Mga Pasiuna sa Paghaling sa Interes

¹ Si Jesus maoy batid sa iyang paggamit ug mga pasiuna. Bisan kon nakigsulti sa usa ka dakong grupo o sa usa ra ka tawo, si Jesus nakasikop sa pagtagad sa iyang mamiminaw pinaagig personal nga paglangkit kanila. Iyang gipakita sa iyang mga mamiminaw ang kahinungdanon sa iyang ulohan.​—Mat. 5:3-12; Luc. 20:25-37; Juan 4:7-30.

² Abanteng Pangandam Gikinahanglan: Aron nga mahaling ang interes sa atong mensahe, gikinahanglan tang ipahiuyon ang atong mga pasiuna aron nga kana maglangkit sa indibiduwal, mopunting sa iyang mga kabalaka, ug magpakita nga ang mensahe sa Gingharian makabulig kaniya sa personal.

³ Sa pagpangandam alang sa ministeryo, repasoha ang karong mga kabalaka sa katawhan sa komunidad. Unsa man ang makapainteres sa usa ka batan-on? Sa usa nga mas edaran? Ngadto sa mga bana, mga asawa, o mga ginikanan? Inay nga gamiton ang samang pasiuna sa kada pultahan, maoy sagad nga epektibo ang pag-andam ug pipila ka pasiuna ug magmaandam nga ipasibo kana sa dihang mapanid-an mo ang sanong sa mga tagbalay. Kini makapahupot sa imong paagi nga presko ug makapainteres.

⁴ Sa bulan sa Pebrero, buot mong mogamit ug usa ka presentasyon nga sama niini uban sa librong “Mabuhing Walay Kataposan”:

◼ “Maayong buntag. Kami nakigsulti sa pipila ka silingan maylabot sa kon unsang mga hiyasa ang buot nilang makita sa usa ka tawo nga nagamando sa uban. Makapangutana ba ako kon unsang mga hiyasa ang imong gihunahunang labing importante? [Tugoting motubag.] Nahibalo ka ba nga ang Bibliya nagahubit sa mga kuwalipikasyon sa Usa nga giuyonang mahimong magmamando sa katawhan? Ania kana dinhi sa Isaias 9:6, 7. [Basaha.] Unsay imong paghunahuna nga mahisama unya ang pagkinabuhi ubos sa maong magmamando? Tugoting motubag ug dayon dad-a ang pagtagad ngadto sa librong Mabuhing Walay Kataposan sa mga panid 112 ug 113 aron halingon ang dugang panaghisgot.

⁵ Kon makigsulti ka sa mga pamilya, ang mosunod nga mga presentasyon mosaler kaayo sa dihang nagapaila sa librong Mabuhing Walay Kataposan.

Human sa lokal nga pagtimbaya, makaingon ka:

◼ “Namatikdan ba nimo nga ang matag adlaw nga kapit-osan ug mga suliran nagapatunghag tinuod gayod nga hagit ngadto sa mga pamilya karon? [Tugoting motubag.] Aduna ka bay opinyon kon asa makaliso ang mga pamilya alang sa maayong tambag? [Tugoting motubag.] Kami nagatultol sa pagtagad ngadto sa giingon sa Bibliya bahin niining ulohana. Matikdi kon unsay gipahayag sa Tigmugna sa kaminyoon ngadto sa unang tawhanong paris.” Basahang Genesis 1:28 ug dayon pakliang panid 238 diha sa librong Mabuhing Walay Kataposan ug ipadayon ang inyong panaghisgot, nga nagagamit sa mga puntos gikan sa kapitulo 29.

⁶ Pinaagig pagsundog sa mga paagi ni Jesus sa pagsikop sa interes ug paglangkit sa mga mamiminaw diha sa mga panaghisgot, ikapakita ta ngadto sa mga mabuot-kasingkasing ang kahinungdanon sa espirituwal nga mga butang.