Mga Problemang Gisagubang sa mga Babaye

ANG gisulti sa dalagita nagpadayag sa mapait nga kamatuoran—sa tibuok kalibotan, ang mga babaye nagsagubag kapintasan ug diskriminasyon sa tibuok nilang kinabuhi. Tagda kini:

• Diskriminasyon. Sa Asia, kadaghanan sa ginikanan mas gustog anak nga lalaki. Sumala sa 2011 nga report sa UN, nianang dapita halos 134 ka milyong babaye ang nakalas tungod sa aborsiyon, pagpatay samtang masuso pa, ug pagpasagad.

• Edukasyon. Sa tibuok kalibotan, mga 70 porsiyento niadtong wala makaabot ug upat ka tuig sa pag-eskuyla maoy mga babaye.

• Seksuwal nga pagpanghasi. Kapig 2.6 ka bilyong babaye ang nagpuyo sa mga nasod diin ang pagpanglugos sa bana sa iyang asawa wala gihapon isipang krimen.

• Panglawas. Sa kabos nga mga nasod, halos matag duha ka minuto, usa ka babaye ang mamatay sa komplikasyon sa pagmabdos o sa pagpanganak tungod sa kawalay pangunang medikal nga pag-atiman.

• Katungod nga manag-iyag propidad. Bisag ang mga babaye mao ang nakapatungha sa kapig katunga sa mga abot sa tibuok kalibotan, sa daghang nasod wala silay legal nga katungod nga manag-iyag propidad o makapanunod ug yuta.

Nganong gihikawan man ang mga babaye sa maong mga katungod? Ang ubang kultura nagsunod sa ilang relihiyon ug tradisyon nga nagpalambo o nagpakamatarong pa gani sa pag-abuso ug pagdagmal sa mga babaye. Ang usa ka mantalaan sa France nagkutlo sa abogadang taga-India nga si Chandra Rami Chopra, kinsa miingon: “Ang tanang balaod sa relihiyon may panagsama: Gipaluyohan niini ang diskriminasyon batok sa mga babaye.”

Mao ba sab nay imong panglantaw? Naghunahuna ka bang gipakamenos sa Bibliya ang mga babaye, sama sa gihimo sa ubang relihiyosong basahon? Alang sa uban, may mabasa sa Bibliya nga daw nagpamatuod niana. Apan unsa man gyoy panglantaw sa Diyos labot sa mga babaye? Bisag sensitibo tingali kini nga isyu, ang matinud-anon ug bug-os nga pagsusi sa Bibliya motabang nato nga makaplagan ang tubag.