Pagkatawo ni Jesus—Kon sa Unsang Paagi ug Kon Nganong Nahitabo Kadto
“IMPOSIBLE!” Mao kini ang isulti sa daghang dili-Kristohanong mga tawo inigkadungog nila sa asoy sa pagkatawo ni Jesus. Mobati sila nga dili siyentipikanhon ang pagtuo nga ang usa ka ulay magsabak ug manganak nga wala kahilabti ug lalaki. Unsay imong hunahuna?
Niadtong 1984, ang The Times sa London nagpatik ug usa ka sulat nga nangatarongan bahin niini, nga nag-ingon: “Dili makataronganong gamiton ang siyensiya ingon nga argumento batok sa mga milagro. Ang pagtuo nga ang mga milagro dili mahitabo maoy usa ka pagtuo lamang, sama ra usab sa pagtuo nga kini mahitabo.” Ang sulat gipirmahan sa 14 ka propesor sa siyensiya sa mga unibersidad sa Britanya. Sila miingon: “Kami hugot nga nagtuo sa pagkatawo diha sa ulay, sa mga milagro diha sa Ebanghelyo, ug sa pagkabanhaw ni Kristo ingong makasaysayanhong mga hitabo.”
Apan, masabot nga ang usa ka tawo malibog sa dihang siya makadungog sa unang higayon nga si Jesus gipanganak sa usa ka ulay. Ang mismong ulay nga inahan ni Jesus nalibog sa dihang siya gisultihan sa manulonda sa Diyos: “Tan-awa! ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus.” Sa pagtubag, si Maria nangutana: “Unsaon ba pagkahitabo niini, nga wala man ako makigdulog sa usa ka lalaki?” Dayon ang manulonda nagpatin-aw nga himoon sa Diyos ang maong milagro pinaagi sa Iyang balaang espiritu, nga midugang: “Sa Diyos walay gipahayag nga dili mahitabo.” (Lucas 1:31, 34-37) Sa pagkatinuod, ang Usa nga naglalang sa katingalahang proseso sa pagsanay sa tawo makapahinabo usab nga si Jesus ipanamkon ug ipanganak sa usa ka putli nga ulay. Kon nalalang sa Diyos ang uniberso ug ang tukma kaayong mga balaod niini, mahimo usab niyang gamiton ang usa ka binhi gikan sa tagoangkan ni Maria aron magpatunghag usa ka hingpit nga tawhanong Anak.
Kon Nganong Kadto Gikinahanglan
Ang diyosnong tawo nga si Jose minyoonon na kang Maria sa dihang si Maria nagsabak. Diha sa damgo, gipatin-aw sa manulonda sa Diyos kang Jose ang talagsaong rason kon nganong nagsabak ang iyang ulay nga pangasaw-onon. Ang manulonda miingon: “Ayaw kahadlok sa pagdala kang Maria nga imong asawa sa imong balay, tungod kay ang iyang gisamkon maoy pinaagi sa balaang espiritu. Siya manganak ug usa ka anak nga lalaki, ug imong pagatawgon ang iyang ngalan nga Jesus, kay siya magluwas sa iyang katawhan gikan sa ilang mga sala.” (Mateo 1:20, 21) Ang ngalang Jesus sa Hebreo nagkahulogang “Si Jehova ang Kaluwasan.” Nagpahinumdom kini nga kita nagkinahanglag kaluwasan gikan sa sala ug kamatayon ug sa kahikayan ni Jehova nga Diyos sa maong kaluwasan pinaagi ni Jesus.
Tungod kay nakasala ang unang tawo nga si Adan, ang tanan niyang kaliwat nangatawo nga dili-hingpit, nga may kiling sa paglapas sa mga balaod sa Diyos. (Roma 5:12) Sa unsang paagi ang mga kaliwat ni Adan maluwas gikan sa sala ug makaangkon sa kahingpitan? Ang laing hingpit tawhanong kinabuhi, nga katumbas sa bili sa kinabuhi ni Adan, kinahanglang ibayad aron mabalanse ang mga timbangan sa hustisya. Kana ang hinungdan nga milagrosong gipahimugso sa Diyos ang hingpit nga tawong si Jesus, ug kana ang hinungdan nga gitugotan ni Jesus ang iyang mga kaaway sa pagpatay kaniya. (Juan 10:17, 18; 1 Timoteo 2:5, 6) Human sa pagkabanhaw ug pagkayab ni Jesus ngadto sa langitnong kinabuhi, siya masaligong miingon: “Ako namatay, apan, tan-awa! buhi ako hangtod sa kahangtoran, ug ania kanako ang mga yawi sa kamatayon ug sa Hades [komon nga lubnganan sa tawo].”—Pinadayag 1:18.
Ginamit ang masambingayong mga yawi sa kamatayon ug Hades, gibuksan ni Jesus ang dalan alang sa makasasalang mga tawo aron mabatonan pag-usab ang nawala ni Adan. Si Jesus misaysay: “Ako ang pagkabanhaw ug ang kinabuhi. Siya nga magpasundayag ug pagtuo kanako, bisan siya mamatay, siya mabuhi; ug ang matag usa nga buhi ug magpasundayag ug pagtuo kanako dili na gayod mamatay.” (Juan 11:25, 26) Pagkakahibulongang saad! Apan, adunay mas dakong rason sa pagkatawo ni Jesus.
Ang Labing Hinungdanong Rason
Ang kinabuhi ni Jesus wala magsugod sa dihang siya gisamkon ni Maria. “Ako nanaog gikan sa langit,” siya klarong miingon. (Juan 6:38) Si Jesus nagkinabuhi sa espiritung mga dapit uban sa iyang langitnong Amahan sukad pa sa pagsugod sa paglalang. Ngani, ang Bibliya naghubit kaniya ingong “ang sinugdanan sa kalalangan sa Diyos.” (Pinadayag 3:14) Gikan sa langit, nakasaksi si Jesus sa pagrebelde sa usa ka daotang manulonda nga maoy nag-aghat sa unang mga tawo batok sa pagmando sa Diyos. Naghatag kadto kang Jesus sa labing hinungdanong katarongan nga siya buot gayong matawo ingong hingpit tawhanong Anak sa Diyos. Unsa kadtong katarongana?
Gusto niyang pamatud-an nga ang iyang langitnong Amahan adunay katungod sa pagmando sa uniberso. Pinaagi sa pagpabiling matinumanon gikan sa iyang pagkatawo hangtod sa iyang kamatayon dinhi sa yuta, gipakita ni Jesus nga siya andam nga magpasakop sa paagi ni Jehova sa pagmando sa Iyang mga linalang. Sa wala pa siya patya sa mga kaaway sa Diyos, gipatin-aw ni Jesus ang katarongan sa iyang pagkaandam nga mohalad sa iyang kinabuhi. Siya miingon niana aron mahibalo ang kalibotan nga gihigugma niya ang Amahan. (Juan 14:31) Kon ang unang duha ka tawo, si Adan ug Eva, nakaugmad pa sa maong gugma, makapamatuod unta silang matinumanon ilalom sa mas sayon nga pagsulay.—Genesis 2:15-17.
Ang pagkamatinumanon ni Jesus nagyagyag usab sa daotang manulonda, si Satanas, ingon nga usa ka bakakon. Gipasipalahan ni Satanas ang Diyos ug ang tawo pinaagi sa pag-ingon atubangan sa mga manulonda sa langit: “Ang tanang gipanag-iya sa tawo iyang ihatag aron siya mabuhi.” (Job 2:1, 4, Tanakh—The Holy Scriptures) Si Satanas sayop nga nag-akusar nga ang tanang tawo dili mosunod sa Diyos kon mameligro ang ilang kinabuhi.
Kining mga isyuha naghagit sa pagkamatarong sa pagmando sa Diyos. Aron kini mahusay, andam si Jesus nga mahimugso ingong tawo ug magpamatuod nga siya matinumanon hangtod sa kamatayon.
Busa, sumala sa iyang gisulti, ang pangunang katarongan sa pagkatawo ni Jesus sa yuta maoy aron nga siya “magpamatuod sa kamatuoran.” (Juan 18:37) Gibuhat niya kana pinaagi sa pagpakita diha sa pulong ug buhat nga ang pagmando sa Diyos bug-os nga matarong ug ang pagpasakop diha niana mosangpot sa dumalayong kalipay. Gisaysay usab ni Jesus nga siya mianhi sa kalibotan aron ihatag ang iyang tawhanong kinabuhi ingon nga “usa ka lukat baylo sa daghan,” nga nagbukas sa dalan aron ang makasasalang mga tawo makaangkon sa kahingpitan ug walay kataposang kinabuhi. (Marcos 10:45) Aron masabtan sa mga tawo kining hinungdanong mga butang, gikinahanglan ang rekord bahin sa pagkatawo ni Jesus. Dugang pa, ang mga hitabo bahin sa pagkatawo ni Jesus adunay laing hinungdanong mga leksiyon, sama sa ipakita sa sunod nga artikulo.
[Mga hulagway sa panid 4]
Sa unsang paagi ang mga kaliwat ni Adan maluwas gikan sa sala?