Mga Graduwado sa Gilead Giawhag sa Pag-ugmad sa mga Kahanas sa Maayong Pakigkomunikar

SA Dominggo, Marso 4, 1990, napuno sa kapig 4,100 ka tawo ang Jersey City Assembly Hall of Jehovah’s Witnesses alang sa programa sa graduwasyon sa ika-88ng klase sa Watchtower Bible School of Gilead. Ang 24 ka graduwado naggikan sa 6 ka nasod ug karon ginapadala ngadto sa total nga 13 ka nasod.

Nagsugod ang programa sa alas 10:00 s.b. Human sa usa ka awit, si George Gangas, nga karon kapin nag 90 anyos ug usa ka membro sa Nagamandong Lawas, ang misugod uban sa tim-os nga pag-ampo kang Jehova. Human niadto, ang tsirman, si C. W. Barber, membro usab sa Nagamandong Lawas ug mismo graduwado sa ika-26 nga klase sa Gilead, naghisgot sa tuling kausaban sa talan-awon sa kalibotan. Siya mitapos sa pag-ingon: “Sukad masukad karon adunay labi pang kahibulongang kahigayonan sa pagkahimong mga saksi sa pagkasupremo ni Jehova ug sa iyang pagkamatarong.” Unya iyang gipailaila ang lainlaing mga mamumulong sa programa sa buntag.

Si Vernon Wisegarber, usa ka membro sa Komite sa Pabrika sa Brooklyn, mipili sa temang “Magmahanas sa Inyong Buluhaton.” Sa paggamit sa ilustrasyon sa usa ka panday sa puthaw sa usa ka balangay nga mosalsal ug lig-ong kadena nga, kon itaod sa usa ka angkla, magluwas sa kinabuhi sa tanang naa sa barko panahon sa usa ka bagyo, gitandi niya ang mga graduwado sa Gilead sa panday sa puthaw. Pinaagi sa pagtudlo sa mga tawo sa Bibliya, sila magatabang nila sa paggama sa nagaluwas-kinabuhing kadena sa diyosnong mga hiyas, pinaagi sa paggamit sa mga kahanas nga ilang naugmad sa ilang pagbansay sa Gilead. Gidasig niya ang mga graduwado nga ipadayon ang pagpauswag sa ilang mga kahanas sa pagtudlo ug sa pagbarog atubangan sa kinalabwan sa tanang mga Hari ingong “hanas nga mga magbubuhat.”

Sunod si John Barr, usa ka membro sa Nagamandong Lawas, namulong bahin sa topikong “Tilawi ug Tan-awa nga si Jehova Maayo.” Ang iyang mga komento gipasukad sa Salmo 34:8, nga nagaingon: “Tilawi ug tan-awa nga si Jehova maayo, Oh kamong katawhan; malipayon ang tawong kusgan nga modangop kaniya.” Iyang gimaymayan sila: “Tilawi ang tanan diha sa inyong misyonaryong asaynment. Sulayi ang tanan. Ayaw kamo kahadlok niana. Unya makasinati kamo sa pagkamaayo ni Jehova sa paagi nga wala ninyo sukad masinati. Ayaw gayod kamo pagpilipili. Ayaw gayod pag-ingon, ‘Dili ko moangay niini.’ Tilawi ninyo.”

Si Charles Woody, usa ka membro sa Komite sa Departamento sa Pag-alagad sa Brooklyn, midiskurso bahin sa iyang piniling ulohan, “Paghupot sa Timbang nga Hunahuna sa Atong Kaugalingon.” Siya miingon: “Malipay kita nga mahauban niadtong may timbang nga hunahuna sa ilang kaugalingon, si kinsa dili kanunay magpatuman sa ilang gusto, nga daling modayeg ug mopalig-on sa uban, ug si kinsa, bisan pag may kahibalo, dili mopabati sa uban nga sila wala magbaton niana.” Siya miingon sa dugang: “Ingong mga misyonaryo buot ninyong magdani sa mga tawo sa kamatuoran, dili magbabag nila. Ang inyong mapaubsanong pamatasan mahimong bililhon kaayo sa pagtabang sa paglampos niini.”

Si Lyman Swingle, usa ka membro sa Nagamandong Lawas, sunod midiskurso bahin sa temang “Ang Sunod nga mga Kapitulo, Unsay Isugilon Niana Kanato?” Misugod siya sa pag-ingon: “Karong adlawa gisugdan ninyo ang usa ka bag-ong kapitulo sa inyong kinabuhi. Unsay inyong isulat sa maong mga kapitulo sukad karon hangtod sa umaabot?” Iyang gipahinumdoman sila: “Ang tanan nga inyong pagabuhaton angay magdalag kadungganan ug himaya kang Jehova,” ug siya midugang: “Paneguroa ninyo nga ang inyong mga desisyon gipasukad sa Pulong sa Diyos. Hinumdomi ang Proverbio 3:7, nga nagaingon: ‘Ayaw kamo pagmaalamon sa inyong kaugalingong mga mata.’ Pasagding kamo makaplagang matinumanon sa pagtuman sa inyong asaynment.” Mitapos siya sa pag-ingon: “Masaligon kami nga dili gayod ninyo matapos ang pagsulat sa kasaysayan sa inyong kinabuhi, nga kamo mabuhing walay kataposan.”

Sunod, si Jack Redford, usa sa mga instruktor sa tunghaan, mitambag sa mga graduwado: “Mahimong Buhing mga Halad.” Siya misugod nga miingon: “Ang misyonaryong pag-alagad maoy kinabuhing masakripisyohon. . . . Among gimahal kamo tungod sa inyong nagasakripisyo-sa-kaugalingong espiritu.” Sa pagkutlo gikan sa Filipos 2:17, diin si apostol Pablo miingon nga siya gikabubo sama sa usa ka halad-nga-ilimnon, nga nagkahulogang andam siyang mogamit sa iyang kaugalingon ingong buhing halad, siya miingon: “Apan sa unsang paagi ang mga misyonaryo kasagaran nahisamag mga halad-nga-ilimnon?” Dayon miasoy siyag duha ka kasinatian bahin sa mga misyonaryo nga migamit sa ilang kaugalingon nga labaw sa gikinahanglan. Ang usa migamag 16,000 ka tisa pinaagi sa iyang mga kamot mismo ug nagtukod sa unang Kingdom Hall sa iyang naasayn nga nasod. Ang laing kasinatian maoy kabahin sa usa ka igsoong babaye nga mikuyog sa iyang bana ngadto sa lasang, diin ang mga kahimtang sa panimuyo kinaraan kaayo. Ang lokal nga mga igsoong babaye tanan miapresyar kaniya kay giila nila nga iyang gibubo ang iyang kaugalingon ingong ‘buhing halad.’ Apan unya ang mamumulong nagpahinumdom sa mga estudyante nga ang halad walay bili kon dili ubanan sa pagkamasinugtanon. Sa paggamit sa asoy ni Haring Saul ug sa mga Amalekanhon, siya mitambag: “Hinumdomi kanunay nga ang pagsugot labaw pa kay sa halad. Ayaw gayod sulayi ang pakighangyoay kang Jehova. Kanunay buhata kon unsay iyang isulti kanimo nga pagabuhaton.”

Unya ang tsirman nagpailaila sa laing instruktor sa tunghaan, si Ulysses Glass. Si Brader Glass misugod nga miingon: “Ang ika-88ng klase niadto ug karon usa ka malipayong klase. Malipayon usab ang ubang mga klase. Nan, nganong ang inyong kalipay nahilain man?” Gipakita niya nga ang kalipay “dili usa ka tumong kondili resulta sa matarong nga mga buhat. Ang paagi sa pagkaabot didto maoy nagapatungha sa ganti.” Gikutlo niya ang usa ka magsusulat kansang kinabuhi nausab sa pagkakita sa prase: “Ang kalamposan maoy usa ka pagbiyahe, dili dulnganan.” Nanumpa ang magsusulat nga mohunong siya sa pagtulotimbang sa kalipay pinasukad sa pagkaabot sa mga dulnganan inay sa pagtan-aw hinuon sa iyang tibuok nga kinabuhi ingong nagapadayong biyahe. “Walay dalan paingon sa kalipay,” matud niya. “Ang kalipay mao ang dalan.” Unya mikomento si Brader Glass nga ang maong klase nakasakop sa diwa sa maong mga pulong. Mitapos siya sa mga pulong gikan sa ika-84ng Salmo ug miingon: “Magpadayon kamo sa paglakaw sa mga dapit nga maayong pagkatubig. Bisan unsang mga suliran ang tingali mahibalag ninyo, hinaot ang kalipay nga iyaha niadtong nahigugma ug nahadlok kang Jehova magpadayong anaa kaninyo.”

Unya miabot ang pangunang diskurso sa buntag, nga gipahayag sa laing membro sa Nagamandong Lawas, si Karl Klein, kinsa mipili sa temang “Pag-ugmad sa Kristohanong Komunikasyon.” Misugod siya pinaagi sa paghinumdom sa tanan nga si Jehova mao ang kinalabwan sa tanang tigkomunikar. Ang iyang bugtong nga Anak, ang Logos, gigamit ingong Pangunang Tigpamaba ni Jehova, ug iyang gipahayag ang kabubut-on ug mga instruksiyon sa Diyos ngadto sa yutan-ong kalalangan. Sa dinhi si Jesus sa yuta, ang mga panon natingala sa iyang paagi sa pagtudlo. Wala pa sukad sila makabati sa usa ka tawo nga nanulti sama kaniya. Sa Mateo 28:19, 20, gidasig ni Jesus ang iyang mga tinun-an nga mahimong maayong mga tigkomunikar pinaagi sa paglakaw ngadto sa kalibotan, nga magtudlo sa iyang mga sugo ngadto sa uban ug maghimo kanilang mga tinun-an usab.

Unya, sa pagpakigsulting direkta ngadto sa umaabot nga mga misyonaryo, si Brader Klein miingon nga adunay upat ka natad nga pagakabalak-an sa mga misyonaryo sa pag-ugmad sa mga kahanas sa maayong komunikasyon: tali sa bana ug asawa, uban sa uban pa diha sa misyonaryong balay, uban niadtong anaa sa sangang-buhatan diin sila giasayn, ug niadtong ilang mahibalag sa pag-alagad sa kanataran. “Mosugod ka sa pagkomunikar sa dili pa nimo ablihan ang imong baba,” matud ni Brader Klein. “Ang imong barog ug pamostura nagapasag mga impresyon ngadto sa tagbalay.” Unya mihatag siyag ubay-ubayng ilustrasyon sa pagpamatuod sa iyang punto ug mitapos uban niining mga tambaga: “Magmapaubsanon sa hunahuna. Hupting bukas ang mga linya sa komunikasyon. Maningkamot nga mahimong mas maayong tigkomunikar.”

Human sa pagbasa sa mga pangomosta, ang mga diploma sa merito gitunol sa tsirman ngadto sa matag usa sa mga graduwado. Dayon ang klase mipresentar sa usa ka resolusyon nga gitumong sa Nagamandong Lawas ug sa pamilyang Bethel, nga gibasa ni Paul Angerville sa Guadeloupe.

Ang sesyon sa hapon nagsugod sa usa ka Pagtuon sa Bantayanang Torre. Tapos niadto, ang mga estudyante nagpasundayag sa usa ka programa nga naghatag sa mamiminaw ug higayon nga may makita sa panghitabo sa ilang klasehanan, nga makita ang ilang dili-pormal nga mga panagtapok sulod sa ilang mga kuwarto, ug sa pagkabati sa daghan sa ilang mga kasinatian sa pagsangyaw sa kanataran sukad sa pag-abot sa Gilead lima ka bulan nga miagi. Sa kataposan, dihay nindot nga drama nga may temang Pagbuhat Kon Unsay Matarong sa Panan-aw ni Jehova. Ang drama gipasundayag sa mga magmamantala gikan sa Lyndhurst, New Jersey, nga kongregasyon. Ang adlaw natapos uban sa panapos nga awit, nga gisundan sa pag-ampo ni Fred Franz, ang 96-anyos nga presidente sa Sosyedad.

[Kahon sa panid 27]

ESTADISTIKA SA KLASE:

Gidaghanon sa mga nasod nga gihawasan: 6

Gidaghanon sa mga nasod nga giasaynan: 13

Gidaghanon sa ulitawong mga igsoon: 2

Gidaghanon sa magtiayon: 11

Gidaghanon sa mga estudyante: 24

Aberids nga edad: 32.7

Aberids nga katuigan sa kamatuoran: 14

Aberids nga katuigan sa bug-os-panahong ministeryo: 9

[Hulagway sa panid 26]

Ika-88 nga Klaseng Migraduwar sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubang paingon sa likod ug ang mga ngalan gilista gikan sa wala patuo diha sa matag lumbay (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.