Mga Graduwado sa Gilead Nakakaplag ug “Labawng Kalipay sa Paghatag”

SA Dominggo, Marso 6, 1994, ang pamilyang Bethel sa tibuok-kalibotang hedkwarter sa mga Saksi ni Jehova ug mga bisita nagtigom alang sa usa ka malipayong okasyon​—ang graduwasyon sa ika-96 nga klase sa Watchtower Bible School of Gilead. Sa iyang pasiunang mga komento, ang tsirman sa programa nga si Karl F. Klein, nga nag-alagad nga membro sa Nagamandong Lawas sa mga Saksi ni Jehova sa halos duha ka dekada, nag-ingon sa 46 ka estudyante: “Si Jesus nag-ingon nga adunay labaw nga kalipay sa paghatag kay sa pagdawat. Ingon usab niana sa inyong misyonaryong asayment​—sa paghatag ug labaw, labaw kamong magmalipayon.”​—Buhat 20:35.

Panamilit nga Tambag

Usa ka serye sa pakigpulong alang sa mga estudyante ang misunod. Si Leon Weaver, usa ka membro sa Service Department Committee, nagpalapad sa temang “Ang Paglahutay Nagahimaya Kang Jehova.” Kitang tanan nagaatubang ug mga pagsulay. (2 Corinto 6:3-5) “Sa dihang kita ubos sa pagpit-os,” pahayag ni Brader Weaver, “sayon kaayong magsalig sa atong kaugalingon.” Hinunoa, iyang gipahinumdoman ang mga estudyante: “Bisan unsa pa ka kasagaran ang mga pagsulay nga imong atubangon, si Jehova apektado niana. Dili gayod niya itugot nga tintalon kamo labaw sa kon unsay inyong maagwanta.”​—1 Corinto 10:13.

“Pakamahala Kanunay ang Inyong Asaynment” mao ang ulohan sa misunod nga pakigpulong, nga gihatag ni Lyman Swingle sa Nagamandong Lawas. Ang mga Israelinhon dili kanunay magbuot kon asa sila mopuyo ug kon unsay ilang buhaton. Ang matag tribo gibahinan sa yuta, ug ang mga Levihanon gihatagag espisipikong mga buluhaton. Sa susama, daghan sa bug-os panahong pag-alagad karon​—sama sa mga misyonaryo ug mga membro sa pamilyang Bethel​—wala magdesisyon sa ilang kaugalingon kon diin sila mopuyo ug kon unsang buluhaton ang ilang pagahimoon. Unsa na man kon ang usa mobatig kawalay-piho bahin sa iyang asaynment? “Kon ikaw motutok sa Pangulong Ahente sa atong pagtuo, si Jesus, ug tagdon pag-ayo ang iyang panig-ingnan, dili ka maluya,” ingon ni Brader Swingle.​—Hebreohanon 12:2, 3.

Si Leonard Pearson, sa Watchtower Farms Committee, misunod uban sa temang “Magpabiling Nakapunting.” Siya miingon: “Mahimong mabatonan nimo ang kinamaayohang kamera, labing nindot nga talan-awon, usa ka tilinguhaong setting, ug sa gihapon makabatog dili maayong letrato​—kon ang imong kamera wala mapunting.” Sama sa wide-angle lens, ang atong panglantaw kinahanglang maglakip sa tibuok-kalibotang pagwali nga ginahimo. Kinahanglang dili nato kalimtan ang tibuok hulagway. “Kadtong nagatagad sa ilang kaugalingon dili magmalipayon sa ilang mga asaynment,” matud ni Brader Pearson. “Kadtong nagatagad kang Jehova ug sa buluhaton nga iyang gihatag kanila magmalamposon.”

“Pagkadaghan sa Angayng Pasalamatan” mao ang ulohan sa misunod nga pakigpulong, nga gihatag ni John E. Barr, laing membro sa Nagamandong Lawas. “Ayaw gayod wad-a ang imong pagbati sa pagpasalamat kang Jehova,” pahinumdom ni Brader Barr sa mga estudyante. “Mao kanay usa ka tinubdan sa katagbawan, walay sapayan sa imong asaynment.” Ang mapasalamatong tinamdan nagtukmod kang David sa pagsulat: “Ang mga pitik nanghibahin kanako sa mga dapit nga malipayon. Oo, aduna akoy panulondon nga maayo.” (Salmo 16:6) “Kamo adunay ingon ka bililhong pagkabutang diha sa pagbating suod kang Jehova sa inyong inadlaw-adlaw nga kinabuhi,” matud ni Brader Barr. “Dili gayod kuhaon ni Jehova ang maong relasyon gikan kaninyo samtang padayon ninyo kanang gitan-aw ingong usa ka butang nga makapahimuot kaayo nga kamo mapasalamaton tungod niana.”

Ang instruktor sa Gilead nga si Jack Redford maoy sunod nga nagpakigpulong sa temang “Sa Unsang Paagi Nimo Gamiton ang Imong Dila?” Pagkadakong kadaot ang ipahinabo sa wala hunahunaang sinultihan! (Proverbio 18:21) Sa unsang paagi mapugngan ang dila? “Bansayon una nimo ang imong hunahuna,” tubag ni Brader Redford, “tungod kay ang dila nagapadayag sa hunahuna ug kasingkasing.” (Mateo 12:34-37) Si Jesus naghatag ug maayo kaayong panig-ingnan; gigamit niya ang iyang dila sa pagdayeg sa ngalan ni Jehova. “Karon adunay kagutmanan sa pagpatalinghog sa mga pulong ni Jehova,” ingon ni Brader Redford ngadto sa klase. “Kamo nasayod sa maong mga pulong. Kamo adunay ‘dila niadtong natudloan.’ Busa giyahi kanunay ang inyong dila sa usa ka hunahuna ug usa ka kasingkasing nga bug-os napahinungod kang Jehova.”​—Isaias 50:4.

Ang kahinungdanon sa pag-ampo gipasiugda sa pakigpulong nga “Ikaw ba Nagalakaw Ingon nga Anaa sa Presensiya ni Jehova?” Si Ulysses Glass, tigrehistro sa tunghaan, nagpahayag: “Kon ang usa ka amahan nagkugi sa pagsuportar sa iyang pamilya apan wala gayod makigsulti kanila ug wala gayod magpakitag mga kapahayagan sa pagmahal, hayan ang iyang pamilya makahinapos nga ang iyang motibo sa pagkugi maoy dili-makalipayng obligasyon inay gugma. Mao man usab kita. Hayan mapuliki kita sa pag-alagad sa Diyos. Apan kon wala kita mag-ampo, nan kita napahinungod lamang sa buluhaton inay sa usa ka mahigugmaon langitnong Amahan.”

Si Theodore Jaracz, sa Nagamandong Lawas, naghisgot sa temang “Kon Nganong ang Kadaghanan Nakigduyog Uban sa Katawhan sa Diyos.” Matag tuig ginatos ka kaliboan ang nagdugok sa organisasyon ni Jehova. (Zacarias 8:23) Unsay nagpaila sa mga Saksi ni Jehova ingong katawhan sa Diyos? Una, ilang gidawat ang tibuok Bibliya ingong Pulong sa Diyos. (2 Timoteo 3:16) Ikaduha, sila neyutral sa politika. (Juan 17:26) Ikatulo, sila nagpamatuod sa ngalan sa Diyos. (Juan 17:26) Ikaupat, sila nagpakitag nagasakripisyo-sa-kaugalingon nga gugma. (Juan 13:35; 15:13) Uban niining mga kalig-onan, kita makahimo sa maisogong ‘kaylap nga pagpahayag sa mga kahamili sa usa nga nagtawag kanato gikan sa kangitngit ngadto sa iyang katingalahang kahayag.’​—1 Pedro 2:9.

Human niining makatandog nga mga pakigpulong, ang tanang 46 ka estudyante nakadawat ug diploma. Sila giasayn ngadto sa 16 ka kayutaan sa tibuok globo.

Lainlaing Programa sa Hapon

Sa hapon usa ka pinamubong Pagtuon sa Bantayanang Torre ang gidumala ni Donald Krebs sa Komite sa Bethel. Dayon ang mga migraduwar nagpasundayag sa usa ka programa nga nag-ulohang “Ang Kaalam Nagasinggit sa Makusog sa Kadalanan.” (Proverbio 1:20) Ilang gidula-pag-usab ang magantihong mga kasinatian nga ilang nabatonan sa pagpamatuod sa kadalanan ug sa komersiyal nga teritoryo. Sa pagkatinuod, si Jehova nagpanalangin niadtong nagmaisogon sa impormal nga pagwali. “Gusto kong hunahunaon nga kami mga galab diha sa mga kamot sa manulondang mga mangangani,” sumala sa usa ka graduwado. “Kon labawng mahait ang among kahanas, kami magamit sa mas daghang buluhaton niadtong maong mga manulonda.” (Itandi sa Pinadayag 14:6.) Ang programa sa estudyante naglakip usab sa usa ka pasundayag sa slayd nga nagdala sa tumatambong sa usa ka edukasyonal nga pagbiyo sa Bolivia, Malta, ug Taiwan​—tulo sa mga kayutaan diin ang mga graduwado niining maong klase ipadala.

Sunod, giinterbiyo si Wallace ug Jane Liverance​—mga misyonaryo sulod sa 17 ka tuig. Niadtong Oktubre 1993 gidapit sila sa Watchtower Farms, diin si Brader Liverance karon nag-alagad ingong usa sa mga instruktor sa Gilead.

Misunod ang upat-ug-esena nga pasundayag, nga nag-ulohang “Pagpasidungog sa mga Takos Diha sa Ilang Katigulangon.” Samtang nagakatigulang ang mga tawo, ang mga katahap nga mahimong walay-kapuslanan ug sinalikway magaut-ot sa ilang pagsalig-sa-kaugalingon. (Salmo 71:9) Kining makatandog nga pasundayag nagpakita kon sa unsang paagi ang tanan diha sa kongregasyon makasuportar niadtong matinumanong mga tigulang.

Human sa paniklop nga awit ug pag-ampo, ang tanang 6,220 nga mitambong didto sa Jersey City Assembly Hall ug sikbit nga mga tigomanan mibatig kalagsik. Ang among mga pag-ampo uban sa mga graduwado diha sa ilang bag-ong mga asaynment. Hinaot nga sila padayong makasinatig labaw nga kalipay nga nagagikan sa paghatag.

[Kahon sa panid 26]

Estadistika sa Klase

Kanasorang gihawasan: 9

Kanasorang giasaynan: 16

Gidaghanon sa mga estudyante: 46

Aberids nga edad: 33.85

Aberids nga katuigan sa kamatuoran: 16.6

Aberids nga katuigan sa bug-os-panahong ministeryo: 12.2

[Kahon sa panid]

Linaing Pagtagad Gihatag sa Malta

ANG Kakristiyanohan nagpahilom sa kamatuoran sa Bibliya sa Malta sulod sa daghang katuigan. Ang ulahing mga misyonaryo sa Gilead nga gipadala didto, si Frederick Smedley ug Peter Bridle, migraduwar gikan sa ikawalong klase balik niadtong 1947. Ugaling, sila giaresto ug gipalagpot gikan sa Malta dili dugay human sa ilang pag-abot. Ang 1948 Yearbook of Jehovah’s Witnesses nagtaho: “Kining duha ka misyonaryo migugol ug samang panahon diha sa korte ug atubangan sa opisyales sa nasod ingon sa ilang gigugol diha sa ilang mga buluhaton sa pagministeryo, tungod lamang sa pagsupak sa Hirarkiya sa Romano Katoliko. Ang mga pari nag-ingon nga ang Malta gipanag-iya sa mga Katoliko ug ang uban pa kinahanglang mopahawa.” Karon, mga 45 ka tuig ang milabay, upat ka misyonaryo gikan sa ika-96 nga klase sa Gilead ang giasayn sa Malta.

[Hulagway sa panid 26]

Ika-96 nga Klase nga Migraduwar sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubangan paingon sa likod, ug ang mga ngalan gilista gikan sa wala patuo sa matag lumbay.

(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson,C.; Mauray, S.; Walls, D.; Dressen, D.; Schaafsma, G.; Liehr, S (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.