Ipaambit ang Tukmang Kahibalo sa Pebrero
1 Diha sa atong ministeryo sa kanataran sa Pebrero, atong itanyag ang librong Mabuhing Walay Kataposan. Unsa may imong isulti aron makasugod ug usa ka tukma-panahong panaghisgot sa Bibliya, ug unsaon man nimo pagpaila kining maayong basahon?
2 Paggamit sa Atong Bag-ong Tracts: Ang pipila ka magmamantala nakakaplag ug kalamposan sa paggamit sa tracts aron pagpukaw sa interes sa tawo, bisan una pa motanyag ug ubang basahon. Sa unsang paagi mabuligan kita sa pagpalampos niini? Pinaagig pagtanyag sa atong bag-ong tract nga Molungtad ba Kining Kalibotana?
Human sa tukmang pangumosta, makaingon ka:
◼ “Kami nagasukna sa mga tawo kon ila bang gibati nga adunay paglaom alang sa mas maayong kinabuhi. Unsay imong hunahuna? [Tugoting motubag.] Matikdi dinhi sa Juan 17:3 kon unsay giingon sa Bibliya. [Basaha.] Ang Diyos ug si Jesu-Kristo lamang ang makatanyag kanatog kinabuhing walay kataposan. [Pakliang panid 3 sa tract.] Si Jesus mibatbat sa mga hitabo nga mahitabo una pa ang kataposan sa kalibotan. Apan iyang giingnan ang iyang mga tinun-an nga magmaya tungod kay kining mga hitaboa nagakahulogan nga ang kaluwasan nagakahiduol na.” Unya ikapakita mo ang pipila ka hulagway diha sa kapitulo 19 sa librong Mabuhing Walay Kataposan aron pagpakita sa pipila sa mga panalangin sa pagmando sa Gingharian.
3 Ang usa ka batan-on o bag-ong magmamantala hayan mogamit sa mga ilustrasyon diha sa tract ingong usa ka pasiuna.
Sa paggamit sa ‘tract’ nga “Molungtad ba Kining Kalibotana?,” ang usa ka magmamantala makapakli sa mga panid 3 ug 4 ug moingon:
◼ “Matikdi kining duha ka hulagway, usa ka ayroplanong naghulog ug mga bomba sa panahon-gubat ug ang ikaduha iya sa gigutom nga bata. [Paklia sa panid 5.] Tan-awa kining mga hulagwaya sa usa ka linog ug sa usa ka masakitong tawo diha sa usa ka katre sa ospital. [Hunong makadiyot.] Ang Bibliya nagapakita nga kanang teribleng mga butang pagataposon sa di-madugay.”
4 Kon ang tawo interesado, basahang Pinadayag 21:3, 4 mahimong diha sa Bibliya o diha sa tract sa panid 6. Dayon ikapakita mo ang tukmang bahin sa librong Mabuhing Walay Kataposan, sama sa mga ilustrasyon sa mga panid 9 ug 11-13.
5 Ipahimutang ang Sukaranan Alang sa Umaabot nga Duaw: Siyempre, kon kita nakabilin man ug tract, o nakapahilunag librong Mabuhing Walay Kataposan, o nakahimo lamang ug usa ka maayong panaghisgot, makaingon ta: “Sa sunod higayon nga ako moanhi, buot kong mopaambit ug usa ka makapainteres nga punto uban kanimo bahin sa mga tagna sa Bibliya nga nagapakitang kita karon nagapuyo na sa mga ganghaan sa usa ka bag-ong kalibotan.” Paneguroang ikanota gayod ang maong duaw ug ang interes nga gipakita, ug balikduawa sa di-madugay aron maugmad ang interes ug tingali masugdan ang usa ka pagtuon sa Bibliya.
6 Ang Gingharian nagatanyag sa bugtong lunsay nga paglaom sa katawhan. Ipasundayag ta ang atong mainitong tinguha sa pagpaambit ngadto sa tanang atong ikahibalag ang “tukmang kahibalo sa balaang tinago sa Diyos.”—Col. 2:2.