Ang Graduwasyon sa Ika-83 nga Klase sa Gilead Sadya Gayong Okasyon
“MAGPASALAMAT kang Jehova, kamong katawhan, kay siya maayo: kay ang iyang mahigugmaong-kalulot maoy sa panahong walay katinoan.” (Salmo 136:1) Kana ang kinasingkasing nga pagbati sa tanang 4,391 nga mitambong sa programa sa graduwasyon sa ika-83 nga klase sa Watchtower Bible School of Gilead ning tinghunlak. Ang mga pakigpulong, mga kasinatian, ug ang drama sa Bibliya nga gipresentar panahon sa programa nakapahinabo nga ang tanan mibiya nga madasigon kaayo. Ang graduwasyon gihimo sa Septiyembre 6, 1987, sa matahom nga Jersey City Assembly Hall, nga kanhi nailhang Stanley Theater.
Tapos sa pang-abling awit, ug pag-ampo ni John Booth sa Nagamandong Lawas, ang tsirman, si Albert Schroeder, laing membro sa Nagamandong Lawas, nag-abiabi sa tanan sa maong sadyang okasyon. Ang 24 ka estudyante naggikan sa lima ka nasod, ug sila gipadala sa walo ka nagkalainlaing yuta. Gipasiugda ni Igsoong Schroeder ang pagsalig nga nabatonan sa katawhan ni Jehova tungod kay ang ilang pagtuo gibase man sa mga absoluto. Pananglitan, sila nahibalo nga si Jehova mao ang Soberano sa Uniberso ug ang iyang Pulong, ang Balaang Bibliya, maoy absolutong kamatuoran. Kini lahi kaayo sa tawhanong mga pilosopiya nga gibase sa mga kadili-piho ug mga pagbanabana.
Ang unang mamumulong mao si Martin Poetzinger, usa usab ka membro sa Nagamandong Lawas, kinsa migugol ug siyam ka tuig sa mga kampong konsentrasyon sa Nazi. Ang iyang tema mao “Kinsa ang Imong Saligan?” nga gibase sa Proverbio 3:5, 6. Iyang gipasiugda ngadto sa mga estudyante ang panginahanglan sa bug-os nga pagsalig kang Jehova ug sa iyang makitang organisasyon, ingon man ang pagpamatuod sa matag usa sa pagkakasaligan. Ang pagbansay sa Gilead sa mga estudyante mao lamay pundasyon; karon kinahanglang tukoran nila kana pinaagi sa pagsunod sa tambag ni Pablo sa Efeso 5:15, 16. ‘Ayaw kamo pag-urong,’ miawhag ang mamumulong. ‘Kamo magbaton ug mga problema sa inyong misyonaryong asaynment kon bahin sa pinulongan, klima, pagkaon, ug uban pa; apan pinaagi sa pagsalig kang Jehova, inyong masulbad kanang tanang problema. Ang gugma sa mga tawo mao ang inyong yawi sa kalamposan. Ang tanang pagdasig nagagikan sa Diyos; ang tanang pagbugnaw nagagikan ni Satanas.’
Ang sunod nga mamumulong mao si Eldor Timm, usa ka membro sa Komite sa Pabrika, nga nagbase sa iyang mga pahayag sa 2 Corinto 13:5: “Magpadayon kamo sa pagsusi kon kamo anaa sa pagtuo.” Ang mga estudyante natapos na sa sinulat nga mga pasulit, siya miingon, apan sila mopadayon sa pag-atubang sa daghan pang pagsulay sa ilang misyonaryong mga asaynment. Kon sa unsang paagi ilang sagubangon ang maong mga pagsulay magatino sa ilang kalamposan ingong mga misyonaryo. Kinahanglang magbantay sila batok sa paghinobra sa pagsalig pinaagi sa pagpamati sa tambag: “Ang nagahunahunang siya nagabarog magbantay nga dili mapukan.” (1 Corinto 10:12) Mopadayon sila sa paghimog mga kauswagan kon huptan nila ang maayong tinamdan sa hunahuna.
Ang usa ka membro sa Komite sa Departamento sa Pag-alagad, si Joel Adams, misunod. Siya naghisgot sa ulohan: “Paghunahuna Sama Kang Jesus, Ipakita ang Personal nga Kaikag sa Uban.” Pagkamaayo ang panig-ingnang gihatag ni Jesus niining bahina! Ang iyang panig-ingnan sa pagkadili-hakog ug pagkamapaubsanon gipasiugda alang kanato sa Filipos 2:3-5. Kon ang pipila maoy pagsulay kanato tungod sa ilang mga kahuyangan o kakulang sa taktika, buhaton nato ang dili kasagaran sa pagpakitag kalulot kanila. Panahon sa kurso sa Tunghaan sa Gilead, daghan ang nagpakitag kaikag sa mga estudyante; karon ila na usab kanang buhaton sa uban. Ang labing malamposong mga misyonaryo mao kadtong nagapakitag kaikag sa mga kostumbre sa uban, pinulongan, mga panginahanglan, ug uban pa.
Sunod, ang mga estudyante gidasig sa usa nga nagmisyonaryo sa daghang katuigan, si Lloyd Barry, usa usab ka membro sa Nagamandong Lawas. Siya naghisgot sa temang “Pag-awit Kang Jehova,” nga gibase sa Salmo 96:1. Ang katawhan ni Jehova nagakalipay sa pag-awit. Ang pag-awit duyog sa kalipay, ug busa iyang gidasig ang mga estudyante nga dili gayod mawad-an sa kalipay sa pagdala sa kamatuoran ngadto sa uban. ‘Kon tun-an nimo ang usa ka bag-ong pinulongan,’ siya miawhag, ‘ibutang ang imong kasingkasing niana sukad sa sinugdan. Sulayan sa Yawa ang pagbugnaw kanimo, nga himoon kang mingawon, ipahinabo ang pagkawalay-panaghiusa sa inyong taliwala. Ayaw gayod siyag tugoti bisag gamay!’ Si Igsoong Barry nagtumong sa “dekano sa mga misyonaryo,” si Edward Skinner, nga anaa sa iyang langyawng asaynment sa India sulod sa 60 anyos, ug karon sa edad 93 nagabuhat gihapon sa tibuok-adlaw nga trabaho. Sumala kang Igsoong Skinner, ang yawi sa kalamposan ingong misyonaryo gilangkoban sa upat ka pulong: “Pagkamapaubsanon mao ang pasukaranan!”
Tapos sa maong mga pahayag, ang tsirman nagbasag ubay-ubayng telegrama nga nagpahalipay sa mga estudyante ug nagpaabot sa pag-abiabi kanila. Ang mga mensahe nadawat gikan sa Bolivia, Canada, Ecuador, Honduras, Espanya, Sweden, ug Trinidad.
Si Jack Redford, usa sa mga instruktor sa Tunghaan sa Gilead, naghisgot sa ulohang “Magpadayong Higala ni Jehova.” Misugod siya pinaagi sa pagpahayag nga dunay daghang komersiyal nga institusyon nga nagatanyag sa pagbansay aron makab-ot ang kalamposan sa negosyo pinaagi sa pagbatog mga higala ug pag-impluwensiya sa mga tawo. Ang mga estudyante, ingong umaabot nga mga misyonaryo, gitudloan usab kon unsaon sa pagbatog mga higala ug pag-impluwensiya sa mga tawo, dili tungod sa hakog nga ganansiya, hinunoa, kondili aron ang maong mga tawo mahimong mga higala sa Diyos. ‘Ang inyoha maoy kinabuhi sa pagsakripisyo sa kaugalingon,’ matud sa mamumulong. ‘Inyong gidawat nga walay bayad, ihatag ninyo nga walay bayad. Walay katagbawan o kalipay ang labaw pa kay sa magmalamposon sa pagtabang sa mga tawo nga mahimong mga higala sa Diyos. Ang pagpakighigala sa Diyos mao ang labing dakong dungog nga maangkon ni bisan kinsang linalang. Ang Santiago 2:23 nagaingong si Abraham nahimong higala ni Jehova tungod sa pagtuo sa Diyos. Siya miadto sa usa ka langyawng yuta ug wala molingi; ni kamong mga misyonaryo magalingi, kondili, hinunoa, molantaw sa unahan sa mga panalangin sa bag-ong kalibotan sa Diyos.’
Si Ulysses Glass, usa ka instruktor sa Gilead ug registrar sa tunghaan, karon naghisgot bahin sa ulohang “Ang Kataposang Leksiyon.” Siya miingon nga ang mga estudyante nakakat-on kon unsa ka layog-abot ug pagkahinagpat ang mga balaod ni Jehova. Ingong panig-ingnan, iyang gipunting ang daghang detalyeng nalangkit sa mga halad nga gihalad sa Adlaw sa Pagpasig-uli ug ang daghang hayop nga nalangkit. (Levitico, kapitulo 16) Iyang gidayeg ang mga estudyante tungod sa ilang pagpadayag sa kinasingkasing nga apresasyon ug miingong ang Salmo 145:7 nagabatbat nga maayo sa ilang tinamdan sa hunahuna: “Sa paghisgot sa kadagaya sa pagkamaayo sila moawas, ug tungod sa imong pagkamatarong sila moawit.” Sa iyang konklusyon, iyang gikutlo usab ang Proverbio 3:5-7, nga nagpasiugda nga kinahanglan sila ‘mosalig kang Jehova uban sa tibuok nilang kasingkasing.’
Si Igsoong F. W. Franz, ang 94-anyos nga presidente sa Tunghaan sa Gilead ug presidente sa Watch Tower Bible and Tract Society, mihatag sa kataposang pakigpulong sa buntag. Niana iyang giasoy ang kasaysayan sa Sosyedad sukad sa panahon sa unang presidente, si C. T. Russell, hangtod sa pagkatukod sa Tunghaan sa Gilead. Ang iyang kusganon ug madasigong pakigpulong gipabilhan kaayo sa tanan. Tapos sa iyang pakigpulong, ang 24 ka estudyante nagdawat sa ilang mga diploma uban ang pila ka gasa, ug dayon usa sa mga estudyante nagbasa sa usa ka nindot nga sulat nga nagpahayag sa apresasyon sa mga estudyante sa tanang tabang ilang nadawat gikan sa Nagamandong Lawas ug gikan usab sa pamilyang Bethel.
Tapos sa intermisyon nga mga duha ka oras, si Phil Wilcox, usa ka membro sa Komite sa Watchtower Farms, nagdumala sa pinamubong pagtuon sa leksiyon sa maong semana sa Bantayanang Torre nga niana ang mga pangutana sa pagtuon gitubag sa mga estudyante. Kana gisundan sa programa sa mga estudyante diin ilang gipasundayag ang mga kasinatiang ilang napahimuslan samtang sila nagsangyaw sa mga hapon sa Miyerkoles sa New York City. Kadto bahin sa ilang pagbansay sa Gilead. Gipasundayag usab nilang tin-aw ang nagkalainlaing sulirang ilang madahom nga maatubang inig-abot nila sa ilang langyawng mga asaynment.
Ingong haom nga konklusyon sa tibuok programa, ang mga estudyante nagpasundayag sa usa ka drama sa Bibliya nga may biste sa panahon niana sa duha ka bahin, nga nagpasiugda sa kaseryoso sa panahong atong ginapuy-an. Gihimo kini sa drama pinaagi sa pagtandi sa atong mga adlaw sa nangaging mga panahon sa paghukom. Sa 4:15 s.h., uban sa pag-awit sa awit “Pag-uswag sa Teokrasya” ug pag-ampo sa membro sa Nagamandong Lawas si Milton Henschel, ang labing makapahimuot nga programa natapos.
[Hulagway sa panid 23]
Ika-83 Migraduwar nga Klase sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubangan paingon sa likod ug ang mga ngalan gilista gikan sa wala patuo sa matag lumbay. (1) Melin, D.; Goode, M.; Ramos, M.; Chow, N.; Hermanson, A.; Dagostini, D. (2) David, E.; DiPaolo, A.; Neiman, D.; Shephard, J.; Foster, M.; Ramos, R. (3) Foster, W.; Melin, D.; Fristad, D.; Fristad, R.; White, L.; Dagostini, F. (4) Neiman, D.; Ness, S.; Shephard, D.; Goode, J.; White, K.; Hermanson, L.