Mga Graduwado sa Gilead Misugod sa Pagsubay sa Magantihong Dalan sa Kinabuhi

“PAGKAMALIPAYON kini nga okasyon, ang graduwasyon sa ika-90ng klase sa Gilead!” Pinaagi nianang mga pulonga, ang tsirman, si Karl F. Klein sa Nagamandong Lawas, nagpailaila sa programa sa graduwasyon. Sa paghinumdom sa panahong nagsugod ang Watchtower Bible School of Gilead, siya midugang: “Kinsay makahunahuna, balik sa 1943, sa dihang ang unang klase sa Gilead migraduwar nga 48 ka tuig sa ulahi kita magkatigom gihapon alang sa graduwasyon sa lain pang klase​—ang ika-90?”

Bisan pa niana, niadtong Marso 3, 1991, nga usa ka igang nga adlaw nga dili sumala sa panahon sa New Jersey, kapig 4,000 ka dinapit nga bisita ug mga membro sa pamilyang Bethel nagtigom sa Jersey City Assembly Hall, sa tabok lang sa New York City, alang sa graduwasyon niining bag-ong mga misyonaryo. Una mosugod sa misyonaryong kinabuhi, ang mga graduwado magdawat ug diyutayng panamilit nga tambag niining ilang adlaw sa graduwasyon.

Gibuksan ang programa pinaagig usa ka awit. Human niadto, ang tanang nanambong dulot natandog sa dihang si Frederick W. Franz, ang 97-anyos nga presidente sa Watchtower Bible School of Gilead, mihatag sa pangbukas nga pag-ampo. Dayon, tapos sa mga pulong sa introduksiyon sa tsirman, ang mga graduwado​—ug tanang nanambong​—namati nga maikagon sa serye sa mugbo, praktikal nga mga pakigpulong.

Si Max H. Larson sa Komite sa Pabrika maoy unang namulong, bahin sa temang “Mga Isigkamagbubuhat ni Jehova.” Tapos sa pag-awhag sa pagtagad sa arka sa kaluwasan nga gitukod ni Noe ug sa iyang pamilya, siya miingon: ‘Karong adlawa si Jehova nagatigom sa tibuok-kalibotang pamilya sa milyonmilyong sakop, ug maoy iyang katuyoan ang pagpalabang niining dakong pamilya sa dakong kasakitan.’ Sa unsang paagi? Aw, pinaagi sa modernong-adlawng arka​—ang espirituwal nga paraiso! ‘Kamo,’ gipahinumdoman niya ang mga graduwado, ‘mangadto sa nagkalainlaing mga bahin sa yuta, diin kamo mahimong mga isigkamagbubuhat ni Jehova sa pagtukod sa modernong-adlawng arka.’ Sa pag-andam kanila alang sa kon unsay anaa sa unahan, siya miingon: ‘Sa inyong bahin kinahanglanon ang paghago. Kinahanglanon unya ang pagpailob. Inyong mahibalag ang mga kababagan. Dinha ninyo kinahanglanon ang mga kahanas nga gihatag kaninyo sa inyong pagtungha.’

Si Daniel Sydlik, usa ka membro sa Nagamandong Lawas, bag-o pang nakaduaw sa karaang mga misyonaryo sa Hapon ug sa Costa Rica. Sa paghan-ay sa temang “Ang Inyoha Maoy Magantihong Dalan sa Kinabuhi,” gipaambit niya ang pipila sa makatabang nga mga sugyot nga iyang nakuha gikan sa maong malamposong mga misyonaryo. Usa ka igsoong babaye, siya misaysay, nagpasa sa pila ka tambag nga gihatag kaniya sa iyang inahan: ‘Mahala ang pagsangyaw sa kanataran. Makighigala sa mga tawo. Ipaambit ang imong kinabuhi sa uban, ug magkahulogan kanag kalipay alang kanimo.’ Ang laing igsoong babaye miingon: ‘Latas sa katuigan, among napabilhan nga kon dili kita magdahom ug daghan kaayo gikan sa uban, kita dili dali nga mahiubos. Ang bisan unsang buhat nga maluluton ug pagkamahunahunaon nga atong mahibalag dako kaayo unyag kahulogan alang kanato.’ Ang pagpadapat nianang praktikal nga tambag pihong motabang sa mga graduwado nga mahimong malamposong mga misyonaryo mismo.

“Magbatog hataas-nga-pailob alang sa tanan,” nagaingon ang 1 Tesalonica 5:14. Si Leon Weaver sa Komite sa Departamento sa Pag-alagad mikomento bahin niining tekstoha samtang siya namulong sa temang “Magmapailobon sa Tanan Ninyong mga Kalihokan.” Kinsay naapil sa “tanan” nga alang kanila kinahanglang kita magbatog pailob? Mitubag ang mamumulong: ‘Kadtong imong mahibalag sa pagsangyaw sa kanataran. Ang mga igsoong lalaki ug mga babaye diha sa imong bag-ong kongregasyon. Imong kaubang mga misyonaryo. Kadtong anaa sa sangang-buhatan. Imong kapikas. Imong Kaugalingon.’ Nganong magpailob sa tanan natong mga kalihokan? ‘Mga igsoong lalaki ug mga babaye,’ misaysay ang mamumulong, ‘ang pailob makapamenos sa kalisdanan ug kabalaka. Ang pailob magpausbaw sa pakigdait. Ang pailob magpabuhi sa paglaom. Ang pailob motabang nato sa paghupot sa atong kalipay sa pag-alagad.’

Si Albert D. Schroeder, usa ka membro sa Nagamandong Lawas ug orihinal nga registrar sa Tunghaang Gilead, maoy sunod namulong. Sa pagpamulong bahin sa temang “Magpadayon sa Pagsunod sa Inyong Modelo​—Si Jesu-Kristo,” iyang gibase ang iyang mga komento sa Filipos kapitulo 2. “Batoni ninyo kining tinamdan sa kaisipan [“Kini inyong hunahunaon,” potnot] nga diha usab kang Kristo Jesus,” nagaingon ang bersikulo 5. ‘Kini nagpaila,’ misaysay ang mamumulong, ‘nga kinahanglang kita magbatog timbang nga panghunahuna, maingon nga si Jesus mismo nagbatog timbang nga panghunahuna.’ Sugod sa bersikulo 6, sunod gihimo niya ang makaiikag nga pag-analisar, nga nagpakita nga si Pablo naghatag una sa mga ebidensiya nga si Jesus nagbaton sa timbang nga panghunahuna (mga bersikulo 6-8) ug dayon naglaraw sa mga paagi diin si Jehova nagganti kaniya tungod sa iyang masinugtanong dalan (bersikulo 9-11). ‘Kini bahin sa inyong pribilehiyo,’ mihinapos siya, ‘nga magwali sa Ginoong Jesu-Kristo, nga magtabang sa uban sa pagbaton sa samang tinamdan sa kaisipan nga iyang nabatonan.’

Unsa ang panamilit nga mga pulong sa mga instruktor sa tunghaan alang sa ilang mga estudyante? Si Jack D. Redford namulong bahin sa temang “Ang Katakos sa Paghunahuna Manalipod Kaninyo.” (Proverbio 2:10, 11) ‘Sa imong paggawas karon,’ mipatin-aw siya, ‘ang imong kalipay dili mag-agad sa kon kinsa ka o kon unsay imong nabatonan o bisan sa kamatuoran nga ikaw usa ka graduwado sa Gilead. Ang imong kalipay mag-agad sa kon unsaon nimo paghunahuna. Kon gamiton nimo ang imong katakos sa paghunahuna ug ipadapat ang imong kahibalo, ikaw magmalipayon.’ Sa pagpakita sa kahinungdanon sa katakos sa paghunahuna, siya mipatin-aw: ‘Ang kalainan tali sa matarong nga buhat ug sa daotang buhat mao ang hunahuna. Kon unsay imong hunahunaon magtino kon unsay imong buhaton.’ Si J. D. Redford mihinapos pinaagi niining mga pulong sa pagdasig sa mga estudyante: ‘Adunay daghang intelihente kaayong mga tawo sa kalibotan nga dili maayong mga tighunahuna, ug adunay daghan kaayong mga tawo nga may kasarangang intelihensiya nga nahimong mahanasong mga tighunahuna. Busa batoni ang maong kahanas. Ihukom nga gamiton ang imong kaisipan. Gamita ang imong kahibalo. Sagubanga ang mga suliran. Makig-uyon sa mga tawo. Dawata ang awtoridad. Magmabungahon sa imong buluhaton. Lahutay sa imong asaynment.’

Si Ulysses V. Glass, ang registrar sa tunghaan, mipili sa temang “Si Jehova Nagasangga sa Atong Kamot,” nga gibase sa Salmo 37:23, 24. ‘Pagadayegon ko kining klaseha,” siya miingon, ‘sa ilang kaikag nga makakat-on.’ Gipahinumdoman niya sila sa pipila sa mga tabang nga gitagana ni Jehova aron sa pagpaluyo kanila​—Pulong sa Diyos, ang matinumanon ug maalamong ulipon ubos sa pagdumala ni Jesus sa paghatag kahulogan ug pagsabot sa Kasulatan, nagkalainlaing mga basahon, mga tigom, ug mga kombensiyon. ‘Ang mga tabang nga inyong gigamit sa inyong mga pagtuon,’ siya nagpadayon, ‘maoy sama sa espirituwal nga sungkod ug baras. Gikinahanglan nato kini sila alang sa atong espirituwal nga mga sangga, ug kini sila makapaarang usab nato sa pagsulting may pagbulot-an sa pagpasa sa Pulong sa Diyos ngadto sa uban.’ Sa pagtapos kini mao ang iyang mga pulong sa tambag alang sa mga estudyante: ‘Kon ang inyong kasingkasing napuno sa gugma alang sa mga tawo, mosanong ang mga kasingkasing nga maminatud-on. Kamo magmalamposon sa inyong ministeryo, ug kamo mahibalo nga si Jehova nagasangga sa inyong kamot.’

Ang kataposang mamumulong sa programa sa buntag mao si Carey W. Barber sa Nagamandong Lawas, kinsa mipili sa temang “Sumulod Kamo Agi sa Pultahan nga Masigpit.” Sa pagkomento sa Lucas 13:23, 24, siya miingon: ‘Daghan ang gusto sa mga panalangin sa kinabuhi, apan diyutay ra kaayo ang andam maghago sa ilang kaugalingon sa igo aron makabaton niana kanila.’ Komosta man kita? ‘Maayong isukna nato sa atong kaugalingon, “Unsay kahulogan kanako sa personal kining hulagway sa pultahan nga masigpit?”’ Kadtong mapakyas sa pag-agi sa pultahan nga masigpit mapakyas, dili tungod kay kini imposi­ble, kondili tungod kay sila dili andam maghago sa ilang kaugalingon. ‘Si Jehova wala mangayog sobra kaayo gikan kanato,’ mipatin-aw ang mamumulong. ‘Sa tabang ni Jehova,’ siya mitapos, ‘hinaot kitang tanan malipayong maghago sa igo aron makaagi sa pultahan nga masigpit ngadto sa bag-ong kalibotan nga may kinabuhing walay kataposan, pakigdait, kangaya, ug kalipay, sa walay-kataposang himaya ni Jehova!’

Sa pagkatapos sa maong mga pamulong, gipahayag sa tsirman ang mga pangomosta nga nadawat gikan sa nagkalainlaing mga bahin sa yuta. Ang panahon miabot na aron ang mga graduwado makadawat sa ilang mga diploma. Ang mga estudyante naggikan sa unom ka nasod​—Canada, Pinlandia, Alemanya, Gran Britanya, Switzerland, ug Tinipong Bansa. Hinuon, ang ilang mga asaynment magdala kanila ngadto sa kayutaang sama sa Argentina, Benin, Bolivia, Dominican Republic, Papua New Guinea, Peru, St. Lucia, ug Taiwan. Ug unsay gibati sa mga graduwado sa adlaw sa ilang graduwasyon? Sa usa ka makapatandog-sa-balatian nga sulat nga gipatumong ngadto sa Nagamandong Lawas ug sa pamilyang Bethel, sila miingon sa bahin: “Masaligon kami sa pagpaluyo sa Nagamandong Lawas, sa pamilyang Bethel, ug sa tibuok nga organisasyon ni Jehova. Samtang atubangon namo ang mga pagsulay sa unahan, ang maong pagpaluyo maoy butang among pagamahalon. Tungod niini kami mapasalamaton gayod.”

Human sa intermisyon, ang programa sa hapon misugod pinaagig pinamubong Pagtuon sa Watchtower, nga gidumala ni Karl A. Adams. Human niadto, gidula sa mga estudyante ang tinuod-kinabuhing mga kasinatian sa pagpuntiriya sa kasingkasing sa pagtudlo sa Pulong sa Diyos. Sa kataposan, ang tanang nanambong, apil ang mga graduwado sa ika-90ng klase, nakapahimulos sa tukma-panahong drama nga nag-ulohang Likayi ang mga Kabalaka sa Kinabuhi, nga gipasundayag sa lokal nga mga magmamantala.

Ang tsirman, si Karl Klein, nagpahayag sa ngalan sa tanan sa miingon siya diha sa iyang pangataposang mga komento: “Sa pagkamatuod maayo gayod nga kita ania niining ikatulong adlaw sa Marso 1991!” Ang makapalingaw nga programa dayon natapos pinaagi sa usa ka paniklop nga awit, nga gisundan sa usa ka pag-ampo ni Harold J. Dies.

[Kahon sa panid 27]

Mga Estadistika sa Klase

Kanasorang gihawasan: 6

Kanasoran nga giasaynan: 10

Gidaghanon sa mga estudyante: 24

Aberids nga edad: 31.2

Aberids nga katuigan sa kamatuoran: 15

Aberids nga katuigan sa bug-os-panahong ministeryo: 11

[Hulagway sa panid 26]

Ika-90ng Migraduwar nga Klase sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubangan paingon sa likod ug ang mga ngalan gilista gikan sa wala patuo sa matag lumbay. (1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio, A.; Nizan, D. (4) Miller, L.; Noack, J.; Hair, L.; Kleeman, W.; Skogen, D.; Diehl, S.; Nutter, W.