Pangutana 1: May Katuyoan ba ang Akong Kinabuhi?

SI Rosalind, nga nagdako sa England, matinguhaon kaayo sa edukasyon. Gusto sab niyang motabang sa mga tawo. Human mograduwar, nakabaton siyag dungganong karera nga nalangkit sa pagtabang sa mga walay balay, ug nagtabang usab siya niadtong may diperensiya sa pisikal ug sa pagkat-on. Bisag maayog trabaho ug haruhayg kinabuhi, siya miingon, “Dugay na kong naghunahuna, ‘Nganong ania ta dinhi?’ ug ‘Unsay katuyoan sa kinabuhi?’”

Nganong makapangutana niana?

Ang mga tawo dili sama sa walay-kabuot nga mga mananap. Kita may katakos sa pagkat-on gikan sa nangagi, pagplano sa umaabot, ug sa pagpangitag katuyoan sa atong kinabuhi.

Unsay tubag sa pipila bahin niana?

Daghan ang naghunahuna nga ang pangunang katuyoan sa kinabuhi mao ang pagbatog bahandi o kadungganan ug sa ingon magmalipayon.

Unsay gipasabot sa maong tubag?

Kitay nagtakda sa atong mga prayoridad. Mas hinungdanon ang atong mga tinguha kay sa kabubut-on sa Diyos.

Unsay gitudlo sa Bibliya?

Si Haring Solomon nakabatog daghan kaayong bahandi ug nangagpas ug kalipayan apan iyang nakita nga wala kadtoy dumalayong katuyoan. Iyang gipaila kon unsay makahatag ug tinuod nga katuyoan sa kinabuhi: “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Ecclesiastes 12:13) Unsay nalangkit sa pagtuman sa mga sugo sa Diyos?

Lakip sa katuyoan sa Diyos kanato mao nga kita magmalipayon. Si Solomon misulat: “Wala nay laing mas maayo alang sa tawo kay sa mokaon siya ug moinom ug himoon niya ang iyang kalag nga makapahimulos ug maayo sa iyang kahago. Kini nakita ko usab gayod, nga kini gikan sa kamot sa matuod nga Diyos.”—Ecclesiastes 2:24.

Buot usab sa Diyos nga atong mahalon ug atimanon ang atong pamilya. Matikdi ang simple ug praktikal nga giya alang sa matag membro sa pamilya.

“Ang mga bana angay nga maghigugma sa ilang mga asawa sama sa ilang kaugalingong mga lawas.”—Efeso 5:28.
“Ang asawa angay nga adunay halawom nga pagtahod sa iyang bana.”—Efeso 5:33.
“Mga anak, magmasinugtanon sa inyong mga ginikanan.”—Efeso 6:1.

Kon atong ipadapat ang maong mga prinsipyo, kita mahimong malipayon ug kontento. Apan, ang labing hinungdanon nga atong mahimo mao ang pagkat-on kutob sa atong maarangan bahin sa atong Maglalalang ug ang pagpakigsuod kaniya ingong atong Higala. Gani, ang Bibliya nagdapit nato sa ‘pagduol sa Diyos.’ Dayon kini naghatag ug talagsaong saad: “Siya moduol kaninyo.” (Santiago 4:8) Kon dawaton nimo kini nga pagdapit, makabatog tinuod nga katuyoan ang imong kinabuhi.

Si Rosalind, nga gihisgotan sa sinugdan, mibati na karon nga iyang nakaplagan ang katuyoan sa kinabuhi. Sa panid 10 niining magasina, imong mabasa kon unsay nakapausab sa iyang tinamdan. Imong mabasa kon unsay nakapausab sa iyang tinamdan sa artikulo nga nag-ulohang “Ang Bibliya Makabag-o sa Kinabuhi”.

Aron makakat-og dugang kon unsaon nimo pagkinabuhi nga makapalipay sa Diyos, tan-awa ang kapitulo 12 sa librong Unsay Tinuod nga Gitudlo sa Bibliya? Ma-download kini sa www.jw.org/ceb

Unsay Giingon ni Jesus Bahin sa Katuyoan sa Kinabuhi?

Si Jesus wala magduhaduha sa katuyoan sa iyang kinabuhi. Siya miingon: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” (Juan 18:37) Gigugol ni Jesus ang iyang kinabuhi sa pagtudlo sa mga tawo sa kamatuoran bahin sa Diyos ug sa Iyang katuyoan.

Ang atong kinabuhi makabatog tinuod nga kahulogan kon atong sundon ang panig-ingnan ni Jesus. Gani, si Jesus nagdapit nato sa pagkat-on gikan kaniya. (Mateo 11:29) Tagda ang duha ka paagi nga ato kanang mahimo.

Si Jesus nagtudlo nga aron kita magmalipayon, kinahanglang ‘magmahunahunaon kita sa atong espirituwal nga panginahanglan.’ (Mateo 5:3) Atong matagbaw ang atong espirituwal nga panginahanglan kon kita mokuhag kahibalo bahin sa “bugtong matuod nga Diyos, ug sa usa nga [iyang] gipadala, si Jesu-Kristo.”—Juan 17:3.

Si Jesus nagsugo sa iyang mga sumusunod nga itudlo sa uban ang ilang nakat-onan. Siya miingon: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

Kadtong nagtagbaw sa ilang espirituwal nga panginahanglan pinaagi sa pagtuon sa Bibliya ug pagpadapat sa ilang nakat-onan mibati nga nahimong mas maayo ang ilang kinabuhi. Sila mas kombinsido nga ang ilang kinabuhi may tinuod nga katuyoan sa dihang mitabang sila sa uban nga makakat-on bahin sa Diyos.