PANGUNANG TOPIKO | GINGHARIAN SA DIYOS—UNSAY HIMOON NIINI ALANG KANIMO?

Gingharian sa Diyos—Unsay Himoon Niini Alang Kanimo?

Tingali nasabtan nimo sa nag-unang mga artikulo nga importante kaayo sa mga Saksi ni Jehova ang Gingharian sa Diyos. Ug lagmit nainteres ka sa umaabot nga mga panalangin sa Gingharian sa Diyos. Apan tingali naghunahuna sab ka kon tinuod ba gyod ang maong mga saad.

Makataronganon lang nga dili dayon ka motuo sa imong madungog. (Proverbio 14:15) Gani, ingon sab niana ang mga taga-Bereaa kaniadto. Pagkadungog nila sa maayong balita bahin sa Gingharian, wala dayon sila motuo niini bisan pag giganahan sila sa ilang nadungog. Kondili gisusi gyod nila sa Kasulatan “kon tinuod ba kining mga butanga.” (Buhat 17:11) Sa ato pa, gitandi sa mga taga-Berea ang maayong balita nga ilang nadungog sa kon unsay giingon sa Bibliya. Wala madugay, nakombinsir sila nga gikan gyod sa Pulong sa Diyos ang maayong balita.

Gidasig ka sa mga Saksi ni Jehova nga sundogon ang mga taga-Berea. Pinaagi sa among ginatanyag nga libreng pagtuon sa Bibliya, imong masusi kon gikan ba gyod sa Bibliya ang gitudlo sa mga Saksi ni Jehova bahin sa Gingharian sa Diyos.

Gawas nga makakat-on ka bahin sa Gingharian sa Diyos, masayran sab nimo ang tubag sa importanteng mga pangutana.

Diin kita gikan?
Unsay katuyoan sa kinabuhi?
Nganong gitugotan sa Diyos ang pag-antos?
Unsay mahitabo nato dihang kita mamatay?
Mahanaw ba ang yuta?
Unsay sekreto aron magmalipayon ang pamilya?

Labaw sa tanan, ang pagtuon sa Bibliya makapasuod kanimo sa Diyos. (Santiago 4:8) Samtang magkasuod ka sa Diyos, mas makombinsir ka nga tinuod gyod ang mga kaayohan nga ikahatag sa Gingharian sa Diyos kanimo—dili lang karon kondili hangtod sa walay kataposan. Si Jesus mismo miampo sa iyang Amahan: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Kini nga libro puwedeng gamiton sa mga Saksi ni Jehova sa pagtuon ug Bibliya uban kanimo.

Kon gusto kag libreng pagtuon sa Bibliya, duol sa mga Saksi ni Jehova o pil-api ang porma sa www.jw.org/ceb. (I-click ang HANGYO UG PAGTUON SA BIBLIYA diha sa home page)

a Ang Berea maoy usa ka siyudad sa karaang Macedonia.

Importante Niya ang Gingharian sa Diyos

Di pa dugay, si Folake, usa ka diyes-anyos nga babayeng estudyante gipasulat ug essay sa ulohang “Ang Gusto Kaayo Nako.” Gisulat ni Folake kon nganong gusto kaayo niyang isulti sa uban ang bahin sa Gingharian sa Diyos.

“Ang Gingharian sa Diyos maoy tinuod nga gobyerno,” si Folake misulat. “Pero dili ni makita—bisag mag-antiyohos pa ka!”

Gisulat ni Folake ang mga panalangin sa Gingharian nga gusto kaayo niya, apil ang mga problema nga sulbaron sa Gingharian: “Maguol kong makakitag mga tawong matulog sa dalan” ug “mga bata nga mangamatay tungod sa gutom.” Siya midugang, “pero malipay na pod ko inigbasa nako sa Isaias 65:21.” Kini dunay saad para niadtong mopuyo ilalom sa pagmando sa Gingharian sa Diyos: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga.”

Matod ni Folake nga nagpaabot sab siya sa panahong wad-on na sa Diyos ang tanang sakit pinaagi sa Gingharian. Gisulat niya ang giingon sa Pinadayag 21:4: “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.” Gitapos niya ang essay sa pag-ingon pag-usab nga ang pagpakig-estorya bahin kang Jehova ug sa Iyang Gingharian ang gusto kaayo niya. Klaro nga importante gyod niining bataa ang Gingharian sa Diyos!