Tunghaang Gilead—50 Anyos ug Mauswagon!

“ADUNAY daghang dapit nga wala kahatagig dakong pamatuod mahitungod sa Gingharian,” mipahayag si N. H. Knorr ngadto sa unang klase sa Gilead niadtong Pebrero 1, 1943, ang unang adlaw sa tunghaan. Midugang siya: “Adunay ginatos ug linibo pang tawo nga maabot kon adunay daghang mangangani sa uma. Sa dili-takos nga kalulot sa Ginoo, adunay daghan pa unya.”

Ug adunay daghan pang mangangani​—minilyon pa! Ang gidaghanon sa mga magmamantala sa Gingharian misulbong gikan sa 129,070 sa 54 ka nasod niadtong 1943 ngadto sa 4,472,787 sa 229 ka nasod sa 1992! Ang Tunghaang Gilead dakog naamot sa pagsangyaw nga misangpot sa maong pag-uswag. Human sa 50 anyos nagpadayon kini sa pagbaton ug pangunang bahin sa pagbansayg mga manganganing misyonaryo aron sa pag-alagad sa bisan diin nga gikinahanglan sila sa uma sa kalibotan.

Sa Marso 7, 1993, may 4,798 ka dinapit ug mga membro sa pamilyang Bethel sa T.B. nga nagtigom sa Jersey City Assembly Hall, sa New Jersey, alang sa graduwasyon sa ika-94ng klase. Kining espesyal gayong okasyon mihatag usab ug higayon sa paghinumdom sa 50 anyos sa Tunghaang Gilead. Buot ka bang mahibalog diyutay bahin sa programa?

Human sa usa ka pang-abling awit, si George D. Gangas sa Nagamandong Lawas mitanyag ug mainitong pag-ampo. Dayon, human sa mga pulong sa introduksiyon pinaagi sa tsirman, si Carey W. Barber, ang mga graduwado​—ug ang tanang nanambong—​namati pag-ayo sa serye sa mugbong mga pakigpulong.

Si Robert W. Wallen ang unang namulong, bahin sa temang “Ikaw Wala Gayod Mag-inusara.” Sa madasigong tono, siya miingon: ‘Sa mga adlaw sa unahan, motungha ang mga okasyon sa inyong kinabuhi sa dihang kamo mobating nag-inusara gayod, nga halayo kaayo sa pamilya ug sa mga higala.’ Nan, sa unsang paagi ikaingon, “Ikaw wala gayod mag-inusara?” Siya misaysay: ‘Tungod kay ang matag usa kaninyo makapahimulos sa posibilidad sa dihadihang pagpakigsulti kang Jehova nga Diyos.’ Siya miawhag sa mga graduwado sa pagmahal sa pribilehiyo sa pag-ampo ug sa paggamit niana sa matag adlaw. Dayon, sama kang Jesus, sila makaingon, “Ako wala mag-inusara.” (Juan 16:32) Pagkamakapadasig kanang mga pulonga alang sa mga graduwado!

Sa paghan-ay sa temang “Pangupting Hugot ang Inyong Paglaom” (gibase sa inadlaw nga teksto sa Marso 7), si Lyman A. Swingle sa Nagamandong Lawas sunod namulong bahin sa panginahanglan sa duha ka hiyas​—ang pagkamainantoson ug paglaom. ‘Ang pakaulaw, pagkamabatokon, pagdumot, pagkabilanggo, bisan kamatayon, maoy mga hinungdan nganong gikinahanglan ang pagkamainantoson sa bahin sa mga Kristohanon,’ siya miingon. ‘Walay limite ang kusog nga labaw sa kasagaran nga makuhaan sa matinumanong mga Saksi ni Jehova panahon sa panginahanglan. Kini tinuod nga makapalig-on, ilabina alang kaninyo nga mga graduwado.’ Komosta ang paglaom? ‘Kinahanglanon kaayo ang paglaom,’ siya misaysay. ‘Sama sa usa ka salukot nga mosalipod sa ulo sa tigsul-ob, sa ingon ang paglaom sa kaluwasan magbantay ug mosalipod sa mga gahom sa panghunahuna sa Kristohanon, nga makapaarang kaniya sa paghupot sa integridad.’​—1 Tesalonica 5:8.

Ang sunod nga mamumulong, si Ralph E. Walls, mipili ug usa ka makaiikag nga tema, “Sa Unsang Paagi Makaikyas Kita Ngadto sa Kasegurohan sa ‘Luag nga Dapit’?” Unsa ba kining “luag nga dapit”? (Salmo 18:19) “Usa ka kahimtang sa kaluwasan nga magdalag kalinaw sa hunahuna ug kasegurohan sa kasingkasing,” misaysay ang mamumulong. Gikan sa unsa nga gikinahanglan nato ang kaluwasan? ‘Gikan sa imong kaugalingon​—imong kaugalingong mga kahuyangan.’ Midugang siya: ‘Gawas pa, gikan sa gawasnong mga kahimtang nga gisugnoran ni Satanas.’ (Salmo 118:5) Sa unsang paagi makaikyas kita ngadto sa kasegurohan sa usa ka luag nga dapit? ‘Pinaagi sa pagpangita sa mga sugo ni Jehova diha sa tanan natong gibuhat ug pinaagi sa pagpangaliya kang Jehova diha sa pagtuo sa tanan natong mga gikabalak-an.’

“Unsay Anaa sa Unahan?” mao ang temang gipili ni Don A. Adams. Ug unsay tinuod nga nagpaabot sa bag-ong mga misyonaryo? Usa ka yugto sa pagpasibo, misaysay siya. “May daghan usab nga mga panalangin sa inyong atubangan.” Ingong usa ka pananglitan, siya misugilon bahin sa bag-ong magtiayong misyonaryo nga human makapahiluna sa ilang asaynment misulat: “Hunahunaa ang labing maayong adlaw nga sukad nasinati nimo sa pag-alagad, ug ang kada adlaw maoy sama niana. Kami dili makadala ug igong mga basahon, ug kanunay kaming hangyoon sa mga tawo alang sa mga pagtuon.” Ang mamumulong mipunting ug pila ka pulong ngadto sa pamilya ug mga higala sa mga graduwado: ‘Dili kinahanglan nga inyong kabalak-an kining mga graduwado. Kamo makatabang kanila pinaagi sa pagsulat ug mga pulong nga makapadasig kanila.’​—Proverbio 25:25.

Ang mga instruktor sa tunghaan ang sunod namulong. Si Jack D. Redford mipili sa temang “Ayaw Kamo Pagdahom ug Bisan Unsa Gikan Kang Bisan Kinsa.” Usa sa mga hagit nga atubangon sa mga graduwado mao ang pakigsinabtanay sa mga tawo, siya misaysay. Unsay makatabang? “Ayaw ninyo tagda ang ilang mga sayop. Ayaw kamo pagdahom ug hilabihan gikan sa ubang mga tawo. Ayaw dahoma kanunay ang kabug-osan sa butang nga giisip nimong angay kanimo. Itugot ang pagkadili-hingpit sa ubang tawo, ug kining kalulota motabang kanimo nga makigsinabtanay. Ang imong katakos nga makigsinabtanay sa ubang mga tawo usa unya ka sukod sa imong pagkahamtong.” (Proverbio 17:9) Sa pagkatinuod, ang pagpadapat niining maalamong tambag motabang sa mga graduwado sa pagpasibong malamposon ingong mga misyonaryo sa usa ka langyawng nasod!

“Atong nabatonan kining bahandia diha sa mga sudlanan nga yuta,” nag-ingon ang 2 Corinto 4:7. Si Ulysses V. Glass, ang registrar sa Tunghaang Gilead, mikomento niining tekstoha samtang gihan-ay niya ang temang “Salig sa Imong Sinulayan, Matinumanon nga Kaigsoonan.” Unsa ang “mga sudlanan nga yuta”? “Kini nagtumong gayod kanatong mga tawo nga dili hingpit,” miingon siya. Unsa ang “bahandi”? “Kini mao ang atong Kristohanong ministeryo,” misaysay siya. (2 Corinto 4:1) Ug unsay angay nga pagabuhaton nianang bahandia? “Ang bahandi nga gisalig kanato ni Jehova dili tipigan. Busa, kamong minahal nga umaabot nga mga misyonaryo, ipanghatag ang bahandi sa bisan asa kamo mangadto, ug tudloi ninyo ang daghan pa kon unsaon sa pagpanghatag niana.”

Usa ka mamingawong gutlo sa dihang si Albert D. Schroeder misugod sa pagpamulong, kay siya mao ang registrar sa Tunghaang Gilead sa pagsugod niini. “Tunga sa Siglo nga Teokratikanhong Pagbansay” mao ang iyang tema. “Si Jehova nasayod kon unsaon paghatag sa epektibong pagbansay, ug kini iyang nabuhat,” siya miingon. Sa unsang paagi? Si Igsoong Schroeder mitumong sa pagbansay nga nadawat pinaagi sa duha ka tunghaan nga natukod 50 anyos kanhi​—ang Tunghaan sa Teokratikanhong Ministeryo ug ang Tunghaang Gilead. Iyang gipunting nga ang usa ka bililhong galamiton sa pagtagana ug tukmang kahibalo mao ang New World Translation. Gipasaligan niya ang mga graduwado: “Makaadto kamo sa inyong langyawng mga asaynment nga may dakong pagsalig nga ang Sosyedad magpadayon sa pagtagana kaninyo ug tukmang kahibalo bahin sa mga katuyoan ni Jehova.”

Si Milton G. Henschel, presidente sa Watch Tower Bible and Tract Society of Pennsylvania, namulong bahin sa temang “Labaw pa sa mga Mananaog.” Gikuha ni Igsoong Henschel ang iyang tema gikan sa teksto sa tuig 1943: “Labaw pa sa mga mananaog pinaagi kaniya nga nahigugma kanato.” (Roma 8:37, King James Version) Kadto usa ka haom nga teksto sa tuig, siya misaysay, tungod kay taliwala sa Gubat sa Kalibotan II, ang atong mga igsoon sa daghang nasod nakaagom ug daghang paglutos. Gibasa ni Igsoong Henschel ang pila ka pagkutlo gikan sa isyu sa Watchtower nga naghisgot sa maong teksto sa tuig ug dayon misaysay: “Kining artikuloha sa Watchtower [Enero 15, 1943] natun-an sa bulan sa Pebrero sa unang klase sa Gilead, ug kadto nag-andam kanila kon unsay diha sa unahan.” Daghan sa mga graduwado latas sa miaging 50 ka tuig nakapamatuod na sa ilang kaugalingon nga mga mananaog, siya misaysay. Komosta ang ika-94ng klase? “Magpabilin kamong suod kang Jehova, magpabiling suod sa iyang gugma, ug tino ang inyong kadaogan.”

Human sa mga pakigpulong sa buntag, ang tsirman nagbasa ug pila ka pahalipay nga nadawat gikan sa lainlaing mga nasod. Unya ang gutlo miabot nga mahinamong gipaabot sa 24 ka magtiayon​—ang pagpanghatag sa mga diploma. Aw, ang mga estudyante sa Gilead sa maong panahon sa opisyal maoy mga graduwado sa Gilead! Sila naggikan sa 5 ka nasod, apan ang ilang mga asaynment nagdala kanila ngadto sa 17 ka nasod, apil ang Hong Kong, Taiwan, Mozambique, ug mga bahin sa Silangang Uropa.

Human sa intermisyon, ang programa sa hapon nagsugod pinaagi sa pinamubong Pagtuon sa Watchtower, nga gidumala ni Robert L. Butler. Dayon gipasundayag sa mga graduwado ang pipila ka talagsaong kasinatian nga ilang napahimuslan samtang nagsangyaw duol sa Wallkill, New York. Ang programa misumbalik-silaw sa usa sa mga butang nga sa walay duhaduha nagdala nila sa Gilead​—ang halalom nilang gugma sa ministeryo sa kanataran.

Human sa programa sa mga estudyante, daghan sa mamiminaw nahibulong kon ang programa may espesyal nga bahin nga magsaulog sa 50 anyos sa Tunghaang Gilead. Sila wala mahiubos!​—Tan-awa ang nag-ubang kahon, “Pagsubli sa 50 Anyos sa Tunghaang Gilead.”

Kalim-an ka tuig kanhi, si Igsoong Knorr nagpasundayag nga siya maoy usa ka tawo sa pagtuo ug sa panan-awon. Ang iyang dakong pagtuo nga molampos ang Tunghaang Gilead gipahayag diha sa iyang pang-abling pakigpulong ngadto sa unang klase, sa miingon siya: “Kami nagtuo nga, sumala sa iyang ngalan, ang usa ka ‘pundok sa pamatuod’ mogawas gikan niining dapita ngadto sa tanang bahin sa kalibotan ug ang maong pamatuod mobarog nga monyumento alang sa himaya sa Diyos nga dili gayod malumpag. Ingong ordinadong mga ministro inyong ibutang ang inyong bug-os nga pagsalig sa Labing Hataas, kay nahibalo man kamo nga kamo iyang giyahan ug tultolan sa tanang panahon sa panginahanglan, ug kamo mahibalo usab nga siya usab mao ang Diyos nga magapanalangin.”a

Kalim-an ka tuig sa ulahi, ang Tunghaang Gilead mauswagon gihapon! Ang mga graduwado sa ika-94ng klase karon may pribilehiyo sa pagsunod sa kapin sa 6,500 ka graduwado nga nauna kanila. Hinaot nga ibutang nila ang ilang bug-os nga pagsalig sa Labing Hataas samtang buhaton nila ang ilang bahin sa pagtapok ug usa ka “pundok sa pamatuod” nga mobarog ingong monyumento alang sa himaya ni Jehova nga Diyos.

[Footnote]

[Kahon sa panid 25]

Estadistika sa Klase

Gidaghanon sa mga estudyante: 48

Kanasorang gihawasan: 5

Kanasorang giasaynan: 17

Aberids nga edad: 32

Aberids nga tuig sa kamatuoran: 15.3

Aberids nga tuig sa bug-os-panahong ministeryo: 9.6

[Kahon sa panid 26, 27]

PAGSUBLI SA 50 ANYOS SA TUNGHAANG GILEAD

Unsay mas maayong paagi sa paghinumdom sa kasaysayan sa Gilead kay sa pinaagi sa mga kasinatian niadtong nakaagi niana sa kinabuhi​—ang nangaging mga graduwado, mga instruktor, ug uban nga nakatabang sa pag-organisar niana? Ang mamiminaw nalipay samtang sila namati sa bahin nga “Pagsubli sa 50 Anyos sa Tunghaang Gilead,” nga gidumala ni Theodore Jaracz.

Unsa ang mga kahimtang nga mitultol sa pagtukod sa tunghaan? Si Igsoong Schroeder misaysay nga siya ug ang duha pa ka laing instruktor gihatagag upat lang ka bulan sa pag-organisar sa tunghaan. “Apan sa pagka Lunes, Pebrero 1, 1943, kami andam na alang sa dedikasyon.”

Nahisama kadto sa unsa alang sa unang mga misyonaryo nga gipadala? Si Igsoong Henschel naghinumdom: “Gipaempake namo sa mga kahoyng kahon sa departamento sa shipping sa Sosyedad ang tanang butang nga buot dad-on sa mga misyonaryo. Sa pag-abot sa mga kahon, sila mag-amping sa pagbukas kanila ug magpagawas sa ilang mga butang. Apan dayon gamiton nila ang mga kahon aron sa paggamag muwebles.” Sa kadugayan, siya miingon, ang Sosyedad mihikay alang sa mga balay sa misyonaryo nga may igoigong kasangkapan.

Sunod sa programa, ang pila ka graduwado sa unang mga klase sa Gilead nga karon maoy mga membro sa pamilyang Bethel sa T.B. nagpaambit sa ilang mga nahinumdoman, ilang mga pagbati, ug ilang mga kasinatian. Ang ilang mga komento tinuod nga nakatandog sa mga kasingkasing sa tanang nanambong.

“Human nako madawat ang imbitasyon sa pagtambong sa unang klase, akong nasayran nga ang akong inahan may kanser. Apan sanglit siya nakapayunir sukad sa edad 16, siya kusganong mitambag kanako sa pagdawat sa imbitasyon. Busa uban sa nagsagol nga mga pagbati ug sa pagsalig kang Jehova, ako mibiyahe paingon sa South Lansing. Ako nakapahimulos sa bug-os ug dulot nga nakapabili sa pagbansay sa Gilead. Natapos sa akong inahan ang iyang yutan-ong pagkinabuhi wala madugay human sa akong graduwasyon.”​—Charlotte Schroeder, nag-alagad sa Mexico ug El Salvador.

“Sanglit si Jehova nag-atiman kanako diha sa bahin sa yuta nga akong gipuy-an, ako naghunahuna nga bisan asa ako moadto iyaha gihapon nga yuta, ug siya mag-atiman kanako. Busa ako malipayon kaayong midawat sa imbitasyon sa unang klase.”​—Julia Wildman, nag-alagad sa Mexico ug El Salvador.

“Kahibulongan ang buluhaton sa misyonaryo! Kami makaestorya sa matag ganghaan. Sa unang bulan, nakapahimutang ako ug 107 ka libro ug nagdumalag 19 ka pagtuon sa Bibliya. Sa ikaduhang bulan ako may 28 ka pagtuon sa Bibliya. Hinuon, may pila ka butang nga kinahanglang kami maanad​—ang kainit, kaumog, mga insekto. Apan usa ka kahibulongang pribilehiyo ang pagkatua didto. Kini butang nga mahalon ko sa kanunay.”​—Mary Adams, ikaduhang klase, mahitungod sa iyang asaynment sa Cuba.

“Ang klima mao ang usa sa dagkong mga kababagan nga kinahanglang sagubangon namo sa Alaska. Sa amihanan kadto hilabihan ka tugnaw, nga may mga temperaturang moubos sa 60 grado ubos sero Fahrenheit ug mas tugnaw. Ang Indian nga kabalangayan ug gagmayng hilit nga mga dapit sa habagatan-silangang Alaska naabot pinaagi kaha sa barko o sa ayroplano.”​—John Errichetti, ikatulong klase.

“Alang kanako ang Gilead maoy imbitasyon gikan ni Jehova pinaagi sa iyang yutan-ong organisasyon aron sa paglig-on kanamo sa espirituwal ug pagpakita kanamo sa usa ka kahibulongang paagi sa kinabuhi.”​—Mildred Barr, ika-11ng klase, nag-alagad sa Irlandia.

Misunod ang daghan pang kahimut-anang mga interbiyo​—Lucille Henschel (ika-14ng klase, nag-alagad sa Venezuela), Margareta Klein (ika-20ng klase, nag-alagad sa Bolivia), Lucille Coultrup (ika-24ng klase, nag-alagad sa Peru), Lorraine Wallen (ika-27ng klase, nag-alagad sa Brazil), William ug Sandra Malenfant (ika-34ng klase, nag-alagad sa Morocco), Gerrit Lösch (ika-41ng klase, nag-alagad sa Austria), ug David Splane (ika-42 nga klase, nag-alagad sa Senegal).

Komosta ang mga igsoong lalaki nga nag-alagad nga mga instruktor? Ang ubay-ubay kanila giinterbiyo usab​—si Russell Kurzen, Karl Adams, Harold Jackson, Fred Rusk, Harry Peloyan, Jack Redford, ug Ulysses Glass. Sila naghinumdom sa ilang pribilehiyo, nga nagpahayag kon sa unsang paagi sila naapektahan niana hangtod niining adlawa.

Ang kulbahinam nga komento sa pagkaepektibo sa mga misyonaryong nabansay sa Gilead gihatag ni Lloyd Barry, kinsa nag-alagad sa Hapon. Niadtong 1949, sa dihang gipadala didto ang 15 ka misyonaryo, ang mga magmamantala sa tibuok Hapon wala makaabot ug 10. Apan 44 ka tuig sa ulahi, adunay kapin sa 175,000 ka magmamantala sa Gingharian nianang yutaa! Unya si Robert Wallen misugilon bahin sa talagsaong kalamposan nga nabatonan sa pila ka misyonaryo sa pagtabang sa mga tawo sa pagsulod sa kamatuoran, apil sa usa ka misyonaryong sister nga diha na sa Panama sulod sa kapig 45 ka tuig ug si kinsa nakatabang ug 125 ka tawo hangtod sa punto sa pagpahinungod ug bawtismo.

Ang tayuktok sa tibuok nga programa nakab-ot sa dihang ang tanang nanambong nga graduwado sa Gilead gidapit sa pagsaka sa entablado. Kadto makapatandog gayod nga gutlo. Ang way-bugto nga agos sa mga igsoong lalaki ug mga igsoong babaye​—89 sa pamilyang Bethel dugang pa sa bisitang mga graduwado—​miagi sa mga alagian sa assembly hall ug misaka sa hagdan paingon sa entablado. Sila giduyogan sa mga igsoong lalaki nga nag-alagad nga mga instruktor latas sa katuigan, ug dayon sa ika-94ng klase​—mga 160 ang tanan!

“Malamposon ba ang buluhaton sa Tunghaang Gilead sa pagbansayg mga misyonaryo alang sa langyawng kayutaan?” nangutana si Igsoong Jaracz. “Ang ebidensiya sa miaging 50 anyos maoy lanog nga oo!”

[Hulagway sa panid 25]

Ika-94 nga Klase nga Migraduwar sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubangan paingon sa likod, ug ang mga ngalan gilista gikan sa wala patuo sa matag lumbay.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.