Usa ka Tawo nga Nagmahal sa Kinabuhi ug sa mga Tawo
SI Daniel Sydlik, usa ka dugay nang membro sa Nagamandong Lawas sa mga Saksi ni Jehova, nakatapos sa iyang yutan-ong kinabuhi sa Martes, Abril 18, 2006. Siya nagpanuigon ug 87 anyos ug nag-alagad ingong membro sa pamilyang Bethel sa Brooklyn, New York, sulod sa mga 60 ka tuig.
Si Brader Dan, nga mao ang mabinationg pagtawag niadtong mga suod niya, miabot sa Bethel niadtong 1946. Una pa niana, siya nag-alagad ingong espesyal payunir sa California ug nakagugol usab ug pipila ka panahon sa bilanggoan panahon sa Gubat sa Kalibotan II tungod sa iyang neyutralidad isip Kristohanon. Ang iyang mga kasinatian nianang panahona detalyadong gihubit diha sa iyang sugilanon sa kinabuhi, nga napatik sa Ang Bantayanang Torre sa Hunyo 1, 1985, nga nag-ulohang “Pagkabililhon sa Imong Pakighigala, Oh Diyos!”
Si Brader Sydlik nailhan nga mapainubsanon, daling maduol nga tawo. Sa dihang siya magdumala sa pagsimba sa buntag sa pamilyang Bethel, ang iyang positibong tinamdan ug pagmahal sa kinabuhi kanunayng gibanaag sa iyang pasiunang mga pulong: “Pagkanindot nga mabuhi aron makaalagad sa matuod ug buhi nga Diyos.” Ingong usa ka mamumulong sa publiko, iyang gidasig ang maong panghunahuna ngadto sa uban, nga naghatag ug mga pakigpulong nga may mga tema nga sama sa “Malipayon ang Katawhan Kansang Diyos Mao si Jehova,” “Pagbanaag sa Kalipay ni Jehova,” “Pasigaha Kanunay ang Kalayo sa Espiritu sa Diyos,” ug “Ang Labing Maayo Anaa Pa sa Unahan.”
Sa 1970, si Brader Sydlik naminyo kang Marina Hodson, nga taga-Inglaterra, kinsa gihubit niya ingong “usa ka gasa gikan sa Diyos.” Ingong magtiayon sila nakaalagad kang Jehova sulod sa kapin sa 35 ka tuig.
Sa mga tuig sa iyang pag-alagad sa Bethel, si Brader Sydlik nakaalagad sa lainlaing mga departamento, nga naglakip sa imprentahan ug sa Writing Department. Siya usab nakatrabaho sa estasyon sa radyo nga WBBR. Dayon, pagka-Nobyembre 1974, siya gitudlo ngadto sa Nagamandong Lawas ug sa ngadtongadto nagtrabaho diha sa Personnel ug Writing nga mga komite.
Sulod sa kapin sa 30 ka tuig nga pagtrabaho ni Brader Sydlik sa Personnel Committee, siya nagpasundayag ug mainitong gugma alang sa mga tawo. Iyang dasigon ang daghan pinaagi sa iyang tibuok nga tingog, nga kanunayng magpasiugda sa atong bililhong pribilehiyo sa pag-alagad kang Jehova. Iya kanunayng ipasiugda nga ang tinuod nga kalipay nagdepende, dili sa panggawas nga mga butang, kondili sa atong relasyon uban kang Jehova ug sa atong tinamdan sa kinabuhi.
Bisan tuod mingawon gayod ang pamilyang Bethel kang Brader Sydlik, ang iyang panig-ingnan ingong usa ka tawo nga tinuod nga nagmahal sa kinabuhi ug sa mga tawo magpabiling usa ka maayong impluwensiya. Kami masaligon nga siya nalakip niadtong gihisgotan sa Pinadayag 14:13: “Malipayon ang mga patay nga mamatay nga nahiusa sa Ginoo sukad niining panahona padayon. Oo, nag-ingon ang espiritu, papahulaya sila gikan sa ilang mga paghago, kay ang mga butang nga ilang gibuhat mahiuban dayon kanila.”