Pangutana

◼ Sa unsang paagi ang kalipay ikabutyag niadtong nagatambong sa mga bawtismo?

Ang bawtismo maoy okasyong malipayon. Malipay kita sa pagtan-aw sa mga bag-ohan nga nagapasundayag sa ilang pagtuo sa publiko. (Sal. 40:8) Si Jesus miingon nga kini nagpahinabog dakong kangaya didto sa mga langit. (Luc. 15:10) Ang mga membro sa banay ug mga magmamantala nga nagtuon uban kanilang nagapabawtismo ilabing malipayon sa pagtan-aw sa mga bag-ohan nga nagasubay niining hinungdanong tikang. Apan sa unsang paagi ang maong kalipay ikabutyag?

Ang bawtismo ni Jesus maoy panig-ingnan sa Kristohanong mga bawtismo karong mga adlawa. Siya nag-ampo sa gibawtismohan siya. (Luc. 3:21, 22) Hibalo siya nga ang bawtismo maoy panahon sa pagpamalandong ug dulot nga paghinuktok. Ang iyang mga tinun-an miila usab sa importansiya sa bawtismo. Sa adlaw sa Pentekostes 33 K.P., duolan sa 3,000 ang nabawtismohan. Unsa man ang reaksiyon sa mga tinun-an nga nakasaksi sa maong hitabo? “Sila padayong nagdeboto sa ilang kaugalingon ngadto sa pagtulon-an sa mga apostol . . . ug sa mga pag-ampo.” (Buh. 2:41, 42) Ang mga tinun-an namalandong sa espirituwal nga mga butang.

Ang Kristohanong mga asembliya sa modernong kapanahonan napasiugda pinaagig mga bawtismo. Tino nga tukma nga ibutyag ang atong kangaya pinaagig pagpalakpak sa dihang atong makita ang mga tawo nga nagabarog dapig kang Jehova. Sa laing bahin, ang mga pasundayag sa way-pugongpugong nga panaghugyaw, mga pagpangamay, ug pagtawag sa mga ngalan maoy dili tukma. Ang maong panggawi nagapakitag kakulang sa apresasyon sa pagkasagrado niining pagpasundayaga sa pagtuo. Ni kini maoy angayng panahon nga mohatag ug mga bulak o ubang mga gasa ngadto sa mga gibawtismohan samtang sila mokawas gikan sa bawtismohanan. Ang bawtismo nagatimaan sa sinugdanan sa Kristohanong lumba alang sa kaluwasan. Atong ikapakita ang atong kalipay pinaagig pagtabang sa bag-ong mga nabawtismohan sa pagpabili sa suod nga relasyon uban kang Jehova nga gibuksan sa bawtismo alang kanila.

Ang dapit bawtismohanan dili ang hustong lugar sa pagduladula, paglangoylangoy, o ubang panggawi nga magpasimang gikan sa pagkaseryoso sa maong okasyon. Ang atong kangaya ikabutyag diha sa maligdong nga paagi. Ang atong kahapsay ug pagkaseryoso mopadugang sa kangaya sa tanan nga presente.