Gamitag Maayo ang Atong mga Publikasyon
1.Sa unsang paagi atong masundog ang panig-ingnan ni Jesus maylabot sa pagpabili sa mga tagana ni Jehova?
1 Human pakan-a ni Jesus sa milagrosong paagi ang dakong panon sa katawhan, siya nagsugo nga hiposon ang sobrang mga pagkaon. (Mat. 14:19-21) Ang pagpabili ni Jesus sa mga tagana ni Jehova maoy maayong panig-ingnan alang kanato nga ipakita ang atong ‘pagkamapasalamaton’ pinaagi sa paggamit ug maayo sa tanang tagana ni Jehova pinaagi sa “matinumanong piniyalan.”—Col. 3:15; Luc. 12:42; Mat. 24:45-47.
2.Unsay atong himoon aron dili magtipun-og ang atong mga magasin?
2 Mga Magasin: Dali rang magtipun-og ang atong mga magasin kon dili dayon kini mapahimutang ngadto sa mga tawo. Busa, kon kanunayng manobra ang atong mga magasin, angay natong kunhoran ang atong order niana. Komosta man ang daandaang mga magasin? Ang mga artikulo niini mapuslanon gihapon. Kon nagtipun-og na ang atong mga magasin, ang magtatan-aw sa pag-alagad o laing ansiyano lagmit makatabang kanato nga epektibo kining mapahimutang ngadto sa mga tawo.
3, 4. Unsay angay natong hunahunaon sa dihang magkuha kitag mga literatura diha sa Kingdom Hall?
3 Ubang Literatura: Kon lahi na ang tanyag nga literatura, susiha una kon aduna ka bay kopya niini sa imong balay nga mahimong ikatanyag sa dili pa mokuha ug dugang kopya niini diha sa Kingdom Hall. Magmahunahunaon nga mokuha lang sa gikinahanglan nianang semanaha, ug kuha na lag dugang human mapahimutang ang maong mga kopya.
4 Kon mahitungod sa mga publikasyon nga himoong personal nga kopya, pag-order lang kon pilay aktuwal nimong gikinahanglan. Isulat ang imong ngalan diha sa gitaganang blangko. Makatabang kini nga mabalik kanimo ang maong kopya kon ugaling kini mawala. Kon naggamit kag Watchtower Library sa CD-ROM ug nagtipig ug personal nga kopya sa mga magasin, dili ka na tingali kinahanglan pang mag-order ug mga tomo sa Watchtower ug Awake!
5.Unsay angay natong hinumdoman sa dihang magpahimutang ug mga publikasyon?
5 Pagpahimutang sa mga Publikasyon: Ipahimutang lamang nato ang atong mga literatura ngadto sa mga tawo nga nagpakitag tinuod nga interes. Angay natong hinumdoman nga kita ang may pangunang kaakohan sa galastohan niining bililhong mga himan sa ministeryo. Sa dihang magbilin ug publikasyon sa mga interesado, sultihi sila nga mahimo silang makasuportar sa tibuok-kalibotang buluhaton pinaagi sa ilang donasyon.
6.Nganong pabilhan nato pag-ayo ang atong mga publikasyon, ug unsay angay natong buhaton niini?
6 Si Jesus milagrosong nagtaganag pisikal nga pagkaon sa uban, apan mas subsob niyang gipakaon ang katawhan pinaagig espirituwal nga pagkaon. Si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mat. 4:4) Ang atong mga publikasyon nagtudlog mga kamatuoran gikan sa Bibliya nga hinungdanon sa pagbaton ug kinabuhing walay kataposan. (Juan 17:3) Dili gayod nato kini angayng usik-usikan!