Dugang mga Misyonaryo Alang sa Tibuok-Yuta nga Pag-ani
ANG Septiyembre usa ka bulang ting-ani alang sa mga mag-uuma, apan ang labi pang hinungdanong buluhaton sa pag-ani nakadanig usa ka dakong panon ngadto sa Jersey City Assembly Hall of Jehovah’s Witnesses, nga tabok lang sa Subang Hudson gikan sa New York City, niadtong Septiyembre 8, 1991. Ang ika-91ng klase sa Watchtower Bible School of Gilead migraduwar. Mga 4,263 ka membro sa pamilyang Bethel ug mga dinapit didto, uban ang laing 1,151 nga konektado sa telepono sa hedkuwarter sa Brooklyn ug sa mga umahan sa Wallkill ug Patterson.
Ang presidente sa Tunghaang Gilead, si Frederick W. Franz, nga hapit nang 98-anyos, nagbukas sa programa pinaagi sa makapatandog ug dulot matinahorong pag-ampo. Si Albert D. Schroeder, usa ka membro sa Nagamandong Lawas ug kanhi registrar ug instruktor sa tunghaan, nagsilbing tsirman sa programa sa graduwasyon. Siya nagpahinumdom sa mamiminaw sa Salmo 2:1, 2, ug sa ubang mga tagna nga nagtagna niining panahona sa pag-uyog ug kagubot taliwala sa kanasoran. Kining kahimtang sa kasamok nagkahulogan sa pagbukas ug daghang bag-ong kanataran alang sa buluhaton sa pag-ani.
Ang unang pakigpulong sa adlaw gipahayag ni George M. Couch, usa ka membro sa Komite sa Bethel. Ang iyang tema maoy “Ipha ang Imong mga Panalangin.” Siya nagpahinumdom sa mga estudyante sa Gilead nga dili gayod kay sayo pa kaayo sa pagsugod niining batasana. Siya mipahayag nga ang mga estudyante mismo tinong gipanalanginan apan ang maong mga panalangin miabot lamang tapos sa dakong pagbudlay. Sa samang paagi, ang 97-anyos nga si Jacob nakigdumog sa tibuok gabii sa usa ka manulonda—ang tanan aron makadawat ug panalangin. (Genesis 32:24-32) Giawhag ni Brader Couch ang mga estudyante nga dili maghunahuna sa negatibong mga panghunahuna kondili mahimong panalangin sa uban pinaagi sa pag-ugmad ug kalinaw sa hunahuna pinaagi sa pag-ampo ug determinasyon.
Si John E. Barr sa Nagamandong Lawas sunod namulong bahin sa temang “Magbaton ug Gugma sa Inyong Taliwala.” Ang mga sumusunod ni Jesus andam magpakamatay alang sa usag usa. “Gibati ba ninyo kining matanga sa gugma nga nagsugwak diha sa inyong mga kasingkasing?” iyang gisukna ang mga estudyante. ‘Kon wala ang maong gugma,’ siya miingon, ‘kita walay kapuslanan. Kana ang lintunganay nianang butanga.’ (1 Corinto 13:3) Gitala ni Brader Barr ang pila ka praktikal nga paagi sa pagpakitag gugma. Gidasig niya ang mga estudyante sa pagtahod sa kaubang mga misyonaryo, nga kanunay mangitag mataktikanhong paagi sa pagsulti sa mga butang. ‘Hikalimti ang ginagmayng mga panagbingkil,’ mao ang iyang tambag kanila, nga mikutlo sa 1 Pedro 4:8. Siya mipahayag nga bisan ang mga adlaw sa mga misyonaryo sa pagluto maoy mga okasyon sa dihang sila makapakitag gugma pinaagi sa pag-isip sa buluhaton nga labaw pa kay sa yanong naandang katungdanan. Siya nagpahinumdom sa mga estudyante: “Dili gayod matapos ang atong pagkautangan ug gugma sa atong mga igsoong lalaki ug mga babaye.”—Roma 13:8.
“Unsa ba Ka Kamasaligon?” mao ang makapaikag nga tema nga gihan-ay ni David A. Olson sa Komite sa Departamento sa Pag-alagad. Gipasiugda niya ang duha ka bahin sa pagkamasaligon: diha kang Jehova ug sa iyang organisasyon, nga alang niana kita dunay dimaihap nga mga katarongan (Proverbio 14:6; Jeremias 17:8); ug diha sa kaugalingon. Ang mga misyonaryo dunay katarongan sa usa ka sukod sa pagsalig-sa-kaugalingon, sumala sa ilang kagikan ingong mga ministro ug sa pagsalig nga gibutang ni Jehova ug sa iyang organisasyon diha kanila. Gipadayag ni apostol Pablo ang ingon nga pagsalig tungod sa susamang mga katarongan. (1 Corinto 16:13; Filipos 4:13) Hinuon, si Brader Olson nagpasidaan batok sa sobrang pagsalig, nga gipasiugda sa kalibotan, sumala sa giilustrar sa usa ka bantogang magsusulat nga gikatahong miingon: “Ako kanunay mokutlo sa akong kaugalingon. Makadugang kanag lamas sa akong estorya.” Bisan pa niana, ang pagsalig nga gitimbangan sa pagkamapaubsanon makadasig ug pagsalig diha sa uban. Kini matuod gayod sa kahimtang ni Pablo.—Filipos 1:12-14.
Si Lyman A. Swingle sa Nagamandong Lawas sunod miawhag sa mga estudyante: “Ngadto sa Kaumahan nga Pagaanihon, Kamong mga Graduwado sa Gilead!” Siya miingon nga kadto usa ka adlaw sa pag-ani alang sa Tunghaang Gilead ug alang sa tibuok-kalibotang pag-igsoonay, samtang ang mga graduwado manlakaw ug moduyog sa linibong unang mga graduwado nga anaa pa sa misyonaryong buluhaton—ang pipila gikan sa una, ikaduha, ug ikatulong mga klase sa katuigang 1940! Mipahayag si Brader Swingle nga niadtong panahona walay nahibalo nga ang misyonaryong buluhaton magpadayon sulod sa laing 50 ka tuig, o nga ang Nazismo, Pasismo, ug ubang mga panggamhanang babag sa buluhaton sa pagsangyaw malumpag. “Kon kita malisang tungod sa nahimo ni Jehova sa nangagi,” siya nangutana, “unsa na man ang sa umaabot?” Siya mitapos uban sa masiboton nga pag-awhag sa mga estudyante: “Ngadto sa kanataran!”
Unya ang duha ka pangunang instruktor sa Tunghaang Gilead nagpakigpulong sa ika-91ng klase sa kataposang panahon. Si Jack D. Redford namulong sa temang “Batoni ang Kaalam.” Ang Tunghaang Gilead, giingnan niya ang mga estudyante, nagatudlog kahibalo ug pagsabot, apan kinahanglang sila magbaton ug kaalam, ang katakos sa paggamit sa ilang kahibalo sa hustong paagi. Giawhag niya ang mga estudyante nga isalikway ang sayop nga pagtuo nga nakat-onan na nila ang tanan diha sa Gilead. “Ang inyong makat-onan tapos sa tunghaan ang bililhon.” Nahiapil sa mga butang ila pang pagakat-onan: ang pakiglabot nga makigdaiton uban sa mga tawo, ang pagkaarang sa pag-ingon “Gikasubo ko” ngadto sa usa ka kapikas, ngadto sa isigka-misyonaryo, ug sa lokal nga mga igsoong lalaki ug babaye; ang pagbantay sa pagsalig sa unang mga impresyon ug sa pag-amgo nga ang matag suliran maoy makutihon, nga nagkinahanglag lalom pa nga pagsabot sa mga sirkumstansiya una mohatag ug maalamong tambag; ug sa pagtahod sa lokal nga mga igsoon tungod sa ilang katakos sa pagdumala sa lisod nga mga sirkumstansiya.—Proverbio 15:28; 16:23; Santiago 1:19.
Si Ulysses V. Glass, ang registrar sa Tunghaang Gilead, naghimo sa Filipos 3:16 nga tema sa iyang pakigpulong. Gidayeg niya ang klase tungod sa pag-uswag nga ilang nahimo ug giawhag sila sa pagpadayon nga nahiuyon sa maong kasulatan. Samtang ang mga estudyante magpadayon sa pagbatog tukmang kahibalo, siya miingon, sila dili gayod mahibalo sa tanan. Giilustrar niya ang punto pinaagi sa usa ka digital nga relo. Ang tag-iya niini tingali mahibalo kon unsaon pagpaandar niini nga wala mahibalo kon sa unsang paagi kini aktuwal nagaandar. Sa susama, ang mga misyonaryo angay dili magtamay niadtong si kinsa, nga bisan tuod dili makaambas sa giladmon sa ilang kahibalo, nahibalo kon unsay hinungdanon—kon unsaon sa pagkahadlok kang Jehova. (Proverbio 1:7) Siya nagpahinumdom sa klase sa pagpadayon sa paghupot ug ‘yano nga mata.’ (Mateo 6:22) Ang espirituwal nga mata mahimong mabalda sama ra sa pisikal nga mata. Ang pipila, pananglitan, dunay tunnel vision o hiktin nga panan-aw—nga napokus kaayo sa pila ka detalye nga dili makakita sa tibuok nga hulagway—samtang ang uban, sa balit-ad, makakita lamang sa pangibabaw nga mga isyu ug kanunay mahasimang gikan sa pasukaranang mga isyu nga kinahanglang ilang sulbaron.
Ang pangataposang pakigpulong sa buntag may ulohang “Pag-ila ug Pagbuhat Uban sa Organisasyon ni Jehova,” nga gipahayag ni Theodore Jaracz sa Nagamandong Lawas. Si Brader Jaracz mipahayag nga samtang adunay linibo ka organisasyon ug sosyedad sa kalibotan, usa lang nianang tanan maoy dili gikan sa kalibotan. Unsaon pag-ila niana nga nagahawas kang Jehova? Ang Pulong sa Diyos nagatagana sa mga ilhanan. Gipakita sa Bibliya nga ang iyang langitnong kalalangan organisado kaayo. (Salmo 103:20, 21; Isaias 40:26) Ang yutan-ong organisasyon ni Jehova mailhan usab tungod sa kahusay ingon man pagkabulag niini sa kalibotan, estriktong pagsunod niini sa mga prinsipyo sa Bibliya, ang taas niining sukdanan sa moral nga kahinlo, ug ang gugma taliwala sa mga membro niini. Giawhag ni Brader Jaracz ang mga estudyante sa Gilead sa pagtabang sa labing daghan kutob sa ilang mahimo diha sa ilang mga asaynment sa pag-ila sa organisasyon ni Jehova pinaagi sa Kasulatan. Maylabot niana, iyang gipahayag ang usa ka makalipay nga pahibalo: Ang Tunghaang Gilead sa dili madugay madoble sa gidak-on, ngadto sa mga 50 ka estudyante sa ika-93 nga klase! Usab, ang mga klase sa Sumpay nga Tunghaan sa Alemanya mosugod sa susamang panahon. Ang pakpak dugay ug kusog!
Ingon nga mao ang tayuktok sa buntag, ang tanang 24 ka estudyante sa Gilead midawat ug mga diploma. Sa dili madugay sila moadto na sa 12 ka lainlaing nasod sa tibuok kalibotan. Ang klase mipahayag sa kinasingkasing nga resolusyon, nga nagpasalamat sa Nagamandong Lawas ug sa pamilyang Bethel. Tapos sa paniudto, si Brader Charles J. Rice sa Komite sa Umahan sa Watchtower midumala sa pinamubong Pagtuon sa Bantayanang Torre. Dayon ang mga graduwado nagpasundayag ug usa ka bibo nga programa, nga nagpasundayag sa pipila sa mga kasinatian nila sa pagsangyaw panahon sa ilang lima-ka-bulan nga kurso sa Wallkill, New York. Human niadto, ang mga magmamantala nga naghawas sa ubay-ubay lokal nga kongregasyon nagpasundayag ug usa ka drama nga nag-ulohang Mga Batan-on nga Nahinumdom sa Ilang Maglalalang Karon.
Sa pagtiklop sa programa, si Brader George Gangas, usa ka 95-anyos nga membro sa Nagamandong Lawas, mitanyag ug kinaiyanhon madasigong pag-ampo kang Jehova. Ang mamiminaw mibiya nga masadyaon, nga ang matag usa sa walay duhaduha natandog sa pagbatog labi pang dakong bahin sa tibuok-yutang buluhaton sa pag-ani.
[Kahon sa panid 22]
Mga Estadistika sa Klase
Mga nasod nga gihawasan: 6
Mga nasod nga giasaynan: 12
Gidaghanon sa estudyante: 24
Gidaghanon sa magtiayon: 12
Aberids nga edad: 33.4
Aberids nga tuig sa kamatuoran: 16.13
Aberids nga tuig sa bug-os-panahong pag-alagad:11.3
[Hulagway sa panid 23]
Ika-91ng Klase nga Migraduwar sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubangan paingon sa likod ug ang mga ngalan gilista gikan sa wala patuo sa matag lumbay.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.