Atong Bililhong Panulondon—Unsay Kahulogan Niini Kanimo?
“Umari, kamong mga gipanalanginan sa akong Amahan, panunda ang gingharian nga giandam alang kaninyo sukad sa pagkatukod sa kalibotan.”—MATEO 25:34.
1. Unsang matang sa mga butang ang nadawat sa katawhan ingon nga panulondon?
ANG tanang tawo adunay mga butang nga ilang napanunod. Alang sa pipila ang panulondon naglakip tingali sa pagkinabuhi nga hamugaway sa materyal. Alang sa uban kini maoy kabos nga pagkinabuhi. Sa pipila ka kahimtang, ang nangaging mga kaliwatan, tungod sa ilang nasinati o nadungog, nagbilin ug panulondon sa hingaping pagdumot nga gipunting sa laing etnikong grupo. Hinuon, kitang tanan samang nakabaton sa usa ka butang. Kitang tanan nakadawat sa panulondon sa sala gikan sa unang tawo, si Adan. Ang maong panulondon sa kataposan mosangpot sa kamatayon.—Ecclesiastes 9:2, 10; Roma 5:12.
2, 3. Unsang panulondon ang gipaposible ni Jehova sa sinugdan alang sa mga anak ni Adan ug Eva, ug nganong wala sila makadawat niana?
2 Si Jehova, ingon nga mahigugmaong langitnong Amahan, sa sinugdan mitanyag sa katawhan ug usa ka lahi kaayong panulondon—kinabuhing dayon diha sa kahingpitan sa Paraiso. Ang atong unang mga ginikanan, si Adan ug Eva, gihatagan ug hingpit, walay-sala nga sinugdanan. Gihatag ni Jehova nga Diyos ang planetang Yuta sa katawhan isip usa ka gasa. (Salmo 115:16) Gitagana niya ang tanaman sa Eden ingon nga usa ka sampol kon sama sa unsa ang tibuok globo ug gibutang sa atubangan sa atong unang mga ginikanan ang kahibulongan, makapadaning tinudlong-buluhaton. Sila kinahanglang magpatunghag mga anak, mag-atiman sa yuta ug sa tanang nagkadaiyang mga tanom ug mga hayop, ug ipalapnag ang mga utlanan sa Paraiso sa tibuok yuta. (Genesis 1:28; 2:8, 9, 15) Ang ilang mga anak makaambit niini. Pagkatalagsaong panulondon nga ikapasa kanila!
3 Hinunoa, aron matagamtam nila kining tanan, si Adan ug Eva ug ilang mga anak kinahanglang adunay maayong relasyon uban sa Diyos. Obligado sila sa pagpakita kang Jehova sa gugma ug pagkamasinugtanon, apan si Adan ug Eva napakyas sa pagpabili sa gihatag sa Diyos kanila ug misupak sa iyang sugo. Nawad-an sila sa ilang Paraisong pinuy-anan ug sa mahigugmaong mga palaaboton nga gibutang sa Diyos sa ilang atubangan. Busa, dili sila makapasa niini ngadto sa ilang mga anak.—Genesis 2:16, 17; 3:1-24.
4. Sa unsang paagi makabaton kita sa panulondon nga giwala ni Adan?
4 Sa pagkamaluluy-on, si Jehova mihimog tagana aron ang mga anak ni Adan ug Eva makabaton sa higayon sa pagdawat sa panulondon nga giwala ni Adan. Sa unsang paagi? Sa tinudlong panahon sa Diyos, ang iyang kaugalingong Anak, si Jesu-Kristo, mihatag sa iyang hingpit nga tawhanong kinabuhi alang sa mga anak ni Adan. Pinaagi niini gipalit ni Kristo silang tanan. Bisan pa niana, ang panulondon dili nila awtomatikong maangkon. Gikinahanglan nila ang inuyonan nga pagbarog uban sa Diyos, nga ilang maangkon pinaagi sa pagpasundayag ug pagtuo diha sa motabon-sa-sala nga bili sa halad ni Jesus ug pinaagi sa pagpasundayag sa maong pagtuo pinaagi sa pagkamasinugtanon. (Juan 3:16, 36; 1 Timoteo 2:5, 6; Hebreohanon 2:9; 5:9) Ang imong paagi sa kinabuhi nagpakita bag pagpabili alang sa maong tagana?
Usa ka Panulondong Gipasa Pinaagi ni Abraham
5. Giunsa pagpakita ni Abraham ang pagpabili alang sa iyang relasyon uban kang Jehova?
5 Samtang gituman niya ang iyang katuyoan alang sa yuta, si Jehova nakiglabot kang Abraham sa linaing paagi. Gisugo niya ang maong matinumanong tawo nga mobiya sa iyang nasod ug mobalhin ngadto sa usa ka yuta nga ipakita sa Diyos mismo kaniya. Si Abraham kinabubut-ong misugot. Sa pag-abot ni Abraham didto, si Jehova miingon nga ang mga anak ni Abraham, dili si Abraham mismo, ang makadawat sa yuta ingon nga panulondon. (Genesis 12:1, 2, 7) Unsay sanong ni Abraham? Siya andam nga moalagad kang Jehova sa bisan diin ug sa bisan unsang paagi nga imando sa Diyos aron ang iyang mga anak makadawat sa ilang panulondon. Si Abraham nag-alagad kang Jehova diha sa yuta nga dili iya sulod sa 100 ka tuig, hangtod sa iyang pagkamatay. (Genesis 12:4; 25:8-10) Buhaton kaha nimo kana? Si Jehova miingon nga si Abraham maoy iyang “higala.”—Isaias 41:8.
6. (a) Unsay gipasundayag ni Abraham pinaagi sa iyang kaandam nga ihalad ang iyang anak? (b) Unsang bililhong panulondon ang ikapasa ni Abraham ngadto sa iyang mga anak?
6 Si Abraham naghulat ug daghang tuig alang sa usa ka anak lalaki, si Isaac, kinsa gimahal niya pag-ayo. Sa dihang ang batang lalaki lagmit midako na nga nahimong bayong, gisugo ni Jehova nga dad-on ni Abraham ang batan-ong lalaki ug itanyag siya ingon nga halad. Wala mahibalo si Abraham nga hapit na niyang ipasundayag kon unsay buhaton sa Diyos mismo sa paghatag sa iyang Anak ingon nga halad-lukat; bisan pa niana, siya misugot ug diha na sa punto nga ihalad si Isaac sa dihang ang manulonda ni Jehova mipugong kaniya. (Genesis 22:9-14) Si Jehova nakaingon na nga ang iyang mga saad kang Abraham mamatuman pinaagi ni Isaac. Busa, si Abraham tin-awng may pagtuo nga, kon kinahanglanon, ang Diyos makapabalik kang Isaac gikan sa mga patay, bisan pag ang maong butang wala pa gayod mahimo sa nangagi. (Genesis 17:15-18; Hebreohanon 11:17-19) Tungod kay si Abraham wala maghawid bisan sa iyang anak, si Jehova mipahayag: “Pinaagi sa imong binhi ang tanang nasod sa yuta tinong magapanalangin sa ilang kaugalingon.” (Genesis 22:15-18) Kini nagpaila nga ang Binhi nga gihisgotan sa Genesis 3:15, ang Mesiyanikong manluluwas, moabot pinaagi sa banay ni Abraham. Pagkabililhon nga panulondon nga igapasa!
7. Giunsa pagpakita ni Abraham, Isaac, ug Jacob ang pagpabili alang sa ilang panulondon?
7 Wala mahibalo si Abraham sa kahulogan sa gibuhat niadto ni Jehova; ni ang iyang anak si Isaac ni ang iyang apong lalaking si Jacob, kinsa nahimong “mga manununod uban kaniya sa mao ra mismo nga saad.” Apan silang tanan may pagsalig kang Jehova. Wala sila makig-anib sa bisan hain sa mga siyudad-gingharian sa yuta tungod kay sila nangita ug butang nga mas maayo—ang “siyudad nga may tinuod nga mga patukoranan, nga ang magtutukod ug maghihimo niini nga siyudad mao ang Diyos.” (Hebreohanon 11:8-10, 13-16) Bisan pa niana, dili tanang kaliwat ni Abraham nag-ila sa pagkabililhon sa panulondon nga gitagana pinaagi ni Abraham.
Pipila nga Mitamay sa Panulondon
8. Giunsa pagpakita ni Esau nga wala siya moila sa pagkabililhon sa iyang panulondon?
8 Si Esau, ang kinamagulangang anak lalaki ni Isaac, napakyas sa pagmahal sa iyang katungod sa pagkapanganay. Wala siya magpabili sa sagradong mga butang. Busa usa ka adlaw sa dihang gigutom si Esau, gibaligya niya ang iyang katungod ingon nga panganay ngadto sa iyang igsoon, si Jacob. Ilis sa unsa? Ilis sa usa ka pagkaon nga tinapay ug linat-ang lentihas! (Genesis 25:29-34; Hebreohanon 12:14-17) Ang nasod nga pinaagi niana mamatuman ang mga saad sa Diyos kang Abraham naggikan kang Jacob, kansang ngalan giilisan sa Diyos ngadto sa Israel. Unsang mga kahigayonan ang gibuksan sa maong linaing panulondon alang kanila?
9. Tungod sa ilang espirituwal nga panulondon, unsang pagluwas ang nasinati sa mga kaliwat ni Jacob, o Israel?
9 Panahon sa usa ka gutom, si Jacob ug iyang pamilya milalin ngadto sa Ehipto. Didto sila misanay ug nahimong daghan kaayo, apan sila nahimong mga ulipon usab. Bisan pa niana, wala hikalimti ni Jehova ang iyang pakigsaad kang Abraham. Sa tinudlong panahon sa Diyos, giluwas niya ang mga anak ni Israel gikan sa kaulipnan ug gipahibalo sila nga iyang dad-on sila ngadto sa “usa ka yuta nga nagaagay sa gatas ug dugos,” ang yuta nga iyang gisaad kang Abraham.—Exodo 3:7, 8; Genesis 15:18-21.
10. Sa Bukid sa Sinai, unsang dugang talagsaon nga mga panghitabo ang nahitabo maylabot sa panulondon sa mga anak ni Israel?
10 Sa dihang ang mga anak ni Israel nagpaingon na sa Yutang Saad, gitigom sila ni Jehova sa Bukid sa Sinai. Didto siya miingon kanila: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong akong linaing katigayonan gikan sa tanang ubang mga katawhan, tungod kay ang tibuok yuta akoa man. Ug kamo mahimong usa ka gingharian sa mga saserdote ug usa ka balaan nga nasod alang kanako.” (Exodo 19:5, 6) Human mouyon nga kinabubut-on ug nagkahiusa ang katawhan sa pagbuhat niini, gihatag ni Jehova ang iyang Balaod kanila—butang nga wala niya buhata sa ubang katawhan.—Salmo 147:19, 20.
11. Unsa ang pipila sa bililhong mga butang nga nalakip sa espirituwal nga panulondon sa mga anak ni Israel?
11 Pagkatalagsaong espirituwal nga panulondon ang nabatonan niadtong bag-ong nasod! Ang matuod lamang nga Diyos ang ilang gisimba. Iyang giluwas sila gikan sa Ehipto ug maoy mga saksing-nakakita sa makapahinganghang mga panghitabo sa dihang gihatag ang Balaod sa Bukid sa Sinai. Ang ilang panulondon dugang nga nahimong tilinguhaon samtang ilang nadawat ang dugang nga “sagradong kapahayagan sa Diyos” pinaagi sa mga manalagna. (Roma 3:1, 2) Gitudlo sila ni Jehova nga mahimong iyang mga saksi. (Isaias 43:10-12) Ang Mesiyanikong Binhi kinahanglang motungha diha sa ilang nasod. Ang Balaod nagpunting kaniya, nagpaila kaniya, ug angayng motabang kanila sa pagpabili nga sila nagkinahanglan kaniya. (Galacia 3:19, 24) Dugang pa, sila gihatagan ug higayon sa pag-alagad kauban nianang Mesiyanikong Binhi ingon nga usa ka gingharian sa mga saserdote ug usa ka balaang nasod.—Roma 9:4, 5.
12. Bisan pag misulod sila sa Yutang Saad, unsay wala masinati sa mga Israelinhon? Ngano?
12 Sa pagtuman sa iyang saad, si Jehova nagdala sa mga Israelinhon ngadto sa Yutang Saad. Apan sumala sa gisaysay sa ulahi ni apostol Pablo, tungod sa ilang kakulang sa pagtuo, ang maong yuta wala mahimong tinuod nga “usa ka dapit nga kapahulayan.” Ingon nga katawhan, wala sila makasulod sa “kapahulayan sa Diyos” tungod kay napakyas sila sa pagsabot ug pagbuhat nga nahiuyon sa katuyoan sa adlaw sa kapahulayan sa Diyos, nga nagsugod human sa paglalang ni Adan ug Eva.—Hebreohanon 4:3-10.
13. Tungod kay napakyas sa pagpabili sa ilang espirituwal nga panulondon, nawad-an sa unsa ang Israel ingon nga nasod?
13 Ang kinaiyanhong Israel mahimong makatagana sa bug-os nga gidaghanon niadtong makaambit uban sa Mesiyas diha sa iyang langitnong Gingharian ingon nga usa ka gingharian sa mga saserdote ug usa ka balaang nasod. Apan wala sila moila sa ilang bililhong panulondon. Usa lamang ka nahibilin sa kinaiyanhong mga Israelinhon ang mituo sa Mesiyas sa dihang miabot siya. Ingon nga resulta, diyutay lamang ang nalakip sa gitagnang gingharian sa mga saserdote. Ang Gingharian gikuha gikan sa kinaiyanhong Israel ug ‘gihatag sa nasod nga magpatunghag mga bunga niini.’ (Mateo 21:43) Unsa ba kanang nasora?
Usa ka Panulondon sa mga Langit
14, 15. (a) Human sa pagkamatay ni Jesus, sa unsang paagi ang mga nasod nagsugod sa pagpanalangin sa ilang kaugalingon pinaagi sa “binhi” ni Abraham? (b) Unsay nadawat sa mga membro sa “Israel sa Diyos” ingon nga panulondon?
14 Ang nasod nga gihatagan sa Gingharian mao “ang Israel sa Diyos,” ang espirituwal nga Israel, nga gilangkoban sa 144,000 ka gianak-sa-espiritu nga mga sumusunod ni Jesu-Kristo. (Galacia 6:16; Pinadayag 5:9, 10; 14:1-3) Ang pipila nianang 144,000 maoy kinaiyanhong mga Hudiyo, apan ang kinabag-an maoy gikan sa Hentil nga mga nasod. Sa maong paagi ang saad ni Jehova kang Abraham, nga pinaagi sa iyang “binhi” ang tanang nasod panalanginan, nagsugod sa pagkatuman. (Buhat 3:25, 26; Galacia 3:8, 9) Nianang unang katumanan, ang katawhan sa mga nasod gidihogan sa balaang espiritu ug gisagop ni Jehova nga Diyos ingong espirituwal nga mga anak, mga igsoon ni Jesu-Kristo. Busa, sila usab nahimong ikaduhang bahin sa maong “binhi.”—Galacia 3:28, 29.
15 Sa wala pa siya mamatay, gipaila ni Jesus sa umaabot nga Hudiyong mga membro nianang bag-ong nasod ang bag-ong pakigsaad, nga mahimong balido pinaagi sa iyang kaugalingong dugo. Pinasukad sa ilang pagtuo diha nianang makapabalido nga halad, kadtong ipasulod nianang pakigsaad himoon nga “hingpit hangtod sa hangtod.” (Hebreohanon 10:14-18) Sila “napahayag na nga matarong” ug ang ilang mga sala gipasaylo. (1 Corinto 6:11) Busa, sa maong diwa sila maoy sama ni Adan sa wala pa siya makasala. Bisan pa niana, sila dili magpuyo sa usa ka yutan-ong paraiso. Si Jesus miingon nga siya magaandam ug usa ka dapit alang kanila sa langit. (Juan 14:2, 3) Gibiyaan nila ang ilang yutan-ong mga palaaboton aron makabaton sa ‘panulondon nga gitagana alang kanila sa mga langit.’ (1 Pedro 1:4) Unsay ilang buhaton didto? Si Jesus misaysay: “Ako nagahimo ug kasabotan uban kaninyo . . . alang sa usa ka gingharian.”—Lucas 22:29.
16. Unsang kahibulongang tinudlong-buluhaton sa pag-alagad ang anaa sa unahan alang sa dinihogang mga Kristohanon?
16 Gikan sa mga langit, kadtong magamando uban ni Kristo, apil sa ubang mga butang, motabang sa pagwagtang gikan sa yuta sa tanang timaan sa pagrebelde batok sa pagkasoberano ni Jehova. (Pinadayag 2:26, 27) Ingon nga ikaduhang bahin sa espirituwal nga binhi ni Abraham, sila makaambit sa pagdala sa panalangin sa hingpit nga kinabuhi alang sa katawhan sa tanang nasod. (Roma 8:17-21) Pagkabililhong panulondon ang ilang nabatonan!—Efeso 1:16-18.
17. Unsang mga bahin sa ilang panulondon ang gipahimuslan sa dinihogang mga Kristohanon samtang ania pa sa yuta?
17 Apan ang panulondon sa dinihogang mga sumusunod ni Jesus dili tanan palaaboton pa. Sa usa ka paagi nga dili mahimo sa lain, gitabangan sila ni Jesus nga makaila kang Jehova, ang bugtong matuod nga Diyos. (Mateo 11:27; Juan 17:3, 26) Pinaagi sa pulong ug panig-ingnan, gitudloan niya sila kon unsay kahulogan sa ‘pagsalig kang Jehova’ ug kon unsay nalangkit sa pagkamasinugtanon kang Jehova. (Hebreohanon 2:13; 5:7-9) Gisalig kanila ni Jesus ang kahibalo bahin sa kamatuoran maylabot sa katuyoan sa Diyos ug gipasaligan sila nga ang balaang espiritu moagak kanila ngadto sa mas bug-os nga pagsabot niana. (Juan 14:24-26) Gisilsil niya sa ilang mga hunahuna ug mga kasingkasing ang kahinungdanon sa Gingharian sa Diyos. (Mateo 6:10, 33) Gisalig usab kanila ni Jesus ang tinudlong-buluhaton sa pagpamatuod ug paghimog mga tinun-an sa katawhan sa Jerusalem, Judea, Samaria, ug sa kinalay-ang mga bahin sa yuta.—Mateo 24:14; 28:19, 20; Buhat 1:8.
Usa ka Bililhong Panulondon Alang sa Dakong Panon
18. Sa unsang paagi ang saad ni Jehova nga ang tanang nasod magapanalangin sa ilang kaugalingon pinaagi sa “binhi” ni Abraham nagakatuman karong adlawa?
18 Lagmit, ang bug-os nga gidaghanon sa espirituwal nga Israel, kanang “gamayng panon” sa mga manununod sa Gingharian, napili na. (Lucas 12:32) Sulod sa mga dekada karon, gitumong ni Jehova ang pagtagad sa pagtigom sa usa ka dakong panon nga uban pa gikan sa tanang nasod. Busa, ang saad ni Jehova kang Abraham nga pinaagi sa iyang “binhi” ang tanang nasod magapanalangin sa ilang kaugalingon ginatuman sa dakong paagi. Ikalipay, kining gipanalanginang mga tawo samang nagahatag ug sagradong pag-alagad kang Jehova ug nag-ila nga ang ilang kaluwasan nagdepende sa pagtuo diha sa Kordero sa Diyos, si Jesu-Kristo. (Pinadayag 7:9, 10) Gidawat mo ba ang makapahimuot nga imbitasyon ni Jehova nga mahimong bahin nianang malipayong grupo?
19. Unsang panulondon ang gipanan-aw karon niadtong sakop sa mga nasod nga karon ginapanalanginan?
19 Unsang bililhong panulondon ang ginatanyag ni Jehova alang niadtong dili sakop sa gamay nga panon? Dili, kini dili usa ka panulondon didto sa mga langit. Kini mao ang panulondon nga gipasa unta ni Adan ngadto sa iyang mga anak—ang palaabotong kinabuhing dayon diha sa kahingpitan sa usa ka paraiso nga inanayng molukop sa yuta. Kini unya maoy usa ka kalibotan diin “wala na unyay kamatayon, ni pagbangutan ni pagtiyabaw ni may kasakit pa.” (Pinadayag 21:4) Nan, kanimo ginaingon ang dinasig nga Pulong sa Diyos: “Salig kang Jehova ug buhata ang maayo; magpuyo ka sa yuta, ug makiglabot ka uban ang pagkamatinumanon. Magbaton ka usab ug tumang kalipay diha kang Jehova, ug ihatag niya kanimo ang mga hangyo sa imong kasingkasing. Sa dili na madugay, ug ang daotan mawala na . . . Apan ang mga maaghop mismo magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:3, 4, 10, 11, 29.
20. Sa unsang paagi ang “ubang mga karnero” nagpahimulos sa kinadak-an sa espirituwal nga panulondon sa dinihogang mga Kristohanon?
20 Ang “ubang mga karnero” ni Jesus adunay usa ka panulondon diha sa yutan-ong dominyo sa langitnong Gingharian. (Juan 10:16a) Bisan pag dili sila didto sa mga langit, ang kinadak-an sa espirituwal nga panulondon nga gipahimuslan sa mga dinihogan igapasa kanila. Maoy pinaagi sa natigom nga pundok sa dinihogan, ‘ang matinumanon ug maalamong ulipon,’ nga nabuksan alang sa ubang mga karnero ang pagsabot sa bililhong mga saad nga anaa sa Pulong sa Diyos. (Mateo 24:45-47; 25:34) Sa tingob, ang dinihogan ug ubang mga karnero nakaila ug nagsimba sa bugtong matuod nga Diyos, si Jehova. (Juan 17:20, 21) Sa tingob, sila nagpasalamat sa Diyos alang sa motabon-sa-sala nga bili sa halad ni Jesus. Nag-alagad sila sa tingob ingong usa ka panon ilalom sa usa ka Magbalantay, si Jesu-Kristo. (Juan 10:16b) Silang tanan maoy bahin sa usa ka mahigugmaon, tibuok-yutang panag-igsoonay. Ginaambitan nila sa tingob ang pribilehiyo sa pagkahimong mga Saksi ni Jehova ug sa iyang Gingharian. Oo, kon ikaw usa ka dedikado ug bawtismadong alagad ni Jehova, kining tanan nalakip sa imong espirituwal nga panulondon.
21, 22. Sa unsang paagi kitang tanan makapakita nga atong gimahal ang atong espirituwal nga panulondon?
21 Unsa ka bililhon kining espirituwal nga panulondon kanimo? Igo ba ang imong pagmahal niini aron himoon ang pagbuhat sa kabubut-on sa Diyos nga labing hinungdanong butang sa imong kinabuhi? Ingon nga ebidensiya niana, ginasunod mo ba ang tambag sa iyang Pulong ug iyang organisasyon nga mahimong regular sa pagtambong sa tanang tigom sa Kristohanong kongregasyon? (Hebreohanon 10:24, 25) Ang mao bang panulondon bililhon kaayo kanimo nga mopadayon ka sa pag-alagad sa Diyos bisan pa sa kalisdanan? Ang pagpabili nimo niini may igo bang kalig-on nga maghatag kanimog kaisog sa pagsukol sa bisan unsang tentasyon sa pagsubay sa usa ka dalan nga basin mosangpot nga mawad-an ka niini?
22 Hinaot kitang tanan magmahal sa espirituwal nga panulondon nga gihatag sa Diyos kanato. Samtang kanunay natong itutok ang atong mga mata sa Paraiso nga anaa sa unahan, makig-ambit kita sa bug-os sa espirituwal nga mga pribilehiyo nga ginahatag kanato ni Jehova karon. Pinaagi sa paghimo sa atong relasyon uban kang Jehova nga sentro gayod sa atong kinabuhi, kita nagahatag ug makapatuo nga ebidensiya kon unsa gayod ka bililhon alang kanato ang atong hinatag-sa-Diyos nga panulondon. Hinaot kita malakip niadtong magapahayag: “Pagabayawon ko ikaw, Oh akong Diyos nga Hari, ug pagadayegon ko ang imong ngalan hangtod sa panahong walay tino, bisan hangtod sa kahangtoran.”—Salmo 145:1.
Unsaon Nimo Pagpatin-aw?
• Kon si Adan nagmaunongon pa sa Diyos, unsang panulondon ang iyang ikapasa unta kanato?
• Giunsa pagtagad sa mga kaliwat ni Abraham ang panulondon nga gitagana kanila?
• Unsay nalakip sa panulondon sa dinihogang mga sumusunod ni Kristo?
• Unsa ang panulondon sa dakong panon, ug sa unsang paagi ikapakita nila nga ilang gipabilhan gayod kini?
[Mga hulagway sa panid 20]
Ang mga kaliwat ni Abraham nakadawat sa saad bahin sa usa ka bililhong panulondon
[Mga hulagway sa panid 23]
Gipabilhan mo ba ang imong espirituwal nga panulondon?