Magtibuok-Kalag sa Ministeryo sa Kanataran
Bahin 5—Ang Dagayang mga Kaayohan sa Tibuok-Kalag nga Pag-alagad
1 Si Jehova nagataganag daghang dagayang mga kaayohan ngadto sa iyang tibuok-kalag nga mga alagad. (Sal. 116:12) Sa unsang paagi atong matagamtam ang bug-os nga gidak-on sa mga panalangin gikan kang Jehova sa atong ministeryo? Unsa man gayoy atong buhaton sa pagpaneguro sa atong kaugalingon sa iyang pag-uyon ug pabor?
2 Personal nga Panlimbasog Gikinahanglan: Mahitungod sa ministeryo, si Pablo misulat: “Ang kada tawo makadawat sa iyang kaugalingong ganti sumala sa iyang kaugalingong paghago.” (1 Cor. 3:8) Nan batonan ta ang bug-os nga pakig-ambit sa ministeryo kutob sa atong mahimo. Ang apostol nga si Pablo nakabaton ug personal nga ganti sa pagtabang sa daghang tawo, ang bug-os nga mga kongregasyon gani, sa pagkaila sa Diyos. Pagkadakong kalipay ang iyang gibati sa pagpaniid sa ilang kalig-on sa pagtuo! (1 Tes. 2:19, 20) Lagmit dili mo maarangan ang pagbuhat sama sa gidak-on sa nahimo ni Pablo. Apan, di ba dakong panalangin ang pagbulig sa usa ka tawo sa malig-on nga pagpasubay kaniya sa dalan sa kinabuhi? Pagkadakong pagpaaghat kanato nga manikaysikay pa diha sa pamalaybalay nga ministeryo ug sundalon kana pinaagig mga balikduaw ug mga pagtuon sa Bibliya!
3 Dugang mga Benepisyo: Ang hinungdanong kaayohan sa tibuok-kalag nga pag-alagad mao, ingong isigkamamumuo, ang usa madala nga mas suod kang Jehova ug kang Kristo Jesus. (Mat. 11:29, 30; 1 Cor. 3:9) Pagkadakong kangaya ang matagamtam sa pagkamatikod nga ang espiritu sa Diyos nagatabang kanimo sa ministeryo! (Mat. 10:20; Juan 14:26) Dugang pa, ang makugihong pagbuhat nga duyog gayod sa uban diha sa kongregasyon magpalig-on sa atong bugkos sa gugma ug paghiusa.
4 Dili kita makatagamtam sa bug-os nga mga benepisyo gikan kang Jehova gawas kon kita bug-os nga mosuportar sa organisasyon nga iyang gigamit sa pagpalampos sa iyang kabubut-on niining kataposang mga adlaw. (Itandi ang 2 Hari 10:15.) Sa dihang kinasingkasing tang sundon ang pagtultol nga atong madawat gikan sa kanal-galamiton sa Diyos ug aktibong malambigit diha sa kalihokan sa kongregasyon, kita sa espirituwal nga paagi mapanalipdan gikan sa malimbongong mga paagi ni Satanas.
5 Kining lima-bahing serye sa mga artikulo maylabot sa pagkahimong tibuok-kalag sa ministeryo sa kanataran nagpasiugda ug ubay-ubay nga mga puntos nga nalangkit. Mahinumdoman ba nimo kon unsaon sa pagtukod ug apresasyon alang kang Jehova, nga magpalihok kanato nga magmatibuok-kalag? (Agosto) Ngano ang pagpangandam hinungdanon sa pagtukod ug kasibot diha sa ministeryo sa kanataran? Unsaon ta man sa pagpangandam? (Septiyembre) Sa unsang paagi ang eksperiyensiyadong mga magmamantala makabulig sa uban nga mahimong tibuok-kalag? (Oktubre) Sa unsang paagi ang maayong personal nga kahikayan makaabag kanato nga magtibuok-kalag sa ministeryo? (Nobyembre) Ginapadapat mo ba kining mga sugyota?
6 Ikaw makaseguro nga samtang makugihon ka sa pagpadapat sa imong kaugalingon ngadto sa buluhaton karon, si Jehova magmatikod niini ug “ikaw makadawat sa igong ganti sa panulondon,” ang kinabuhing dayon.—Col. 3:23, 24.