Pagtuon sa Ang Labing Bantogang Tawo nga Nabuhi Sukad
1 Sa semana sa Pebrero 8-14, sugdan ta ang pagtuon sa Ang Labing Bantogang Tawo nga Nabuhi Sukad diha sa atong mga Pagtuon sa Libro sa Kongregasyon. Pagkamakapalipay gayod unya ang pagrepaso sa kinabuhi ug ministeryo ni Jesu-Kristo! Sanglit kay ang libro gidesinyo nga may pagkalahi sa ubang mga libro nga ato nang natun-an, ang pipila ka giya mapuslanon.
2 Ang libro walay mga numero sa panid, busa ang eskedyol nga ipahibalo diha sa Atong Ministeryo sa Gingharian sugod sa sunod bulan maglista sa mga kapitulo nga pagatun-an, sagad tulo o upat sa matag semana. Ang mga kapitulo 35, 111, ug 116 mas tag-as ug pagabahinon ang kada usa ngadto sa duha ka pagtuon. Human ikapabasa ngadto sa usa ka kuwalipikadong igsoong lalaki ang entirong kapitulo (o ang entirong sub-ulohan, sama sa mga kapitulo 35, 111, ug 116), ang konduktor sa pagtuon mosukna sa mga pangutana diha sa kataposan sa kapitulo nga mitakdo sa kapitulo o bahin nga bag-o pang gibasa. Ang mga tubag wala kanunay magsunod diha sa kapitulo. Ang mubo ug laktod nga mga komento kinahanglang ipasukad sa materyal diha sa leksiyon.
3 Human niana, segon sa itugot sa panahon, ang tanang kasulatan nga gisitar diha sa kataposan sa kapitulo kinahanglang basahon. Ang tag-as nga mga gisitar nga kasulatan mahimong bahinon ngadto sa mas gagmayng mga bahin aron pagtugot sa nagkalainlaing mga magmamantala nga makaambit sa pagbasa, ug unya ikahatag ang mga komento diha sa gibasa. Ang tukmang mga pangutana nga giandam sa konduktor makabulig sa pagpatungha sa makahuloganong mga komento nga nagapakita kon sa unsang paagi ang mga kasulatan nga gibasa may kalabotan sa kon unsay gipatugbaw diha sa libro. Ang tanang pangutana ug mga komento kinahanglang makatabang sa mga nanambong sa pagbug-os sa pagtagad diha kang Jesu-Kristo, sa iyang kurso sa kinabuhi, ug sa iyang mga pagtulon-an.
4 Ang librong Labing Bantogang Tawo nagatagad sa kinabuhi ni Jesus sa kronolohikanhong han-ay. Ang paghanduraw sa mga hitabo ug pagtumong sa hunahuna kon diin kana nahitabo makabulig gayod sa paghinumdom niana. Busa, paneguroang matagad ang mabulokong mga ilustrasyon ug himoang kanunayng pagpunting ngadto sa mapa nga makita diha sinugdanan sa libro, human sa pasiuna.
5 Ang pasiuna sa libro pagatagdon sa unang semana. Human mabasa ang tanang parapo ubos sa sub-ulohan, ang konduktor mosuknag tukmang mga pangutana nga iyang giandam. Kining pasiunang konsiderasyon magaandam sa tanan alang sa mosunod nga mga pagtuon sa umaabot nga tuig. Ang gidak-on sa kalamposan sa pagkobre sa materyal magadepende sa dakong gilapdon diha sa pagpangandam sa tanang nanambong. Ang konduktor ilabina kinahanglang mangandam pag-ayo kada semana aron mabuligan ang grupo nga masinati kaayo sa labing bantogang tawo nga nabuhi sukad, ang atong Ginoo ug Manluluwas, si Jesu-Kristo.