Ipakitang Pagpabili Alang sa Teokratikanhong Kapanguhaan
1 Sa dihang mihimog mga kahikayan sa pag-ayo sa templo, gidayeg ni Haring Josias kadtong giasayn sa pagbuhat sa maong buluhaton, nga nag-ingon: “Walay himoong pakigkuwenta sa salapi kanila kansang mga kamot maoy gitugyanan niini, tungod kay sila nagabuhat sa pagkakasaligan.” (2 Hari 22:3-7) Ang pagpabili niadtong mga lalakiha alang sa sagradong mga butang nadayag diha sa paagi sa ilang pagdumala sa mga kapanguhaan nga gipiyal kanila. Karong adlawa, samtang kita nagabuhat sa balaang buluhaton sa maayong balita sa Diyos, kita usab kinahanglang magpakitag pagkakasaligan sa pagdumala sa mga kapanguhaan nga gihatag kanato.
2 Diha sa Ministeryo sa Kanataran: Ang pagpabili sa hinungdanong mensahe nga anaa sa atong mga publikasyon ug ang pagkasayod sa gasto nga nalangkit sa pagpatungha niana magtukmod kanato sa pagpabili pag-ayo niana. Dili gayod nato itanyag ang atong literatura ngadto kang bisan kinsa nga wala magpakitag tinuod nga pagpabili sa mensahe sa Bibliya. Kon ang usa ka tawo magpakitag diyutayng interes sa maayong balita, mahimong tanyagan nato siyag usa ka tract imbes laing literatura.
3 Iapod-apod ang literatura sa paagi nga nagtamod sa kabililhon niini. Ayaw kinig ibilin diha sa publikong mga dapit nga kini makatag lamang. Aron dili mausik, susiha daan kon pila ka literatura ang anaa sa balay sa dili pa mokuhag dugang literatura. Kon kanunay may sobra ka sa mga magasin sa matag gula, tagda ang pagpakunhod sa imong order.
4 Mga Publikasyon Alang sa Personal nga Paggamit: Kita angayng mag-order lamang ug mga publikasyon nga atong aktuwal nga gikinahanglan. Ilabina gayod kitang magmakasaranganon sa dihang mohangyog deluxe nga mga Bibliya, mga Reference Bible, ug ubang dagkong mga publikasyon, sama sa Concordance, Index, mga tomo sa Insight, ug librong Mga Magmamantala, nga tanan kini gigama sa dakodakong gasto.
5 Gipaneguro mo ba nga masulat ang imong ngalan ug adres diha sa imong kaugalingong mga kopya sa mga publikasyon? Makatabang kini aron makunhoran ang panginahanglan sa paghulip sa mga publikasyon nga mawala. Kon nawad-an kag songbok, Bibliya, o tun-anang publikasyon, hayan makaplagan mo kini kauban sa nawalang mga butang nga nahipos didto sa Kingdom Hall o sa asembliyahanan.—Luc. 15:8, 9.
6 Maningkamot kita nga magmaalamon sa paggamit sa atong literatura. Usa kini ka paagi sa pagpakita sa atong pagkakasaligan sa pagdumala sa kapanguhaan sa Gingharian nga gipiyal ni Jehova kanato.—Luc. 16:10.