TUBAG SA MGA PANGUTANA BAHIN SA BIBLIYA
Mahitabo kaha nga usa na lay gobyerno sa tibuok kalibotan?
Sa unsang paagi ang usa ka gobyerno makapahiusa sa tanang tawo sa yuta? Isaias 32:1, 17; 54:13
Hunahunaa ang mga kaayohan kon usa na lay gobyerno sa kalibotan. Daghan karon ang nag-antos tungod sa grabeng kalisod, samtang ang uban dato kaayo. Apan dunay gobyerno nga makatagana sa tanang panginahanglan sa tawo. Sa imong hunahuna, makapatungha kaha ang tawo nianang matanga sa gobyerno?—Basaha ang Jeremias 10:23.
Latas sa katuigan, ang mga gobyerno wala makatagana sa tanang panginahanglan sa ilang mga sakop, ilabina sa mga pobre. Malupigon ang ubang mga gobyerno. (Ecclesiastes 4:1; 8:9) Apan ang Labing Gamhanang Diyos nagsaad ug usa ka gobyerno nga mopuli sa mga gobyerno sa yuta. Atimanon gayod sa Magmamando niini ang katawhan.—Basaha ang Isaias 11:4; Daniel 2:44.
Unsay himoon sa Gingharian sa Diyos?
Si Jehova nga Diyos nakapili nag Magmamando nga angay gayod niini—ang iyang Anak, si Jesus. (Lucas 1:31-33) Sa dinhi pa si Jesus sa yuta, gusto niyang tabangan ang mga tawo. Ingong Hari, hiusahon niya ang katawhan sa matag nasod ug taposon ang tanan nilang pag-antos.—Basaha ang Salmo 72:8, 12-14.
Dawaton ba sa tanan si Jesus ingong Hari? Dili. Apan si Jehova mapailobon. (2 Pedro 3:9) Gihatagan niyag kahigayonan ang tanan nga modawat kang Jesus ingong Hari. Hapit nang hanawon ni Jesus ang mga daotan ug ipatungha ang pakigdait ug kasegurohan sa tibuok kalibotan.—Basaha ang Miqueas 4:3, 4.