahanglang mahimong mga saksi ni Jesus “sa Jerusalem ug sa tibuok Judea ug Samaria ug ngadto sa kinalay-ang dapit sa yuta.”—Buhat 1:6-8.
KANA nga tinudlong-buluhaton dili mahimo sa pipila ka adlaw, mga semana, o mga bulan. Bisan pa niana, ang mga tinun-an misugod dihadiha sa pagwali. Apan wala sila mawad-ig interes sa ulohan labot sa pagpasig-uli. Sa usa ka dakong panon nga nagkatigom sa Jerusalem, si apostol Pedro mihisgot niini, nga miingon: ‘Paghinulsol kamo, ug talikod aron mapapas ang inyong mga sala, aron ang mga panahon sa pagpalagsik moabot gikan sa atubangan ni Jehova ug aron iyang ipadala ang Kristo nga gitudlo alang kaninyo, si Jesus, si kinsa, sa pagkatinuod, pagahuptan sa langit hangtod sa mga panahon sa pagpasig-uli sa tanang butang nga gisulti sa Diyos pinaagi sa baba sa iyang mga balaang manalagna sa karaang panahon.’—Buhat 3:19-21.
Kining “mga panahon sa pagpasig-uli” magpasulod sa “mga panahon sa pagpalagsik” gikan ni Jehova. Ang gitagnang pagpasig-uli moabot sa duha ka hugna. Una, adunay makapalagsik nga espirituwal nga pagpasig-uli, nga karon nagapadayon na. Ikaduha, kini sundan sa pagtukod sa usa ka pisikal nga paraiso sa yuta.
Nagsugod na ang Panahon sa Pagpasig-uli
Sumala sa gipunting ni apostol Pedro ngadto niadtong panon sa Jerusalem, ang langit ‘naghupot kang Jesus sulod niini.’ Kadto ang nahitabo hangtod sa 1914, sa dihang si Jesus nakabaton sa iyang harianong gahom ug nagsugod sa pagmando ingong tinudlong Hari sa Diyos. Niadtong panahona, mitagna si Pedro, si Jehova ‘magpadala’ sa iyang Anak sa diwa nga Iyang tugotan si Jesus sa pagtuman sa iyang papel ingon nga pangunang persona diha sa mga katuyoan sa Diyos. Ang Bibliya nagbatbat sa hitabo diha sa simbolikong pinulongan: ‘Ug [ang langitnong organisasyon sa Diyos] nanganak ug usa ka anak nga lalaki, usa ka lalaki, [Gingharian sa Diyos diha sa mga kamot ni Jesu-Kristo] nga maoy magabantay sa tanang kanasoran pinaagi sa olisi nga puthaw.’—Pinadayag 12:5.
Apan ang mga nasod walay katuyoan nga magpasakop sa pagmando ni Kristo. Sa pagkamatuod, sila nag-atake nga binaba sa iyang maunongong mga yutan-ong sakop, nga nailhan karong adlawa nga mga Saksi ni Jehova. Sama sa ilang mga mag-uuna nga mga apostoles, ang mga Saksi wala mag-ukon-ukon sa pagtuman sa ‘buluhaton sa pagpamatuod kang Jesus.’ (Pinadayag 12:17) Ang pagsupak sa buluhaton nga gihimo niining sinserong mga Kristohanon misilaob sa sunodsunod nga mga nasod. Sa 1918, ang may-katungdanang mga membro sa kawanihan sa Watch Tower Society sa Brooklyn, New York, gitaral ngadto sa korte pinasukad sa minaomao nga mga sumbong ug dili makataronganong gisilotan ug tag-as nga mga sentensiya sa bilanggoan. Sa makadiyot nga panahon mipatim-aw nga ang modernong-adlawng buluhaton sa pagsangyaw “ngadto sa kinalay-ang dapit sa yuta” mapakyas.—Pinadayag 11:7-10.
Bisan pa niana, sa 1919, ang nabilanggo nga mga membro sa kawanihan sa hedkuwarter gibuhian ug sa ulahi nahukmang dili sad-an sa tanang bakak nga mga sumbong. Wala sila mag-usik ug panahon sa pagpadayon sa buluhaton sa espirituwal nga pagpasig-uli. Sukad niadto, ang katawhan ni Jehova nagpahimulos ug walay-ingon nga espirituwal nga kauswagan.
Ang usa ka dakong kampanya gihimo aron sa pagtudlo sa katawhan sa tanang nasod sa pagtuman sa mga butang nga gisugo ni Kristo nga buhaton sa iyang mga sumusunod. (Mateo 28:20) Pagkamakapahimuot ang pagtan-aw nga ang pipila nga sa nangagi nagpasundayag ug samag-mananap nga mga kinaiya nagbag-o sa ilang panglantaw! Gihukas nila ang daang pagkatawo, nga nagpatungha sa mga kinaiya sama sa “kasuko,” “maabusohong sinultihan,” ug “law-ayng sulti,” ug nagsul-ob sa bag-ong pagkatawo, “nga pinaagi sa tukmang kahibalo ginahimong bag-o sumala sa larawan sa [Diyos] kinsa milalang niini.” Sa espirituwal nga diwa, ang mga pulong ni propeta Isaias nagakatuman bisan karon: “Ang lobo [usa ka tawo nga sa nangagi nagpasundayag sa samag-lobo nga mga kinaiya] mopuyo gayod sa makadiyot uban sa laki nga nating karnero [usa ka tawo nga nagapasundayag ug maaghop nga kinaiya], ug ang leopardo mohigda uban sa nating kanding, ug ang nating baka ug ang may-lambungay nga nating leyon ug ang pinakaon-pag-ayo nga hayop manag-uban ang tanan.”—Colosas 3:8-10; Isaias 11:6, 9.
Ang Dugang nga Pagpasig-uli Haduol Na!
Dugang pa sa pagpasig-uli nga misangpot sa usa ka espirituwal nga paraiso karong adlawa, ang panahon kusog nga nagsingabot sa dihang ang atong planeta mahimong usa ka pisikal nga paraiso. Ang usa ka gamayng bahin sa yuta maoy usa ka paraiso sa dihang gibutang ni Jehova ang atong mga katigulangan, si Adan ug Eva, sa tanaman sa Eden. (Genesis 1:29-31) Kanay hinungdang kita makahisgot bahin sa Paraiso nga ginapasig-uli. Ugaling, sa dili pa kana mahitabo, kinahanglang mawagtang sa yuta ang nagapakaulaw-sa-Diyos nga bakak nga relihiyon. Ang politikanhong mga elemento niining kalibotana maoy moatiman niini. (Pinadayag 17:15-18) Unya, ang politikanhon ug komersiyal nga mga elemento, uban ang ilang mga tigpaluyo, pagalaglagon. Sa kataposan, ang kataposang mga kaaway sa Diyos—si Satanas ug iyang mga demonyo—bilanggoon sulod sa usa ka libo ka tuig—ang gidugayon sa proyekto sa pagpasig-uli. Sa maong panahon, “ang kamingawan ug ang walay-tubig nga rehiyon magsadya, ug ang desyertong kapatagan magakalipay ug mamulak sama sa safron.” (Isaias 35:1) Ang tibuok yuta mahigawas sa kasamok. (Isaias 14:7) Bisan ang minilyon nga namatay igapasig-uli sa kinabuhi sa yuta. Matagamtam sa tanan ang makapasig-uling mga kaayohan sa halad-lukat. (Pinadayag 20:12-15; 22:1, 2) Wala na unyay buta, bungol, o bakol nga mga tawo sa yuta. “Walay molupyo ang moingon: ‘Ako masakiton.’” (Isaias 33:24) Dihadiha pagkatapos sa Usa ka Libo ka Tuig nga Pagmando ni Kristo, ang Yawa ug iyang mga demonyo pagabuhian sa makadiyot nga panahon ug makakita kon sa unsang paagi ang katuyoan sa Diyos alang sa yuta natuman nianang tungora. Sa kataposan, sila pagalaglagon hangtod sa kahangtoran.—Pinadayag 20:1-3.
Sa dihang ang yuta makadangat sa kataposan sa usa ka libo ka tuig nga pagpasig-uli, “ang tanang nagaginhawa nga butang” magadayeg kang Jehova, ug himoon nila kana hangtod sa kahangtoran. (Salmo 150:6) Maapil ka ba kanila? Mahimong maapil ka.