“Maayo Kaayong Magtatan-aw ug Minahal nga Higala”
NATAPOS ang yutan-ong kinabuhi ni John (Jack) Barr, nga usa ka membro sa Nagamandong Lawas sa mga Saksi ni Jehova niadtong Disyembre 4, 2010, sa Sabado sa buntag. Siya nagpanuigon ug 97 anyos. Siya gitawag nga “maayo kaayong magtatan-aw ug minahal nga higala.”
Si Brader Jack Barr natawo sa Aberdeen, Scotland, ug siya ang kinamanghoran sa tulo ka anak. Ang iyang mga ginikanan maoy dinihogan. Si Brader Barr sagad maghisgot nga mabination bahin sa ilang kinabuhi ingong pamilya samtang bata pa siya; mapasalamaton kaayo siya sa talagsaong panig-ingnan nga gipakita sa iyang minahal nga mga ginikanan.
Sa tin-edyer na siya, si Jack nalisdan pag-ayo nga makig-estorya sa mga dili kaila. Apan naningkamot siya nga mabuntog kana, ug usa ka hapon niana sa Dominggo niadtong 1927, sa edad nga 14, gisultihan niya ang iyang papa nga andam na siyang mouban sa pagsangyaw sa balaybalay. Kadto mao ang sinugdanan. Sukad niadto hangtod sa iyang kamatayon, si Brader Barr nagpabiling masiboton sa pagsangyaw sa maayong balita.
Sa dihang hapit mamatay ang iyang inahan tungod sa usa ka grabeng aksidente, nakahunahuna si Jack bahin sa katuyoan sa kinabuhi, ug niadtong 1929 gipahinungod niya ang iyang kaugalingon kang Jehova ug nagpabawtismo niadtong 1934. Dayon pagka-1939, siya namembro sa pamilyang Bethel sa London, England. Kadto maoy sinugdanan sa iyang 71 ka tuig nga bug-os-panahong pag-alagad.
Niadtong Oktubre 29, 1960, si Brader Barr misulod sa gitawag niyag “usa ka bililhon kaayong relasyon” sa dihang iyang gipakaslan si Mildred Willett, usa ka dugay nang payunir ug misyonaryo. Si Brader ug Sister Barr maoy sulondan, matinumanong magtiayon hangtod nga natapos ni Mildred ang iyang yutan-ong kinabuhi niadtong Oktubre 2004. Si Brader ug Sister Barr dungang nagbasa sa Bibliya kada adlaw.
Sa mga nakaila kang Jack Barr, ang iyang ngalan magpahinumdom kanila sa usa ka tawo nga tighatag ug maayong tambag—kanunayng balanse, lumo, ug gipasukad sa Kasulatan. Siya kugihan, mahunahunaon ug mahigugmaong magtatan-aw, ingon man usa ka maunongong higala. Ang iyang mga komento, pakigpulong, ug pag-ampo nagpadayag sa kalalom sa iyang espirituwalidad ug pagkasuod kang Jehova.
Bisag mingawon ta sa atong minahal nga si Brader Barr, kita nalipay uban kaniya sa iyang pagdawat sa ganti nga imortalidad—ang pribilehiyo nga iyang gikahinaman ug kanunayng hisgotan. Kadto gayod ang iyang gitinguha.—1 Cor. 15:53, 54.a
[Footnote]
a Alang sa asoy sa kinabuhi ni John E. Barr, tan-awa ang Bantayanang Torre sa Hulyo 1, 1987, panid 26-31.