Bag-ong mga Misyonaryo—Naandam Aron Molampos sa Kanataran

ANG palibot daw may kasibot, masadyaon kaayo mao ang 2,121 ka tawo nga nagtigom sa buntag sa Dominggo, Septiyembre 9, 1984, sa Queens, New York, nga Assembly Hall sa mga Saksi ni Jehova. Unsa ang okasyon? Kadto ang adlaw sa graduwasyon sa 37 ka estudyante nga mao ang ika-77 nga klase sa Watchtower Bible School of Gilead. Nganong may kaukyab man? Tungod kay ang maong mga seremonyas sa graduwasyon kanunay mohatag higayon sa mga tumatambong sa pagkabatig makapadasig nga mga pakigpulong gikan sa responsable nga mga membro sa mga trabahante sa Watchtower Society, pagkakitag makapahinam nga drama sa Bibliya ug sa ubang makapalig-ong presentasyon, ug sa pagpakig-ambit sa kalipay sa mga estudyante tungod sa ilang umaabot nga asaynment ingong misyonaryo. Walay mausa sa mamiminaw ang nahiubos.

Sa pagsugod sa mga pakigpulong sa buntag, si A. D. Schroeder, usa ka membro sa Nagamandong Lawas sa mga Saksi ni Jehova, naghinumdom sa pag-ingon, “Si Papa tig-ingon, ‘Kon may trabaho kang buhaton, kuhaa ang hustong galamiton ug unya humana ang trabaho sa hustong paagi—ayaw kanag biyai nga wala mahuman.’” Siya mipatin-aw nga ang mga estudyante sa maong panahon nagbaton na sa mga galamiton, nga naglakip sa makatabang nga mga basahon sa Sosyedad dugang pa sa unang kahibalo nga nakuha gikan sa ilang lima-ka-bulang kurso sa ministeryal nga pagbansay. Unya iyang giasoy ang mga panig-ingnan sa mabungahong mga misyonaryo si kinsa karong adlawa nagamalamposon sa ilang mga asaynment.

Si Jack Redford, usa sa mga instruktor sa Gilead, miingon: “Ang malamposong mga misyonaryo nagagamit sa ilang mga utok.” Sa pagtumong sa sugo sa Mateo 22:37 nga ‘higugmaon ang Diyos uban sa bug-os mong hunahuna,’ iyang gipakita sa unsang paagi ang mga misyonaryo makahimo niini. Ingong panig-ingnan, gipunting ni Redford ang maayong-pagkaplano nga mga panagana sa panglawas nga gihimo sa usa ka misyonaryong magtiayon sa usa ka bahin sa Aprika. Gidayeg usab niya ang usa ka karaang misyonaryo sa Chile nga migamit sa iyang salabotan sa pagsangyaw bisan pag nawad-an sa iyang pandungog. “Kamong mga estudyante nagaatubang usab sa mga hagit sa usa ka matang,” matud ni Redford. “Apan ang matag hagit mahimong puslanon kaayo, depende sa unsang paagi inyong maatubang kana.” “Gamita ang utok,” mao ang tambag ni Redford.

Ang laing instruktor sa Gilead, si U. V. Glass, samang praktikal usab sa iyang panambag. Sa pagpanig-ingon sa mga estudyante ngadto sa mga binhi diha sa hothouse, iyang gipatin-aw nga sila karon hapit nang itanom sa usa ka bag-ong dapit, apan angay nilang “huptang ang ilang mga gamot natisok diha sa teokratikanhong yuta.” Gipasidan-an niya ang mga estudyante nga dili mahimong sibuyason, o mapungtanon, kon matigom ang kalisod. Ug unya iyang gihatag ang mga sugyot kon unsaon paghupay sa mga kalisod nga hikaplagan usahay sa misyonaryong kinabuhi.

Si John E. Barr, usa ka membro sa Nagamandong Lawas, nagpahinumdom sa mga estudyante nga usa sa labing bililhong mga butang ilang dad-on ngadto sa ilang mga asaynment mao “ang kalipay kang Jehova.” (Nehemias 8:10) “Hinaot kini moawas ngadto sa mga kasingkasing sa ginatos pa,” matud niya. Si Leon Weaver mitambag sa mga estudyante nga mahimong panig-ingnan sa gugma ug pagtuo, nga nahiuyon sa 1 Timoteo 4:12. Ug si Eldor Timm midasig kanila sa pagbaton sa samang “Buot ko” nga tinamdan nga gipadayag ni Jesus sa iyang gitabangan ang katawhan.—Marcos 1:40, 41.

Ang kataposang mamumulong sa buntag mao si F. W. Franz, presidente sa Watchtower Bible School of Gilead, kinsa namulong bahin sa temang “Ugmara ang Labing Maayong Panaghigala sa Tibuok Uniberso.” Si Franz, nga misaysay nga sumala sa ilang pangunang mga kahulogan, ang Hebreohanon ug Gregong mga pulong alang sa “higala” mahubad nga “hinigugma,” mipunting nga maangkon sa mga estudyante ang tinuod nga mga higala pinaagi sa pagpakitag tiunay nga gugma alang niadtong ilang ginaalagaran diha sa ilang bag-ong mga asaynment. Apan, mipasiugda si Franz, dili gayod nila angay pasagdan ang pag-ugmad sa labing maayong panaghigala sa tanan, ang iya ni Jehova nga Diyos.

Sa pagtapos sa sesyon sa buntag, ang tsirman sa programa, si L. K. Greenlees, nagpasa sa mga diploma. Ang mamiminaw nalipay sa pagkadungog nga ang maong mga graduwado nga gikan sa 7 ka nasod ipadala ngadto sa 13 ka lainlaing nasod sa Aprika, Sentral ug Sur Amerika, Asia, Uropa ug sa kaislahan sa dagat.

Unya miabot ang programa sa hapon. Si Donald Krebs maoy nagdumala sa pagtuon sa Watchtower sa semana, nga ang mga estudyante ang mihatag sa mga komento. Dayon gipasundayag sa mga estudyante ang sunodsunod nga bibo mugbong dula nga nagbatbat sa pila ka makaiikag nga bahin sa ilang lima-ka-bulang kurso. Unya misunod ang haylait sa hapon—usa ka primera-klaseng dula sa Bibliya nga naghulagway sa mga pagsulay ug mga panalangin ni Job. Oo, ang programa sa graduwasyon tinuod nga makapadasig sa espirituwal nga kasinatian sa tanang mitambong.

Gipuhunan sa Watchtower Society ang dakong panahon ug pagbansay niining umaabot nga mga misyonaryo—apan dili ingong walay katuyoan. “Ang Tunghaang Gilead nagaandam kaninyo aron molampos,” gisultihan sa usa ka mamumulong ang klase. Sa pagkamatuod, kami masaligong ang ika-77 nga klase sa Gilead makabaton sa panalangin ni Jehova samtang ilang dawaton ang ilang bag-ong misyonaryong mga asaynment.