Pagtanyag sa Maayong Balita—Paggamit nga Maalamon sa mga Publikasyon
1 Ang espesyal nga adlawng asembliya para sa 1991 nga tuig sa pag-alagad nagpasiugdag panaghisgot bahin sa “Atong Ministeryo—Dili Ordinaryo, Kondili Balaan.” Kana nagpatugbaw nga ang atong buluhaton maoy sagrado ug dili gayod yanoyanohon ra. Sanglit kay ang paggamit sa napatik nga literatura maoy bahin sa atong ministeryo, atong ikapakita ang atong pagtahod pinaagig maalamong paggamit sa atong mga publikasyon.
2 Sulod sa 1990 nga tuig sa pag-alagad, ang Sosyedad mihimog 678 ka milyong mga magasin ug kapin sa 51 ka milyong mga Bibliya ug tinahing mga libro para gamiton sa tibuok-kalibotang nataran. Kini nagrepresentar sa dakong kagastohan sa napahinungod nga mga kahinguhaan, apil ang panahon, kusog, ug salapi. Unsa ang pipila sa mga paagi nga atong ikasumbaliksilaw ang kinasingkasing nga pagpabili sa atong mga basahon samtang atong ibutyag ang mensahe sa Gingharian ngadto sa mga mabuot-kasingkasing?
3 Personal ug Pamilyahanong Pagtuon: Sa Roma 2:21 ang apostol nga si Pablo miingon: “Ikaw, bisan pa niana, nga nagatudlo ug lain, wala ba magtudlo sa imong kaugalingon?” Kon gahinan tag panahon aron sa pagbasa, sa pagtuon, ug mamalandong nga mainampoon sa atong gipasukad-Bibliya nga literatura, kita sa ingon sa personal nga paagi nagapasundayag sa gidak-on sa atong pagpabili sa nunot-panahong mga tagana ni Jehova sa espirituwal nga pagkaon pinaagig iyang piniyalan nga matang. (Luc. 12:42) Ang pagsignunot sa napadayag nga mga kamatuoran magpaarang kanato sa pag-ugmad sa dakong pagpabili sa tanang gisalig ni Jehova sa atong pag-atiman. Ang mga bata, usab, kinahanglang hustong bansayon sa pagpabili ug pagtagad sa atong literatura, nga dili sa waytagad ginamarkahan o ginadaot kana. Dugang pa, ang atong mga basahon kinahanglang huptang mahinlo ug mahapsay kanunay aron gamiton diha sa kanataran.
4 Ayaw Pag-usik-usik: Aron gayod mabenepisyohan, ang atong literatura kinahanglang mapahimutang sa mga kamot sa mga nagapangitag-kamatuoran, nga mao, kadtong tinuod nga interesado sa atong mensahe ug buluhaton. (Mat. 10:11) Busa likayan ta ang pag-usik-usik sa atong literatura, nga dili tugotan ang mga magasin, mga libro, o ubang mga basahon nga magdampuog o magbunton diha sa balay.
5 Sanglit ang mga magasin may petsa, aduna kitay limitadong panahon sa pagtanyag niana ingong bag-ong mga gula. Busa ang duyog nga panlimbasog sa atong bahin mao ang gikinahanglan aron kining mga magasina mabatonan sa mga interesado. Kon atong makita nga daw nagabunton gihapon ang atong mga magasin, hayan makaayo sa pagpahiuyon sa atong eskedyol aron gugolon ang dugang panahon sa buluhatong magasin. Sa pagbuhat niini, kita nagapakita sa atong kaugalingon nga matinumanong mga piniyalan sa di-takos nga kalulot sa Diyos.—1 Cor. 4:2; 1 Ped. 4:10, 11; itandi ang Lucas 16:l, 10.
6 Si Jehova “mitugyan diha sa pagsalig” sa iyang dedikadong katawhan sa usa ka mabug-at kaayo nga kaakohan ug buluhaton, apil ang “mga kabtangan” nga ibabaw niana ang iyang matinumanong “piniyalan” adunay awtoridad. (2 Tim. 1:12; Luc. 12:42-44, 48b; 1 Tim. 6:20) Uban sa dulot nga apresasyon alang sa atong mga pribilehiyo diha sa buluhaton sa Diyos, hinaot nga kita mopadayon sa maalamong paggamit sa atong mga publikasyon diha sa pagtanyag sa maayong balita ngadto sa uban.