Magmasiboton sa Putling Pagsimba
1 Si Jehova maoy Diyos nga masiboton. (Isa. 9:7; 59:17) Ginadahom nga ang tanang nahigugma kang Jehova magapamatuod sa ilang kaugalingon nga magmasiboton sa pagsimba kaniya. Sama kang Jesus, sila magpadayag ug dalisay nga kabalaka alang sa himaya ni Jehova ug sa espirituwal nga kaayohan sa katawhan.—Sal. 69:9; Juan 2:17.
2 Pinaagi sa kapunongan ni Jehova kita makadawat ug makanunayong mga pahinumdom aron tabangan kitang magmasiboton sa atong pag-alagad kang Jehova. Pinaagig pagtuman niining maong mga pahinumdom, kita dili magduhaduha sa atong pagsimba. (Sal. 119:113) Sundogon ta ang maong masibotong mga tawo sama kang Jehu ug ang apostol nga si Pablo, maingon man sa uban pang matinumanong mga alagad sa Diyos.—2 Hari 10:16; 1 Cor. 14:12.
DIHA SA MINISTERYO SA KANATARAN
3 Sa bulan sa Hunyo, kita adunay maayo kaayong kahigayonan sa pagpasundayag sa kasibot samtang kita makig-ambit sa ministeryo sa kanataran. Buot tang gamiton ang kinabag-ohang Ulohan nga Mahisgotan, “Ang Bibliya Makapaayo sa Pamilyahanong Kinabuhi” uban sa gisugyot nga tanyag, ang librong Kalipay—Kon Unsaon sa Pagkaplag Niini. Sa unsang paagi mahimo kini?
4 Human ikapaila ang imong kaugalingon, ikaw makaingon: “Namatikdan ba nimo nga daghang pamilya ang nalisdan sa paglahutay ubos sa kapit-osan sa kinabuhi karon ug ingong sangpotanan daghang pamilya ang walay kalipay? [Tugoting motubag.] Samtang ang uban maorag maayo ra man, daghang uban pa ang nakasugamak sa seryosong mga problema nga nagasumikad sa mga suliran sa panalapi ngadto sa walay pagsalig ug pagkabungkag sa kaminyoon ug banay. Sa hunahuna mo diin man ang mga membro sa pamilya moliso alang sa kasaligang tambag? [Tugoting motubag.] Ang Diyos, kinsa mao ang tagmugna sa kaminyoon, nagahatag kanatog labing maayong tambag sa pamilyahanong kinabuhi. Matikdi ang giingon sa Genesis 1:27, 28 maylabot sa katuyoan sa Diyos alang sa tawhanong banay. [Basaha.] Ang Diyos mao ang Usa nga nahibalo sa mga panginahanglan sa pamilya aron makab-ot ang tinuod nga kalipay. Kitang tanan mabenepisyohan tungod sa pagsunod sa mga instruksiyon sa Diyos mahitungod sa pamilyahanong kinabuhi. [Basahang Isaias 48:17, 18.] Kining basahona nga Kalipay—Kon Unsaon sa Pagkaplag Niini gipatik alang sa katuyoan sa pagtultol sa atong pagtagad ngadto sa mga prinsipyo sa Bibliya nga magapaayo sa banaynong kinabuhi.” Dayon, human ikapatagad ngadto sa tinong punto sa mga kapitulo 5 hangtod sa 10 sa librong Kalipay, itanyag kana ngadto sa tagbalay. Ang kapiliang tanyag, ang basahong Survival Into a New Earth mahimo usab nga itanyag nga epektibo maylabot sa kinabag-ohang Ulohan nga Mahisgotan pinaagig pagpunting nga ang kaluwasan nahimong dakong kabalaka sa mga pamilya sa atong kapanahonan. Ang talagsaong mga tagna sa Bibliya nagapakitang matin-aw nga adunay mga maluwas ug ang maong basahon gipatik sa pagbulig sa daghan nga mahimong mahiuban kanila.
5 Samtang ibutyag ta ang maayong balita, hinaot ang mabuot-kasingkasing nga mga tawo makasabot nga kita maoy “usa ka katawhan . . . nga masiboton alang sa maayo kaayong mga buhat.”—Tito 2:14.