Mga Magtatan-aw nga Nagapanguna—Ang Magtatan-aw sa Pag-alagad
1 Ang magtatan-aw sa pag-alagad idlot nga interesado sa tanang butang nga nalangkit sa pag-uswag sa buluhaton sa pag-ebanghelyo diha sa natudlong teritoryo sa kongregasyon. Busa nagdula siyag hinungdanong papel sa pagtabang kanato sa pagtuman sa atong responsabilidad sa pagsangyaw sa maayong balita. Ingong usa ka masibotong tig-ebanghelyo, manguna siya sa pag-organisar sa tanang butang nga nalangkit sa pag-alagad sa kanataran. Ingong usa ka takos nga magtutudlo, tabangan niya ang indibiduwal nga mga magmamantala nga mouswag sa ilang kaepektibo diha sa ministeryo.—Efe. 4:11, 12.
2 Kining ansiyanoha mao gayod ang maglantaw sa buluhaton sa ministeryal nga mga alagad nga gitudlo sa pagdumala sa literatura, mga magasin, ug mga teritoryo. Siya ang responsable sa pagtino nga ang igong suplay sa literatura, mga magasin, ug mga porma sa pag-alagad mabatonan sa matag bulan aron atong magamit.
3 Ang magtatan-aw sa pag-alagad maoy responsable sa pag-atiman sa nagkadaiyang mga bahin sa pagsangyaw, lakip ang pagsangyaw diha sa dapit sa negosyo, sa dalan, ug pagpamatuod pinaagig telepono. Igmat siya sa pag-organisar ug praktikal nga mga kahikayan sa pagtagbo alang sa pagsangyaw sa tibuok semana, lakip sa mga pista opisyal. Magpakita siyag tiunay nga interes sa buluhaton sa pagtuon sa Bibliya. Mangita siyag mga paagi sa paghatag ug espirituwal nga tabang niadtong nahimong di-makanunayon o di-aktibo diha sa ministeryo. Mabalak-on siya kaayo bahin sa kalihokan sa mga payunir, ug iyang dumalahon ang programa nga Mga Payunir Motabang sa Uban.
4 Ingon nga membro sa Komite sa Pag-alagad sa Kongregasyon, ang magtatan-aw sa pag-alagad mosugyot ug bisan unsang gikinahanglang mga pagpasibo sa mga grupo sa Pagtuon sa Libro sa Kongregasyon. Sa dihang siya moduaw sa inyong grupo, segurohang motambong ug moduyog uban kaniya diha sa pag-alagad sa kanataran.
5 Ang tanan diha sa kongregasyon kinahanglang kinabubut-ong mokooperar sa direksiyon nga ihatag sa magtatan-aw sa pag-alagad. Magtabang kini kanato sa pagpauswag sa atong kaepektibo diha sa paghimog-tinun-an nga buluhaton ug pagkaplag ug mas dakong kangaya diha sa atong ministeryo.