Usa ka Bag-ong Dapit Alang sa Misyonaryong Tunghaang Gilead
NIADTONG Pebrero 1, 1943, si Nathan H. Knorr, kanhi presidente sa Watchtower Bible and Tract Society, mipahayag sa pang-abling pakigpulong ngadto sa unang klase sa usa ka bag-ong tunghaan. Gipatin-aw niya ngadto sa usa ka gatos ka estudyante nga “dili katuyoan niining [tunghaana] ang pagsangkap ninyo aron kamo mahimong ordinadong mga ministro. Kamo mga ministro na ug aktibo sa ministeryo sa daghang katuigan. . . . Ang kurso sa pagtuon . . . may linaing katuyoan nga mao ang pag-andam ninyo aron mahimong mas takos nga mga ministro.” Hangtod niining adlawa ang Watchtower Bible School of Gilead nagapadayon sa pagbansay sa mga ministro alang sa langyawng misyonaryong buluhaton.
Niadtong 1943, ang Tunghaang Gilead didto nahimutang sa Finger Lakes nga rehiyon sa New York State. Ang Gilead nagpabilin didto sa 17 ka tuig. Dayon, niadtong 1961, kadto gibalhin sa Brooklyn. Sa unsang katuyoan? Ang mga tun-anan sa Gilead sa kanunay gilaraw sa pagtagana sa mga panginahanglan sa organisasyon. Kay kinahanglan nga ugmaron ug organisahon pag-ayo ang mga pasilidad sa sangang buhatan sa tibuok yuta gikinahanglan nga tudloan nga labi pang bug-os ang mga estudyante pinaagi sa mga membro sa mga trabahante sa hedkuwarter sa mga Saksi ni Jehova, nga didto sa Brooklyn. Busa, sa ubay-ubayng katuigan, ang pasiugda maoy diha sa pagbansayg mga trabahante alang sa sangang-buhatan. Human niadto, gisentro na usab ang buluhatong misyonaryo.
Sulod sa sunod 27 ka tuig, 1961 hangtod 1988, ang mga estudyante sa Tunghaang Gilead nakapahimulos sa pribilehiyo sa pagpuyo ug pagkakat-on taliwala mismo sa mga trabahante sa hedkuwarter sa Brooklyn. Didto ang mga estudyante nakabatog kaayohan gikan sa suod nga pakig-uban sa mga membro sa Nagamandong Lawas sa mga Saksi ni Jehova ug sa ubang may-kasinatiang mga ministro. Unsa pay labing maayong paagi sa pagkakat-on kon sa unsang paagi nagalihok ang usa ka sangang-buhatan sa Watch Tower Society? Ang mga estudyante nakabatog kaayohan dili lamang gikan sa pagbansay sa klase kondili gikan usab sa pagpaniid sa mga trabahante sa hedkuwarter nga nagabuhat kada adlaw.
Unsa ang epekto sa Tunghaang Gilead diha sa internasyonal nga buluhatong pagwali? Sa 93 ka coordinator sa sangang-buhatan nga nag-alagad aron magpabiling organisado ang buluhaton sa tibuok kalibotan, 74 maoy mga graduwado sa Tunghaang Gilead. Kini nagapasidungog sa ekselenteng pagbansay nga nadawat sa maong mga tawo sa pagdumala sa bug-at nga responsabilidad sa pag-atiman sa katawhan sa Diyos karong adlawa. Ang dimaihap nagapanawng mga magtatan-aw karon nga nagaalagad sa mga panginahanglan sa organisasyon maoy mga graduwado usab sa Tunghaang Gilead. Oo, ang programa sa pagbansay sa Tunghaang Gilead misagnunot sa mga panginahanglan sa organisasyon.
Ang Gilead Migawas sa Brooklyn
Hinuon, sa makausa pa gihimo ang desisyon sa pagbalhin sa Tunghaang Gilead. Busa sa tinghunlak sa 1988, upat ka trak nga punog muwebles ug kasangkapan sa opisina nahiabot sa ikatulong dapit sa Gilead—ang Watchtower Farms, nga nahimutang sa Wallkill, New York. Sa duha ra ka bulan, ang mga trabahante sa mentenasyon sa Watchtower Farms nag-andam ug nindot nga mga lawak-klasehanan, usa ka librarya, ug mga opisina sa tunghaan. Ang pipila nagtrabaho sa adlaw ug gabii sa pag-andam sa mga pasilidad sa tunghaan aron kana mahuman alang sa panahon sa pagsugod sa sunod nga klase sa ilang pagbansay.
Niadtong Oktubre 17, 1988, ang ika-86 nga klase sa Gilead nagsugod. Nga walay laktaw, ang tunghaan nagpadayon sa tuyo niini sa ‘pagbansay sa mga lalaki ug mga babaye aron mahimong mas takos nga mga ministro.’ Diha sa matahom niining bag-ong palibot sa Watchtower Farms, ang pipila sa kinaiya sa orihinal nga tunghaan sa Finger Lakes nga rehiyon napasig-uli.
Ang mga Graduwado sa Ika-86 nga Klase
Sa Marso 5, 1989, ang tanang trabahante sa hedkuwarter sa Watchtower sa Brooklyn ug Watchtower Farms nagtigom sa Jersey City Assembly Hall aron makatan-aw sa graduwasyon sa ika-86 nga klase. Si Daniel Sydlik, usa ka membro sa Nagamandong Lawas, nag-abli sa programa pinaagig pag-ampo. Si Karl Klein sa Nagamandong Lawas nagsilbing tsirman. Sa iyang introduksiyon, gitandi niya ang kalainan sa langyawng mga misyonaryo sa Kakristiyanohan ug ang iya sa mga Saksi ni Jehova. Pagkadako sa kalamposan sa mga misyonaryong nabansay sa Gilead sa pagtudlo sa kamatuoran sa Pulong sa Diyos diha sa kanasoran sama sa Hapon, diin karon adunay kapin sa 131,000 ka Saksi nga aktibong nagapakig-ambit sa pagsangyaw sa kanataran!
Uban sa temang “Himoang Timaan Ninyo ang Maayong Binuhatan,” si Donald Krebs nagbatbat sa sentrong papel nga gidula sa mga misyonaryo sa Gilead sa tibuok-kalibotang pag-uswag sa organisasyon ni Jehova. “Ang inyong maayong binuhatan diha sa misyonaryong natad ingong mga magtutudlo sa Pulong sa Diyos mao ang inyong . . . ilhanang hiyas. Kami nagadasig ninyo sa pagkugi. Tugob panalanginan ni Jehova ang inyong paningkamot.”
Si George Gangas, usa ka membro sa Nagamandong Lawas, mihatag ug madasigong pakigpulong bahin sa temang “Ang Bibliya Mao ang Labing Maayong Basahon sa Silong sa Adlaw.” Gitambagan niya ang mga graduwado: “Ayawg hikalimti ang pagtuon sa Bibliya. Ang Bibliya punog espirituwal nga mga pahiyas . . . nga mokinlaw ug moidlak. Ang usa nga nagapabili kanila buot nga mobalikbalik sa pagtan-aw ug malingaw sa ilang nagaidlak nga mga kinaiya.”
Ang tema ni Richard Eldred mao ang “Ikaw Makahimog Kalainan.” Samtang ang bag-ong mga misyonaryo makatandog sa mga kinabuhi sa ubang mga tawo, sila makahimog positibong kalainan. Ang mga lalaki ug mga babaye sa karaang panahon sama kang David, Nehemias, Debora, ug Abigail may positibong impluwensiya diha sa uban pinaagi sa dulot nga pagtagad kanila, paghupot sa maisogon nga pagtuo, ug pagpasundayag sa malumo, espirituwal nga tinamdan.
“Ipha ang Inyong mga Panalangin” mao ang mga pulong ni Lyman Swingle, usa ka membro sa Nagamandong Lawas, ngadto sa migraduwar nga klase. Tapos sa pagsaysay sa pipila sa mga panalangin nga naangkon sa klase, sama sa paggugol ug lima ka bulan sa bug-os nga pagtuon sa Bibliya, iya silang gidasig: “Samtang nagakahiduol ang kataposan, inyo tingaling madiskobrehang ang paso mopaspas, magkalisod ang dalan, magkatitip ang agianan. Apan tinoa nga dili kamo maluya, nga dili gayod kamo mohunong, nga dili gayod kamo moundang.”
Usa sa mga instruktor, si Jack Redford, mihan-ay sa temang “Ayaw Himoang ang Inyong Kusog Mahimong Kahuyangan.” Nga gipasukad sa tambag ni Solomon, “Ayaw pagkahimong sobra ka matarong,” siya mipasidaan batok sa pagdepende kaayo sa personal nga mga hiyas inay sa pagsandig kang Jehova. (Ecclesiastes 7:16, 17) “Ang maayong mga hiyas nga pasobrahan mamahimong lit-ag.” Pananglitan, ang usa kansang kusog mao ang balaod ug kahusay tingali mopasobra sa maong hiyas pinaagi sa pagkahimong estrikto kaayo. Busa, mitambag siya sa klase niini: “Kitang tanan angay makaamgo sa atong mga kahuyangan, apan kita angay usab nga makaamgo sa atong mga kusog. Magmatarong apan dili magpakamatarong sa kaugalingon. Sandig kang Jehova. Himoa si Jehova nga inyong kusog.”
Si Ulysses Glass, instruktor ug registrar sa tunghaan, mipatin-aw sa mga pulong ni Jesus, “Isangon ang akong yugo diha kaninyo.” (Mateo 11:29, 30) Dinhi si Jesus nagadapit sa iyang mga tinun-an nga ‘magpasangon sa iyang yugo’ uban kaniya. Dili niya buot nga sila pabug-atan. Naglabi sa iyang hunahuna ang mga panginahanglan sa uban. Gipakita niya ang pagkamapainubsanon. Wala niya pangasab-i ang iyang mga tinun-an. Si Jesus miingon, “Magtuon kamo gikan kanako.” Ang usa ka misyonaryo kinahanglang makabaton sa hunahuna ni Kristo. Kining mamumulonga nagdayeg sa klase tungod sa ilang mahinatagong espiritu ug nagdasig nila sa pagpadayon sa pagpakita nianang samang espiritu diha sa ilang langyawng mga asaynment.
Samtang nagkatapos ang sesyon sa buntag, ang membro sa Nagamandong Lawas si Carey Barber mihatag ug madasigong pakigpulong bahin sa ulohang “Ang Ting-ani Mao ang Kataposan sa Sistema sa mga Butang.” Gipaila niya ang modernong-adlawng katumanan sa sambingay ni Jesus sa trigo ug sa mga bunglayon. (Mateo, kapitulo 13) Nahauna, ang mga dinihogan ni Kristo gitigom. Dayon, ilabina sukad sa tuig 1935, ang ubang mga karnero miduyog sa pagka ‘giani.’ Ang Tunghaang Gilead nakahimog kahibulongang buluhaton sa pagtabang sa pag-ani sa mga tinun-an ni Kristo.
Human mahatagi ang mga graduwado sa ilang mga diploma, usa kanila nagbasag masibotong sulat nga nagpahayag sa ilang mga pagbati bahin sa pagbansay ug pagtagad nga ilang nadawat gikan sa mga instruktor ug sa pamilyang Bethel. Sa bahin, ang sulat miingon: “Ang inyong interes kanamo dili lamang ingon nga usa ka klase sa Gilead kondili ingong mga indibiduwal nakapahingangha kanamo ug usa ka buhat nga takos sundogon. Maoy uban sa dihisabtang mga pagbati nga kita magkabulag—masulob-on nga mobiya tungod kay kamo dili na namo makita apan malipayon ug mahinamon bahin sa among bag-ong asaynment.”
Alang sa programa sa hapon, ang mga graduwado miapil sa Pagtuon sa Watchtower nga gidumala ni Ralph Walls. Dayon ang klase mipasundayag sa pipila ka haylait sa mga kasinatiang ilang nabatonan sa pagsangyaw sa kanataran sulod sa ilang pag-estar sa Watchtower Farms. Ang Komite sa Pagtudlo sa Nagamandong Lawas mipasundayag sa usa ka programa sa mugbong mga drama nga nag-ulohang “Pagtahod sa Awtoridad Nagapausbaw sa Panaghiusa” ug sa usa ka slide presentation nga naghulagway sa kalipay nga nasinati sa mga misyonaryo sa daghang kayutaan latas sa katuigan. Ang programa natapos uban sa kinasingkasing nga pag-ampo ni Frederick Franz, ang 95-anyos nga presidente sa Watchtower Bible School of Gilead.
Pinaagi sa ilang madasigong reaksiyon sa programa, kadtong nanambong nagpaila sa ilang suportar alang sa umaabot nga mga misyonaryo ug apresasyon sa programa. Walay pagduhaduha nga ang 24 ka graduwado sa ika-86 nga klase sa Gilead determinado sa paghimo kang Jehova nga ilang kusog samtang sila mangadto sa ilang bulahang mga asaynment sa misyonaryong natad.
[Kahon sa panid 21]
ESTADISTIKA SA ESTUDYANTE
Gidaghanon sa magtiayon: 12
Gidaghanon sa estudyante: 24
Gidaghanon sa kanasorang gigikanan sa estudyante: 6
Gidaghanon sa kanasorang giasaynan: 12
Aberids nga edad: 32.3
berids nga katuigan sa kamatuoran: 14.1
Aberids nga katuigan sa bug-os-panahong ministeryo: 9.1
[Hulagway sa panid 23]
Ika-86 Migraduwar nga Klase sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubang paluyo, ug ang mga ngalan gilista gikan sa wala patuo sa matag lumbay.
(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.