Mga Magmamantala sa Gingharian Nagtaho

Usa ka Programa sa Telebisyon Mitultol Kaniya sa Paghimaya sa Diyos

SI APOSTOL PABLO nag-ingon nga “ang pipila nagwali kang Kristo tungod sa kasina ug sa pag-indigay, apan ang uban usab tungod sa maayong kabubut-on.” (Filipos 1:15) Usahay, bisan kadtong naningkamot sa pagdaot sa dungog sa katawhan ni Jehova nakadani sa matinud-anog-kasingkasing nga mga tawo ngadto sa kamatuoran nga wala tuyoa.

Sa Nobyembre 1998, usa ka dokumentaryo nga nagpakita ug mga hulagway sa Bethel, ang mga pasilidad sa sangang buhatan sa mga Saksi ni Jehova sa Louviers, Pransiya, gipasalida sa nasodnong telebisyon sa Pransiya. Bisan pa sa nagkalainlaing mga komento bahin niini, ang maong programa wala damhang nagpatunghag positibong mga resulta.

Lakip niadtong nakakita sa maong programa mao si Anna-Paula, kinsa nagpuyo mga 60 kilometros lang gikan sa Bethel. Si Anna-Paula, nga usa ka diborsiyadang inahan nga may duha ka anak, nangitag trabaho. Busa sa pagkasunod buntag, iyang gitawgan ang Bethel aron sa pagpangitag trabaho didto. “Ang programa sa telebisyon naghatag kanakog ideya nga ang Bethel maoy usa ka maanindot nga lugar ug mapuslanon ang buluhaton nga ginahimo didto,” matod pa niya. Pagkadako sa iyang katingala sa pagkasayod nga ang tanang nag-alagad sa Bethel maoy mga ministro nga nagboluntaryo sa ilang panahon! Human sa mubong panaghisgot mahitungod sa mga kalihokan sa mga Saksi ni Jehova, siya miuyon nga duawon siyag usa ka Saksi.

Sa dihang miduaw si Léna, nga usa ka bug-os-panahong ministro sa kongregasyon nianang dapita, dugay kaayo silang nag-estoryahanay, ug gidawat ni Anna-Paula ang librong Kahibalo nga Motultol sa Kinabuhing Walay Kataposan.a Pagkasunod nga duaw, nahuman nag basa ni Anna-Paula ang enterong libro ug duna siyay daghang pangutana. Gidawat dayon niya ang pagtuon sa Bibliya. Si Anna-Paula nag-ingon: “Alang nako, mao kadto ang higayon nga madiskobrehan ang Pulong sa Diyos. Wala pa ako makahupot ug Bibliya sukad.”

Sa Enero 1999, si Anna-Paula mibisita sa Bethel, ug pagkasunod semana mitambong siya sa una niyang Kristohanong tigom. Wala madugay human niana, gisugdan niya ang pagtuon sa Bibliya uban sa iyang mga anak ug sa pagsangyaw ngadto sa iyang mga higala. “Dili nako mapugngan ang akong kaugalingon sa pag-estorya sa uban bahin sa akong natun-an,” matod pa niya. “Gusto nakong ipaambit ang mga kamatuoran sa Bibliya ngadto sa mga tawo ug hupayon sila.” Human makigbisog sa pagbuntog sa ubay-ubayng personal nga mga problema, si Anna-Paula misugod sa pagtambong sa mga tigom nga regular. Kusog siyang miuswag ug nabawtismohan siya niadtong Mayo 5, 2002.

Gawas pa niana, tungod sa maayong panig-ingnan ug kasibot sa pagsangyaw ni Anna-Paula, ang iyang inahan misugod sa pagtuon sa Bibliya ug nabawtismohan sa wala madugay. “Dili mahubit sa mga pulong ang kalipay nga akong gibati,” matod pa ni Anna-Paula. “Nagpasalamat ko kang Jehova matag adlaw tungod sa pagtugot kanako nga mailhan siya ug makaalagad kaniya ug tungod sa tanang panalangin nga iyang gihatag kanako.”

[Footnote]

[Mga hulagway sa panid 8]

Ibabaw: Si Anna-Paula

Ubos: Entrada sa sangang buhatan sa Pransiya