Pangutana

◼ Sa unsang paagi mahimong atimanon sa magtatan-aw sa pag-alagad ang buluhaton sa ministeryal nga mga alagad nga nagakupot sa mga departamento sa literatura ug magasin?

Ang kaakohan sa magtatan-aw sa pag-alagad dili lamang limitado sa pagduaw sa mga grupo sa pagtuon sa libro sa binulan nga paagi ug paghikay sa regular nga mga tigom alang sa pag-alagad sa kanataran. Kining ansiyanoha interesado gayod sa tanan nga makaapektar sa pagwaling buluhaton diha sa teritoryo sa kongregasyon.

Iyang panegurohon nga sa kada bulan mabatonan ang igong mga suplay sa literatura ug mga magasin nga igtatanyag ug nga kana anaa sa maayong kahimtang. Tungod niini siya nagapaigo sa daghang mga kaakohan sa ministeryal nga mga alagad nga natudlo sa pagdumala sa literatura ug mga magasin.

Ang magtatan-aw sa pag-alagad magahatag ug linaing pagtagad sa mga pahibalo sa umaabot nga mga tanyag sa literatura sa dihang kini makita sa Atong Ministeryo sa Gingharian. Siya ug ang igsoong lalaki nga nagaatiman sa literatura maneguro nga ang igong gidaghanon sa basahon mabatonan aron magamit, pero kinahanglang mag-amping sila nga dili mohangyo ug daghan kaayo. Kon ang usa ka basahon gamiton sa kanataran sa unang higayon o kon sa dili madugay pagatun-an kini sa kongregasyon, kini angayng pagatagdon sa dihang ang usa ka order ipadala sa Sosyedad. Kon ang basahon gitanyag na kaniadto, ang taho sa pag-alagad sa kanataran sa kongregasyon sa miaging kampanya magpaila kon paigo ba ang mga suplay nga anaa. Siyempre, pagatagdon usab ang gidaghanon sa mga magmamantala nga mag-oksilyare payunir nianang bulana ingon man ang pagtubo sa gidaghanon sa mga magmamantala ug mga regular payunir sukad sa miaging higayon nga gitanyag ang maong basahon. Ang literatura kinahanglang mabatonan una pa ug human sa mga tigom sa kongregasyon. Ang literatura kinahanglang tukmang gitipigan sa mahinlo, uga nga dapit aron malikayan ang bisan unsang kadaot.

Ang magtatan-aw sa pag-alagad mokooperar usab sa igsoong lalaki nga nagaatiman sa departamento sa magasin. Sa pupanahon, ang magtatan-aw sa pag-alagad ug ang igsoong lalaki nga nagadumala sa mga magasin magatandi sa gidaghanon sa mga magasin nga giorder kada bulan sa gidaghanon sa mga magasin nga aktuwal napahimutang sa ministeryo. Hayan may pipila ka magmamantala nga kinahanglang magkunhod sa ilang gihangyong gidaghanon sa mga magasin kon kini kanunayng nagtipun-og sa ilang mga balay. Ang mga magasin dili gayod angayng usikan.

Nga anaa sa hunahuna ang samang mga prinsipyo, ang magtatan-aw sa pag-alagad kinahanglang mosusi sa personal sa kantidad sa igtatanyag nga literatura nga gihangyo sa kongregasyon diha sa Literature Order Form (S-14). Unya iyang ihatag ang maong porma sa sekretaryo sa kongregasyon, kinsa maampingong mosusi sa uban pa diha sa porma, nga nagahatag ilabinang pagtagad sa gidaghanon sa espesyal-gihangyong mga aytem nga nalista.

Siyempre, kon ang natudlong mga igsoong lalaki may mga pangutana maylabot sa ilang paggamit sa mga porma ug pagtipig sa rekord, ang sekretaryo malipay nga moabag niining bahina sa ilang buluhaton.