Pagbansay sa Gilead sa Labing Balaang Tinuohan
“ANG among mga estudyante maayo kaayo nga pagkabansay sa labing balaang tinuohan.” Kini ang pang-abling mga pulong sa programa sa graduwasyon sa ika-95ng klase sa Watchtower Bible School of Gilead, nga gihimo sa Dominggo, Septiyembre 12, 1993. Niadtong buntaga ang 4,614 ka dinapit ug mga membro sa pamilyang Bethel nga nagtigom sa Jersey City Assembly Hall gipangunhan sa pang-abling pag-ampo pinaagi ni George Gangas. Si Brader Gangas membro sa pamilyang Bethel sulod nag 65 ka tuig ug sa panuigong 97 mao ang labing tigulang nga membro sa Nagamandong Lawas.
Si Albert Schroeder, nga sakop usab sa Nagamandong Lawas ug tsirman sa programa, mipahayag: “Sulod sa lima ka bulan ang kurso sa Gilead gibase sa labing balaang tinuohan.” Apan unsa ba ang “labing balaang tinuohan”? Gisaysay niya nga kining “labing balaang tinuohan,” nga gihisgotan sa Judas 20, mao ang katibuk-ang kamatuoran sa Bibliya. Busa ang kurso sa Gilead gibase sa Pulong ni Jehova, ang Bibliya, nga mao ang pangunang teksbok niini.
Nadawat sa mga Estudyante ang Dugang Instruksiyon
Ang unang mamumulong mao si John Stuefloten sa Komite sa Umahan sa Watchtower, kinsa namulong bahin sa temang “Pagpahimulos sa Impluwensiya sa mga Tawong Makinaadmanon.” Ang Bibliya nag-ingon nga kadtong “nagalakaw uban sa mga tawong makinaadmanon mahimong maalamon.” (Proverbio 13:20) Panahon sa kurso sa Gilead, gigugol sa mga estudyante ang kapin sa 900 ka oras diha sa pagtuon sa Bibliya. Si Brader Stuefloten nangutana sa mga estudyante: “Sa unsang paagi ang impluwensiya ni Jehova mag-apektar kaninyo sa umaabot? Mangadto kamo sa 18 ka nasod nga adunay giipong populasyon nga mga 170 milyong tawo. Busa sa unsang paagi kamo makaimpluwensiya nianang mga tawhana?” Pinaagi sa pagpadayag sa kaalam ni Jehova, ang bag-ong mga misyonaryo makatabang sa uban nga mahimong mga magsisimba ni Jehova, ang Tinubdan sa way-kinutobang kaalam.
Ang “Pagkahimong Tanang Butang Ngadto sa Tanang Tawo” mao ang tema sa misunod nga pakigpulong, nga gihan-ay ni Lloyd Barry sa Nagamandong Lawas. (1 Corinto 9:22, King James Version) Mga 45 ka tuig kanhi, si Brader Barry mismo estudyante sa ika-11ng klase sa Gilead. Karon ang ika-95ng klase nalipay nga nakadawat ug praktikal nga tambag gikan sa usa ka kanhing misyonaryo nga may tinuig nga kasinatian sa usa ka langyawng nasod. Gidasig niya ang mga estudyante nga ibutang dayon ang kaugalingon sa lugar sa mga tawo diha sa bag-o nilang langyawng teritoryo pinaagi sa pagkasayod sa lokal nga kultura ug pagkat-on sa pinulongan. Siya miingon nga mahimo kini nga labing maayo pinaagi sa pagpakigbuylog ug pagpakig-uban sa lokal nga katawhan sa buluhatong pagsangyaw ingon man sa pagkahibalo sa ilang mga kostumbre ug pagsagop niana kon angay.
Sunod, si Dean Songer sa Komite sa Pabrika namulong bahin sa makapaikag nga temang “Nahigawas sa Katungdanan.” Tapos sa kapin ug 35 ka tuig sa bug-os-panahong pag-alagad, si Brader Songer nakasabot kon unsay kahulogan sa pagkinabuhi sa may-tinong-tumong, yanong kinabuhi, nga gihatag ang bug-os nga pagtagad sa teokratikanhong buluhaton nga kinahanglang tumanon, nga nahigawas sa materyal nga mga atimanonon. Ug kadto ang diwa sa iyang tambag ngadto sa mga estudyante. Ang mga mag-aawit sa templo ni Jehova nahigawas sa mga katungdanan nga kasagaran sa ubang mga Levihanon aron ideboto ang ilang kaugalingon sa ilang espesyal nga tinudlong-buluhaton. (1 Cronicas 9:33) Sa susama, ang mga misyonaryo sa Gilead napahigawas gikan sa ordinaryong mga butang sama sa sekular nga trabaho aron sila makahatag ug bug-os nga pagtagad nganha sa ilang espesyal nga pag-alagad. Si Brader Songer mitiklop uban niining tambaga: “Hupti ang tinong tumong ug yanoha ang inyong kinabuhi. Ang inyong responsabilidad nga sama niadtong nahigawas sa katungdanan mao ang pagbuhat sa adlaw ug sa gabii, nga magadayeg kang Jehova.”
Ang membro sa Nagamandong Lawas nga si Daniel Sydlik misunod uban sa temang “Pagtudlo sa Uban Kon Unsaon Pagpahimulos nga Labing Maayo sa Kinabuhi.” Iyang gidasig ang mga estudyante “dili lamang sa pagtudlo ug doktrina kondili sa pagbatog igong kaisog sa pagpakita sa katawhan kon unsay kinahanglan nga buhaton nila aron ang ilang mga kinabuhi ikapahiuyon sa kabubut-on sa Diyos.” Ang maayong mga magtutudlo kinahanglang makadasig ug makapalihok. “Magmahunahunaon sa pagtudlo sa mga tawo sa pag-ugmad ug Kristohanong mga prinsipyo inay sa pagtudlo lamang sa mga lagda ug mga balaod,” siya miingon ug midugang sa pagtiklop: “Labaw sa tanang butang, minahal nga kaigsoonan, tudloi ang inyong kaugalingon ug tudloi ang uban sa paghigugma, kay kini ang hingpit nga bugkos sa panaghiusa.”—1 Corinto 13:1-3; Colosas 3:14.
Human sa mga lima ka bulang pagbansay, ang mga estudyante ilabinang nahinangop sa ilang duha ka instruktor sa Gilead. Si Jack Redford, kanhi usa ka misyonaryo mismo, maoy unang namulong, bahin sa ulohang “Inyong Gihimo ang Hustong Pagpili.” Sa karaang Hudiyonhong kalibotan, sa wala pa mahimong usa ka Kristohanong apostol, si Pablo may posisyon, dungog, impluwensiya, ug kasegurohan sa panalapi. Apan sa Filipos 3:8, gibatbat ni Pablo kining tanan ingong “daghang biya,” o “basura,” sumala sa hubad nga Phillips. Ang iyang kasingkasing maoy sa ministeryo, ug gihimo niya ang hustong pagpili. Sa kasukwahi, ang kinabag-ang katawhan karong adlawa nagpadayag diha sa ilang mga pagpili sa kinabuhi nga giisip nila ang ilang materyal nga kabtangan nga labaw ug bili kay sa kinabuhing walay kataposan. Ang mga misyonaryo sa Gilead naghimo sa hustong pagpili. Si Jack Redford mitiklop pinaagi sa pag-ingon: “Walay bisan unsa nga ikatanyag sa kalibotan sa Yawa nga ikapanig-ingon sa misyonaryong pag-alagad. Atimana kanang bililhon kaayong pribilehiyo, ug pasagdi ang kalibotan nga mag-atiman sa basura niini!”
Sulod sa miaging 32 ka tuig, si Ulysses Glass maoy usa ka instruktor sa Gilead. Gihatag niya sa mga estudyante ang panamilit nga tambag pinaagi sa temang “Diyos Lamang ang Makabuhat ug Usa ka Kahoy,” nga nagbase sa iyang pakigpulong sa Salmo 1:3. Ang modernong teknolohiya wala gayod makasuhid sa pagkabuhat sa usa ka kahoy, nga gidesinyo sa Diyos. Sa usa ka diwa, ang tinuod nga mga Kristohanon nahisamag mga kahoy, nga tinanom ug gipatubigan ni Jehova. Si Brader Glass mipahayag nga sulod sa lima ka bulan, ang mga estudyante “sa makanunayon gipatubigan sa tuboran sa nagahatag-kinabuhing mga tubig sa Pulong sa Diyos,” nga samag mga kahoy sa espirituwal nga kakahoyan o paraiso. Bisan pa niana, ingong mga misyonaryo, kinahanglang bantayan nila ang ilang “espirituwal nga sistema sa kaugatan batok sa bisan unsang kadaot.” Sila gitambagan nga ‘magpadayon sa pag-inom sa tubig sa kinabuhi gikan kang Jehova tungod kay Diyos lamang ang makabuhat ug usa ka kahoy.’
Ang kataposang pakigpulong gihatag ni Carey Barber, usa ka membro sa Nagamandong Lawas. Human sa 70 ka tuig nga bug-os-panahong pag-alagad, si Brader Barber masaligong makapamulong bahin sa ulohang “Ihatag Kang Jehova ang Linaing Debosyon.” Ang kinabag-ang katawhan wala maghatag ug linaing debosyon kang Jehova. (Deuteronomio 5:9) Bisan pa niana, sumala sa gipaila ni Brader Barber, bisan pa sa atong kadili-hingpit, “posible gayod nga mahimong bug-os debotado sa Diyos.” Siya midugang: “Walay mausa ang tinuod makaingon: ‘Ang Yawa maoy nagpabuhat nako niini.’” Apan mapildi kita sa Yawa kon dili kita mosukol kaniya. (Santiago 4:7) Ang pagkapuliki sa buluhaton ni Jehova mao ang kinalabwang paagi sa pagsukol kang Satanas ug sa iyang kalibotan ug paghatag kang Jehova ug linaing debosyon.
Gitudlo Ingong mga Misyonaryo
Ang programa sa buntag gitapos sa opisyal nga pagtudlo sa tanang 46 ka estudyante ingong mga misyonaryo. Ang 23 ka magtiayon nakadawat sa mga diploma nga sa bahin nagpahayag nga ang mga graduwado “sa linain may katakos sa paghimog edukasyonal nga buluhaton, pagpasiugda sa maayong kabubut-on ug pagbuhat alang sa malungtarong kalinaw ug sa balaod sa hingpit nga kahusay ug pagkamatarong taliwala sa tanang katawhan.” Ang ika-95ng klase sa Gilead maningkamot gayod sa pagtuman niining hamiling buluhaton diha sa 18 ka nasod nga gitudlo kanila. Ang mga asaynment maoy lukop sa kalibotan ug nag-apil sa kanasoran sa Asia, Aprika, Uropa, Latin Amerika, ug sa Caribbean.
Sa hapon, human sa pinamubong Pagtuon sa Bantayanang Torre nga gidumala ni Charles Woody sa Komite sa Departamento sa Pag-alagad, ang bag-ong mga graduwado sa Gilead nagpasundayag sa ilang programa sa estudyante, nga may temang “Ang Gilead Nag-andam Kanamo sa Pagpanudlo Ingong mga Misyonaryo.” Ang sesyon natapos sa dramang “Ang mga Pagpili nga Atong Ginaatubang.”
Human niining makapadasig nga programa, ang bag-ong mga misyonaryo andam na karon nga ipadala ngadto sa upat ka suok sa yuta aron sa pagpaambit sa uban sa “labing balaang tinuohan.”
[Kahon sa panid 26]
Estadistika sa Klase
Kanasorang gihawasan: 7
Kanasorang giasaynan: 18
Gidaghanon sa mga estudyante: 46
Gidaghanon sa mga magtiayon: 23
Aberids nga edad: 30.06
Aberids nga katuigan sa kamatuoran: 12.92
Aberids nga katuigan sa bug-os-panahong ministeryo: 9.4
[Hulagway sa panid 26]
Ika-95 nga Klase nga Migraduwar sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubangan paingon sa likod, ug ang mga ngalan gilista gikan sa wala patuo sa matag lumbay.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.