Ikaw ba Makaalagad Kang Jehova Ingong Payunir?

¹ Sa usa sa “Mga Tigdala sa Kahayag” nga mga Distritong Kombensiyon, ang usa ka mamumulong misukna: “Makapayunir ka ba? Mopayunir ka ba?” Siya miingon nga kining mga pangutanaha maoy angay tungod kay ang Armageddon haduol na kaayo, ug kini nagahimo sa pagsangyawng buluhaton nga mas dinalian kay sukad masukad.​—1 Cor. 7:29a.

² Walay duhaduha nga ang pagpayunir maoy mahagoong buluhaton. Kini nagakinahanglag disiplina-kaugalingon ug maayong organisasyon. Bisan pa niana, ang kahago ta sa ministeryo “dili makawang.” (1 Cor. 15:58) Ang susama ikaingon ba ngadto sa ubang mga kalihokan nga makahurot sa atong panahon ug kusog? Ang gugma kang Jehova magtukmod sa mga Kristohanon nga magmasiboton diha sa iyang pag-alagad, ug kini nagtultol sa daghan ngadto sa payunir nga buluhaton.​—1 Juan 5:3; Pin. 4:11.

³ Daghang batan-ong alagad ni Jehova nga mao pay pagkatapos sa hayskul ang seryosong nagahunahuna bahin sa pagpayunir. Kana nahiangay gayod. Unsa pa mang laing karera ang mas importante kay sa bug-os panahong ministeryo?​—Mat. 6:33; 24:14.

⁴ Kamo bang mga ginikanan nagadasig sa inyong mga anak sa pagsulod sa bug-os panahong pag-alagad? Ang inyo bang mga anak tin-awng nakasabot nga buot ninyong gamiton nila ang ilang tibuok kasingkasing, kalag, hunahuna, ug kusog diha sa mapuslanong buluhaton? (Mar. 12:30) Daghang batan-ong magmamantala ang nangandam sa ilang kaugalingon alang sa regular payunir nga buluhaton pinaagig pagpakig-ambit ingong oksilyare nga mga payunir sa matag kahigayonan sulod sa mga tuig sa ilang pag-eskuwela. Sa pagkatinuod kanang maong debosyon ngadto kang Jehova nagapalipay sa iyang kasingkasing!​—Prov. 27:11.

⁵ Siyempre, dili ang tanan may mga kahimtang nga magatugot alang sa payunir nga pag-alagad. Hinuon, bisan minyo man o tagsaanon, batan-on o tigulang sa panuigon, gitagad mo ba nga mainampoon ang pag-alagad kang Jehova ingong usa ka payunir? (Col. 3:23) Daghang batan-ong magtiayon naningkamot nga mapalapad ang ilang ministeryo aron nga ang usa o silang duha makapayunir.

⁶ Kon ikaw wala pa sa posisyon nga magregular payunir karon, makaalagad ka ba ingong usa ka oksilyare payunir? Hayan daghang magmamantala sa inyong kongregasyon ang nagaplano nga mobuhat niana sa Abril ug Mayo. Makaduyog ka ba nila? Bisan pa nga ang tanang maunongong alagad ni Jehova nagadawat ug daghang panalangin, ang dugang mga panalangin nagahulat niadtong kinsa nagagugol ug dugang pang panahon diha sa pag-alagad sa Gingharian sa pagpangita sa samag-karnerong mga tawo.​—Buh. 20:35.