Kahikayan sa Pagtuon sa Libro sa Kongregasyon
Bahin 4—Padayon sa Paglinig-onay sa Usag Usa
1 Ang matag usa diha sa grupo sa Pagtuon sa Libro sa Kongregasyon makahimo man ug makahuloganong bahin sa espirituwal nga tingusbawan diha sa grupo. Kitang tanan gustong mosunod sa Kasulatanhong sugo sa ‘pagdasig sa uban sa gugma ug maayo kaayong mga buhat, ilabina ang adlaw nagakaduol na.’—Heb. 10:24, 25.
2 Pagtinabangay sa Usag Usa: Sa dihang ang matag usa kanato magpakitag personal nga interes diha sa ubang mga membro, ang mainiton, mahigalaong espiritu magalungtad diha sa grupo. Sa Galacia 6:10 kita gitultolan sa “pagbuhat kon unsa ang maayo ngadto sa tanan, apan ilabina ngadto kanilang may kalabotan kanato sa pagtuo.” Pananglitan, namatikdan ba nimo nga ang pipila gikan sa maong pagtuon sa libro may sakit o wala sa mga tigom? Tingali imong makontak sila pinaagig telepono o duawon sila sa personal. Ang maong espiritu diha sa grupo sa pagtuon sa libro magpasuod pa sa mga igsoon.
3 Ang uban ba nagakinahanglan ug pagpalig-on tungod sa adlaw-adlawng mga kapit-osan, mga kaakohan sa pamilya, o ubang mga gumonhap? Unsa may imong mahimo sa pagbulig? Himoa ang linaing panlimbasog nga makigsulti sa uban diha sa mga tigom, dili lang igo ra sa pagtimbaya. Ang pipila may pagkamaulawon pero nagalantaw man nga adunay iyang ikasulti. (uw p. 137-8) Nagdasig ang apostol nga si Pablo sa mga Kristohanon nga “dasigon ang naguol nga mga kalag, paluyohan ang mga maluyahon, magmapailobon ngadto sa tanan.” (1 Tes. 5:14) Kon ang usa may sakit o naluya, pagkamakapalig-on sa dihang ang mga higala mohapit sa pagduaw o magmatinabangon! Sagad, ang pagkahibalo lamang nga adunay nabalaka mao ra ang gikinahanglan.
4 Buot usab nato nga mokooperar sa mga kahikayan sa pag-alagad sa kanataran. Maninguha gayod kita nga mosangyaw uban sa lainlaing mga membro diha sa grupo. (2 Cor. 6:11-13; 12:15) May mga panahon nga hangyoon kita sa konduktor sa pagtuon sa libro sa pagbulig ug usa ka kauban. Unsa man ang atong pagsanong? Ang grupo sa pagtuon sa libro mapalig-on gayod sa dihang ang mga magmamantala ug mga payunir nagaduyogay sa pagbuhat diha sa ministeryo.
5 Personal nga Panig-ingnan: Adunay laing mga paagi nga ikaw makaamot sa kahikayan sa pagtuon sa libro. Importante ang imong maayong panig-ingnan. Pananglitan, sa dihang magsenina ka sama sa imong pagtambong sa tigom sa Kingdom Hall, ikaw nagapakitag pagtahod. Ikaw nagapahimutag maayong ehemplo alang niadtong nagaugmad sa batasan nga kasuwal ang pagsenina. Ginahimo ba nimong batasan nga mahiabot sa hustong panahon aron dili makadisturbo sa tigom?
6 Ang Pagtuon sa Libro sa Kongregasyon maoy dapit nga kita makakuhag personal nga pagtabang ug usab makadugang ngadto sa espirituwal nga kahayahay ngadto sa uban. Tugoting kitang tanan “padayong magdinasigay sa usag usa ug maglinig-onay sa usag usa” pinaagig bug-os nga pagsuportar niining kahikayana.—1 Tes. 5:11.