Tabangi ang Uban sa Pagpabili sa Gugma sa Diyos
1 “Ang Diyos nagarekomendar sa iyang kaugalingong gugma nganhi kanato sa pagkaagi nga, samtang kita mga makasasala pa, si Kristo nagpakamatay alang kanato.” (Roma 5:8) Ang maong mga pulong nagabutyag sa matukmorong puwersa nga nagpaluyo sa saad ni Jehova aron luwason ang katawhan gikan sa sala ug kamatayon. (Juan 3:16) Ang pagkadako sa gugma sa Diyos gipakita sa pagkaagi nga iyang gibuhat kini para sa tanang katawhan, bisan tuod ang kadaghanan wala mag-ila sa iyang awtoridad ibabaw sa ilang mga kinabuhi.
2 Tungod kay ang kahigayonan alang sa kinabuhing walay kataposan gipaabot man sa tanang mga tawo, buot tang buhaton ang ato gayong maarangan sa pagtukod ug apresasyon alang sa gugma sa Diyos diha sa mga kasingkasing sa katawhan nga atong mahibalag. Kini gikinahanglan kon sila makaalagad man ugaling kang Jehova nga madawaton. Sa unsang paagi atong matabangan sila sa pagpabili sa dakong gugma sa Diyos?
ANG MEMORYAL
3 Sa Miyerkoles, Marso 22, 1989, ang katawhan ni Jehova magsaulog sa kamatayon ni Jesu-Kristo. Ang Kasulatanhong pakigpulong nga ipahayag hayan makabulig sa daghang bag-ohan sa bug-os pang pag-apresyar sa gugma sa Diyos ug ang panginahanglang magkinabuhi sumala sa iyang kabubut-on. Dapita ang daghang maarangan sa pagtambong sa Memoryal. Imo bang gidapit ang imong mga silingan? Komosta man ang imong mga paryente, mga eskolmet, ug mga kaubanan sa trabaho? Gamitang pinatik nga imbitasyon sa pag-abag kanimo sa pagsugod ug mga panaghisgot.
4 Ang mga ansiyano gidasig nga maghimog bug-os nga mga pangandam alang sa Memoryal. Gihikay ba ang dugang mga lingkoranan kon gikinahanglan? Diin kapin sa usa ka kongregasyon ang mogamit sa hawanan, ang mahapsay nga mga kahikayan ug maayong eskedyol gikinahanglan aron malikayan ang pagkalamukat. Ang lawas sa mga ansiyano magapili ug takos-kaayo nga mamumulong nga mopresentar sa maong butang sa matin-aw ug Kasulatanhong paagi. Kini makabulig sa tanang presente sa pagpabili kon unsa ang nahimo sa Diyos sa ilang kaayohan ug sa panginahanglang mosanong nga kinasingkasing ngadto sa iyang gugma.
DILI PAGKINABUHI SA ATONG KAUGALINGON
5 Si Jesu-Kristo “namatay alang sa tanan nga sila nga mga buhi dili na magkinabuhi alang sa ilang kaugalingon, kondili alang kaniya nga namatay alang kanila.” (2 Cor. 5:15) Tungod kay nakahupot niining mapabilhong punto de bista, ang katawhan ni Jehova sulod sa Marso magahago nga mas pa kay sa kasagarang panlimbasog sa pagtabang sa uban.
6 Ang Marso ug Abril napamatud-an nga maayo kaayong mga bulan diha sa pakig-ambit sa buluhatong katabang nga pagpayunir. Sa walay duhaduha daghang mga ansiyano ug ministeryal nga mga alagad, uban sa ilang mga membro sa pamilya, ang makaarang sa pagpakig-ambit niana, nga sa ingon nagahatag ug maayo kaayong sumbanan sa apresasyon alang sa kongregasyon.
7 Sa Marso, gamitang matag higayon sa pag-abag sa uban sa pagpabili sa gugma sa Diyos pinaagig pagdapit sa mga bag-ohan ngadto sa Memoryal ug sa masibotong pagpakig-ambit diha sa ministeryo sa kanataran. Sa ingon atong ikapakita nga gipabilhan ta gayod ang gugma ni Jehova sa paghatag sa iyang Anak ingong usa ka halad.