Pagdawat, Pagpadapat, ug Pagbenepisyo Gikan sa Pulong sa Diyos
1 Bisan pa nga minilyon sa katawhan adunay kopya sa Bibliya, kadaghanan wala magapadapat sa maalamong tambag niini, ug busa pipila ra ang nakapulos gikan niana. Hinuon, ang katawhan ni Jehova nagatuo nga kini mapuslanon sa tanang butang. (2 Tim. 3:16, 17) Busa, ang tema sa programa sa sirkitong asembliya sa 1993 maoy “Pagdawat, Pagpadapat, ug Pagbenepisyo Gikan sa Pulong sa Diyos.”
2 Aduna unyay mga pakigpulong, mga pasundayag, mga kasinatian, ug mga interbiyu nga modasig nato ug mobulig nato sa pagpadapat sa Pulong sa Diyos sa mas bug-os pa diha sa tanang bahin sa kinabuhi. Ang programa sa Sabado sa hapon magatagad sa tambag ug disiplina sulod sa pamilya maylabot sa lulinghayaw, asosasyon, ug materyalismo. Kini magapakita kon sa unsang paagi kinahanglan tang malahi gikan sa kalibotan ug dili mosagop sa daotang panggawi ug malaw-ay nga pinulongan niini. Dugang pa, ang pagdasig itagana aron makabenepisyo sa tagsaanong mga ginikanan ug walay amahan nga kabataan.
3 Usab, sa Sabado ang bag-ong dedikadong mga tawo may kahigayonan nga mabawtismohan. Kadtong nagaplanong magpabawtismo kinahanglang mopahibalo sa ilang tinguha sa labing sayong maarangan ngadto sa nagadumalang magtatan-aw aron nga siya may igong panahon sa paghikay alang sa mga ansiyano nga morepaso sa mga pangutana alang sa mga kandidato sa bawtismo.
4 Ang programa sa Domingo sa buntag magasusi sa mga paagi nga kita nalahi gikan sa kalibotan pinaagig pagpahiuyon sa Pulong sa Diyos. Ang kahinungdanon sa atong panagway ug kon sa unsang paagi malikayan ta ang pagdunot sa atong hunahuna pagasutaon. Sa pagkahapon, ang magtatan-aw sa distrito mopahayag sa pakigpulong publiko nga nag-ulohang “Unsay Nagatimaan sa Bibliya Ingon nga Kasaligan?” Paneguroon ta gayod nga madapit ang tanang interesadong tawo ngadto niining maayong programa.
5 Ang mga petsa ug dapit niining programa sa sirkitong asembliya ihatag sa inyong magtatan-aw sa sirkito, ug kami nagadasig kaninyong tanan sa pagtambong aron nga makadawat, makapadapat, ug makakuhag kaayohan gikan sa tambag sa Pulong sa Diyos.—Sant. 1:22-25.