Kapitulo 17

“Batoni ang Mainitong Gugma sa Usag Usa”

1, 2. (a) Unsa ang sagad magpabihag sa mga bag-ohan diha sa mga tigom sa mga Saksi ni Jehova? (b) Unsang laing pamatuod bahin niining hiyasa nga ilang mapanid-an sa atong mga kombensiyon?

SAGAD dulot nga mabihag ang katawhan sa ilang unang pagtambong sa mga tigom sa kongregasyon sa mga Saksi ni Jehova tungod sa gugma nga ginapasundayag didto. Ilang mapanid-an kana diha sa mainit nga pagsandurotay ug sa pag-abiabi nga gipaabot kanila sa personal.

² Sa atong mga kombensiyon ang mga bisita usab makamatikod nga kadaghanan kanilang nagatambong mga maligdong ang pamatasan. Ang usa ka reporter ug balita misulat bahin sa maong kombensiyon: ‘Walay nahubog sa mga droga o sa alkohol. Walay pagsingkahay ug pagsinggitay. Walay pagtuloranay. Walay pagsikhanay. Walay namalikas ug nanunglo. Walay binuang nga mga komedya o panglaw-ay. Ang hangin wala mabuot-aso. Walay pangawat. Walay mga lata nga nagkatibuagsa sa mga laguwerta. Kadto talagsaon kaayo.’ Kining tanan maoy pamatuod sa gugma, ang matang nga ‘dili nagagawing malaw-ay ug dili nagapangitag kaugalingong kaayohan.’​—1 Cor. 13:4-8.

3. (a) Ngadtongadto, unsa gayod ang mahimong dayag sa atong pagpasundayag ug gugma? (b) Sa pagsundog ni Kristo, unsang matang sa gugma nga kinahanglan tang ugmaron?

³ Ang gugma maoy hiyas nga nagpaila sa matag dalisay nga Kristohanon. (Juan 13:35) Samtang kita mouswag sa espirituwal, gikinahanglan natong mas pang ipasundayag kana. Ang apostol nga si Pablo miampo nga ang gugma sa iyang kaigsoonan “mosamot pa sa pagdagaya.” (Filip. 1:9; 1 Tes. 3:12) Si Pedro usab miagda sa kaubanang mga Kristohanon sa pagtugot sa ilang gugma nga ilambigit “ang tibuok nga katilingban sa kaigsoonan.” (1 Ped. 2:17) Ang atong gugma magpalihok kanato kay sa basta lang pagtambong sa mga tigom uban sa mga tawo kinsa wala kita kaayo ing panlimbasog nga maila sa personal. Kinahanglan kanang maglakip kay sa pagbungat lang ug malulot nga “Haló” ngadtongadto. Gipakita ni apostol Juan nga kinahanglan kanang mahagoon-kaugalingon. Siya misulat: “Pinaagi niini kita nakadangat sa pag-ila sa gugma, tungod kay [ang Anak sa Diyos] mihatag sa iyang kalag alang kanato; ug kita obligado sa paghatag sa atong mga kalag alang sa atong mga igsoon.” (1 Juan 3:16; Juan 15:12, 13) Kana wala pa nato mabuhat. Pero ato ba gayong ihatag ang atong kinabuhi alang sa atong mga igsoon? Buweno, ngadto sa unsang gidak-on nga kita nagapaningkamot sa pagtabang kanila karon, bisan kon kana tingali dili kombeniyente?

4. (a) Diha sa unsang laing paagi nga mahimong makaplagan tang ikapasundayag ang gugma sa mas bug-os pa? (b) Nganong hinungdanon nga batonan ang mainitong gugma alang sa usag usa?

⁴ Duyog sa mga buhat nga nagabanaag ug espiritu nga nagasakripisyo-kaugalingon, hinungdanon usab nga batonan ang lunsay mainit nga pagbati alang sa atong mga igsoon. Nagaawhag kanato ang Pulong sa Diyos: “Diha sa inigsoong gugma maghigugmaay kamo sa usag usa.” (Roma 12:10) Ingon niana ang atong pagbati ngadto sa pipila ka tawo. Ato bang ikaapil ang mas pa diha sa grupo nga niana atong ginabati ang maong kawili? Samtang nagakaduol ang kataposan sa daang sistema, maoy hinungdanon alang kanato nga mahimong suod pa gayod sa atong kaigsoonan. Ang Bibliya nagpabantay kanato niini, sa pag-ingon: “Ang kataposan sa tanang butang nagkahiduol na. . . . Labaw sa tanang butang, batoni ang mainitong gugma sa usag usa, sanglit ang gugma magatabon sa kapid-an ka kasal-anan.”​—1 Ped. 4:7, 8.

5. Nganong sayop man sa pagdahom nga walay mga suliran nga motungha tali sa mga membro sa usa ka kongregasyon?

⁵ Siyempre, basta kita dili pa hingpit, adunay mga panahon nga mabuhat ta ang mga butang nga makapalagot sa uban. Sila, usab, sa lainlaing paagi magapakasala batok kanato. (1 Juan 1:8) Kon makita mo ang imong kaugalingon nga mahatumpawak sa maong kahimtang, unsa man gayod ang imong buhaton?

Kon Unsay Buhaton sa Dihang Motungha ang mga Suliran

6. (a) Nganong ang tambag sa Bibliya dili kanunay mahauyon sa atong mga hilig? (b) Pero unsa ang moresulta kon atong ipadapat kana?

⁶ Ang Kasulatan nagtaganag gikinahanglang pagtultol. Pero ang ginatambag niana hayan dili motakdo sa hilig tang buhaton ingong mga tawong dili hingpit. (Roma 7:21-23) Bisan pa niana, ang atong maikagong pagpaningkamot niana mohatag ug pamatuod sa atong tim-os nga tinguha sa pagpahimuot kang Jehova, ug kana usab magpadagaya sa hiyas sa atong gugma ngadto sa uban.

7. (a) Kon ang usa makapasakit kanato, nganong dili gayod kita manimalos? (b) Nganong dili gayod basta likayan lang ang usa ka igsoon nga nagapalagot kanato?

⁷ Usahay sa buhatan ang mga tawo ug dili maayo sila mangitag mga paagi nga makabalos sa tagsala. Pero kana magpagrabe lang sa kahimtang. Kon ang panimalos gikinahanglan man, ato lang kanang itugyan sa Diyos. (Prov. 24:29; Roma 12:17-21) Ang uban manlimbasog tingali nga palaon na sa ilang kinabuhi ang maong tagsala, nga dili na makigkontak kaniya. Pero dili ta kana mabuhat ngadto sa mga isigkamagsisimba. Ang pagkadinawat sa atong pagsimba nagadepende, sa bahin, sa atong paghigugma sa atong mga igsoon. (1 Juan 4:20) Sa katinuod ikaingon ta ba nga atong gihigugma ang usa ka tawo nga likayan ta sa pakighisgot o kang kansang presensiya magpatugaw kanato? Gikinahanglan tang sagubangon ang suliran ug sulbaron kana. Sa unsang paagi?

8, 9. (a) Kon aduna kitay hinungdan sa reklamo batok sa usa ka igsoon, unsa ang hustong butang buhaton? (b) Pero unsa na man kon siya sigeng nagpakasala batok kanato? (c) Nganong kinahanglang dumalahon ta ang suliran niining paagiha, ug unsa ang makatabang kanato sa pagbuhat niana?

⁸ Maylabot niining butanga ang apostol nga si Pablo misulat: “Padayong mag-inantosay ang usag usa ug sa kadagaya magpinasayloay ang usag usa kon ang usa adunay hinungdan sa reklamo batok sa lain. Maingon nga si Jehova madagayaong nagpasaylo kaninyo, busa mao usab kamo.” (Col. 3:13) Mahimo ba nimo kana? Unsa na man kon ang maong tawo sigeng nagapakasala batok kanimo sa lainlaing paagi?

⁹ Mao usab kana ang pangutana ni apostol Pedro, ug siya misugyot nga tingali iya gayong masulayan sa pagpasaylo ang usa ka igsoon hangtod sa pito ka besis. Si Jesus mitubag: “Ako mag-ingon kanimo, dili, Hangtod sa makapito, kondili, Hangtod sa kapitoan-ug-pito ka higayon.” Pero ngano? Si Jesus mipatin-aw pinaagig ilustrasyon nga nagpasiugda sa gidak-on sa atong utang ngadto sa Diyos kon itandi sa hayan nautang sa kang bisan kinsang tawo kanato. (Mat. 18:21-35) Sa daghang paagi kita nagapakasala batok sa Diyos sa matag adlaw​—usahay sa buhat nga hinakog, sagad sa atong ginabungat o ginahunahuna, ingon man sa pagkapakyas ta sa pagbuhat sa kinahanglang atong buhaton. Diha sa atong pagka walay kabangkaagan mahimo ganing dili ta maamgohan nga ang pipila sa mga butang nga atong gibuhat sayop diay, o diha sa pangagpas sa kinabuhi hayan dili ta mapalandong ug maayo ang maong butang. Ang Diyos makasukot sa atong kinabuhi sa pagbayad sa atong mga sala. (Roma 6:23) Apan siya padayong nagmaluloy-on nganhi kanato. (Sal. 103:10-14) Busa, dili gayod kay dili makataronganon nga siya nagasugo kanato nga sa susama niana makiglabot sa usag usa. (Mat. 6:14, 15; Efe. 4:1-3) Kon buhaton ta kana, inay kay magdumot, mao kanay ebidensiya nga atong nakab-ot ang matang sa gugma nga “dili maaligutgoton.”​—1 Cor. 13:4, 5; 1 Ped. 3:8, 9.

10. Unsa man gayoy atong buhaton kon ang usa ka igsoon adunay gihambin batok kanato?

¹⁰ Mahimong adunay mga panahon sa dihang atong maamgohan nga, bisan tuod wala kitay kaaligutgot sa atong igsoon, siya diay adunay batok kanato. Unsa man gayoy atong buhaton? Sa walay langan gikinahanglan tang makigsulti kaniya ug maninguha sa pagpahiuli sa malinawong mga relasyon. Ang Bibliya nag-agda kanato nga maoy unang molihok. (Mat. 5:23, 24) Dili sayon ang pagbuhat niana. Nanginahanglan kana ug gugma inubanan ug pagkamapainubsanon. Ang mao bang mga hiyas may igong paggamot diha kanimo aron imong buhaton nga ginatambag sa Bibliya? Kini usa ka importanteng tumong nga panlimbasogan sa pagkab-ot.

11. Kon ang usa ka igsoon nagabuhat ug mga butang nga magpalagot kanato, unsa man gayoy buhaton maylabot niana?

¹¹ Sa laing bahin, hayan ang usa may gibuhat nga mga butang nga nakapalagot kanimo​—ug posibleng ang uban pa. Dili ba maayong may usa nga magpakigsulti kaniya? Lagmit. Kon sa personal imong ipatin-aw ang gumonhap ngadto kaniya sa malulotong paagi, mahimong magpatungha kinig maayong mga resulta. Pero una kinahanglang suknaon mo ang imong kaugalingon: ‘Ang mga butang ba nga iyang ginabuhat di-kasulatanhon? O ang suliran ba mao gayod kay ang akong kagikan ug pagbansay lahi man sa iyaha?’ Kon mao, magmabinantayon nga dili maghimo sa imong kaugalingong mga sukdanan ug unya hukman kana sumala niini. (Sant. 4:11, 12) Si Jehova sa walay pihigpihig nagadawat sa mga tawo gikan sa tanang matang sa kagikan ug mapailobon uban kanila samtang sila nagauswag sa espirituwal.

12. (a) Kon adunay hitabo sa grabeng pagpakasala diha sa kongregasyon, kinsa man ang moatiman niana? (b) Pero ubos sa unsang mga kahimtang nga ang kaakohan sa usa nga nahimoag sala mao ang unang molihok? Uban sa unsang tumong?

¹² Apan, kon ang usa diha sa kongregasyon malangkit sa grabeng sala, kini nanginahanglan ug pagtagad gilayon. Pero pinaagi kang kinsa? Sagad pinaagig mga ansiano. Apan, kon kana nagalangkit ug butang sa negosyo tali sa mga igsoon, o posibleng paggamit sa dila sa dili hustong paagi nga nakadaot gayod sa usa, nan ang usa nga nahimoag sala kinahanglang unang manlimbasog sa pagtabang sa nakasala diha sa personal nga paagi. Hayan kana malisod alang sa pipila. Pero mao kana ang gitambag ni Jesus sa Mateo 18:15-17. Ang gugma sa iyang igsoon ug ang maikagong tinguha sa paghawid kaniya ingong usa ka igsoon moabag sa usa sa pagbuhat niana diha sa paagi nga, kon posible, magpalukmay sa kasingkasing sa usa nga sad-an.​—Prov. 16:23.

13. Kon motungha ang gumonhap tali kanato ug sa laing igsoon, unsay makaabag kanato sa hustong pagtamod sa maong butang?

¹³ Sa motungha ang problema, dako man o gamay, kita matabangan kon paninguhaon tang masabtan ang paagi ni Jehova sa pagtamod niana. Siya dili mouyon ug bisan unsang sala, pero kana iyang makita kanatong tanan. Sa iyang tinudlong panahon ang mga dili mahinulsolong makasasala paphaon gikan sa iyang organisasyon. Apan komosta na man ang uban kanato? Kitang tanan hingtungdan sa iyang pagkamapailobon ug kaluoy. Siya mihatag ug sumbanan nga atong pagasundogon. Kon atong buhaton kana, kita nagasumbaliksilaw sa iyang gugma.​—Efe. 5:1, 2.

Pangitag mga Paagi Aron “Mapalapad”

14. (a) Nganong gidasig ni Pablo ang mga taga-Corinto nga “mapalapad”? (b) Sa unsang paagi ang mga teksto nga gisitar dinhi nagbutyag nga makaayo kanatong tanan sa pagpalandong bahin niini?

¹⁴ Migugol ug daghang bulan ang apostol nga si Pablo sa paglig-on sa kongregasyon sa Corinto, Gresya. Siya naghago gayod sa pagtabang sa mga igsoon didto ug sila iyang gihigugma. Pero ang pipila kanila walay mainit nga pagbati alang kaniya. Sila hinawayon kaayo. Siya miagda kanila sa “pagpalapad” sa pagpadayag ug pagbati. (2 Cor. 6:11-13; 12:15) Makaayo kanatong susihon ang gidak-on sa atong pagpadayag ug gugma ngadto sa uban ug sa pagpangitag mga paagi aron “mapalapad.”​—1 Juan 3:14; 1 Cor. 13:3.

15. Unsay makatabang kanato sa paglambo diha sa gugma alang kang bisan kinsa nga hayan sa personal kita dili ganahan?

¹⁵ Aduna bay pipila diha sa kongregasyon nga atong nakaplagan nga malisod nga ikasuod? Kon kita ang mohimog tikang sa pagtabon sa bisan unsang ginagmayng mga kasaypanan sa ilang bahin, ingon nga gusto ta nga kana ilang buhaton alang kanato, kini makabulig sa pagpainit sa relasyon tali kanato. (Prov. 17:9; 19:11) Ang atong mga pagbati ngadto kanila mapauswag usab kon tinguhaon ta ang ilang maayong mga hiyas ug kana ang palabihon. Kita ba gayod nagmatikod sa mga paagi nga si Jehova nagagamit niining mga igsoona? Kini gayod magpalambo sa atong gugma alang kanila.​—Luc. 6:32, 33, 36.

16. Sa matinud-anon, sa unsang paagi atong “mapalapad” ang pagpakitag gugma ngadto kanilang anaa sa atong kongregasyon?

¹⁶ Admitido, adunay mga limitasyon sa atong mabuhat alang sa uban. Basin dili ta matimbaya ang tanan sa kada miting. Hayan dili posible sa paglakip sa tanan sa dihang dapiton ta ang mga higala alang sa usa ka pagkaon. Kitang tanan adunay suod nga mga kaubanan nga ginagugol ta ang dugang panahon uban kanila kay sa atong ginabuhat ngadto sa uban. Apan ato ba kanang “mapalapad” pa? Ato bang magugol ang pipila lang ka minutos sa matag semana aron mas masinati sa usa diha sa kongregasyon nga dili pa nato suod nga higala? Mahimo kahang atong madapit usahay ang usa niini kanila sa pagduyog kanato sa ministeryo sa kanataran? Kon kita aduna gayoy mainitong gugma alang sa usag usa, kita gayod mangitag mga paagi sa pagpakita niana.

17. Sa dihang anaa sa taliwala sa kaigsoonan nga wala ta pa sukad ikahibalag, unsay magapakita kon kita ba adunay mainitong gugma alang kanila usab?

¹⁷ Ang Kristohanong mga kombensiyon nagahatag ug maayong higayon aron “mapalapad” ang atong gugma. Mga linibo mahimong presente. Dili ta man mahibalag ang tanan. Pero makagawi kita sa atong kaugalingon sa paagi nga nagapakitang ginauna ta ang ilang kaayohan kay sa ikasayon kanato, bisan pa kon wala pa sukad nato sila mahibalag kanhi. Ug atong ikapakita ang personal nga interes tali sa mga sesyon pinaagig pag-una nga hibalagon ang pipila sa atong palibot. Moabot ra ang adlaw nga ang tanan nga magapuyo ibabaw sa yuta mahimong mga igsoong lalaki ug babaye, nga nahiusa diha sa pagsimba sa Diyos ug Amahan sa tanan. Pagkadakong kalipay unya nga maila silang tanan, uban sa ilang daghan ug nagkadaiyang mga hiyas! Ang mainitong gugma alang kanila magpalihok kanato nga gustong buhaton kana. Nganong dili sugdan karon?

Repasong Panaghisgot

● Sa dihang motungha ang mga suliran tali sa mga igsoong lalaki ug mga babaye, unsaon gayod kini sa pagsulbad? Ngano?

● Samtang kita mouswag sa espirituwal, diha sa unsang mga paagi nga molambo usab ang atong gugma?

● Sa unsang paagi posible sa pagpakitag mainitong gugma nga dugang pa sa grupong suod o pinahabong nga mga higala?