Bansaya ang Diyosnong Pagkamahinalaron Ingon sa Gibuhat ni Kristo
1 Ang ekspresyon sa Bibliyang “diyosnong debosyon” nagtumong sa atong dulot nga pagtahod kang Jehova nga Diyos ug sa maunongong pag-alagad kaniya. Ang labing dakong tagbatbat sa diyosnong pagkamahinalaron mao ang atong Ginoong Jesu-Kristo.
2 Pinaagi sa iyang pagkinabuhi dinhi sa yuta, si Jesus nagpaila sa iyang kaugalingon ingong tawong hingpit sa diyosnong debosyon. Busa, makaayo alang kanato sa pagtagad sa pipila ka butang bahin sa iyang kinabuhi, ilabina kini may kalabotan sa iyang papel nga gidula ingong labing dakong tigpamaba alang kang Jehova nga Diyos.
3 Magmasiboton ug Magmaisogon: Si Jesus masiboton sa pagmantala sa gihubit sa Isaias 61:2 ingong “ang tuig sa maayong kabubut-on sa bahin ni Jehova.” Tungod sa pagsunod sa panig-ingnan ni Jesus, kita gayod magmasiboton sa pakig-ambit niining nagaluwas-kinabuhing buluhaton sulod sa kataposang mga adlaw niining daotang sistema sa mga butang. Kinahanglan usab kitang magmaisogon sama kang Jesus. Ngano? Tungod kay ang mensahe nga atong ginamantala maoy malampornason ug di-madawat sa uban, ilabina kon maghisgot kita mahitungod sa adlaw sa panimalos ni Jehova.
4 Aron matabangan kita sa pagsulti uban ang kaisog ug makapasundayag sa diyosnong pagkamahinalaron, atong gikinahanglan ang espiritu ug pagtultol ni Jehova. Sa Lucas 4:18, si Jesus miingon: “Ang espiritu ni Jehova ania kanako.” Pinaagig espiritu ug panalangin ni Jehova, kita usab makabansay sa diyosnong pagkamahinalaron ug mahimut-an ni Jehova. Ang pagbansay ug usa ka butang nagakahulogan sa pagkaanad sa pagbuhat niana. Nagakahulogan kini nga may butang nga sa inadlaw naandan nang paagi sa atong kinabuhi. Ang diyosnong debosyon kinahanglang mahimong usa ka paagi sa kinabuhi sa mga alagad sa Diyos. Miingon ang apostol nga si Pablo: “Busa, kita man nagakaon o nagainom o nagabuhat sa bisan unsa, buhata ang tanang butang alang sa himaya sa Diyos.”—1 Cor. 10:31.
5 Diyosnong Pagkamahinalaron, Atong Paagi sa Kinabuhi: Ang Disyembre maoy panahon sa mga kombensiyon ug mga bakasyon. Apan dili ta gayod kalimtan ang padayong panginahanglan sa pagsundog kang Kristo sa pagpahimulos sa mga kahigayonan aron ipaambit ang maayong balita sa uban. Samtang atong buhaton kini, girekomendar nga atong itanyag ang librong Atong Estorya sa Bibliya diha sa atong ministeryo sa kanataran maingon man sa impormal nga pagpamatuod. Maayo nga magdala kag usa kon ikaw magabiyahe o moduaw sa mga higala ug mga paryente.
6 Ang tanan kanato motambong man sa “Mahigugmaon sa Kagawasan” Distritong Kombensiyon. Human niana, makaayong atong sublion ang atong mga nota aron tinoon kon unsang mga puntos nga atong nakat-onan ug makapadapat niana sa atong kinabuhi aron makabansay sa diyosnong pagkamahinalaron. Ato usab nga mahisgotan uban sa mga silingan o mga membro sa pamilya ang espirituwal nga pagkaon nga atong napahimuslan didto sa kombensiyon.—Efe. 4:25.
7 Ang atong paagi sa kinabuhi kinahanglang dili lamang sa pagmantala sa adlaw sa panimalos ni Jehova ug sa tuig sa maayong kabubut-on kondili usab sa pagpasundayag sa diyosnong debosyon diha sa atong personal ug banaynong kinabuhi. Ato gayong sundogon si Jesus, nga nagatudlo sa uban pinaagig panig-ingnan kon unsa gayod ang diyosnong pagkamahinalaron. Pinaagig pagsunod sa ehemplo ni Kristo sa diyosnong debosyon, kita manikaysikay kanunay sa pagbaton ug hustong motibo sa tanang butang nga atong ginabuhat, nga nagadayeg kang Jehova ug nagapamatuod sa pagkahimong iyang maunongong mga alagad.