Kinsay Nagabuhat sa Kabubut-on ni Jehova Karon?
1. Kanus-a nato sugdan ang pagtuon sa Kinsay Nagabuhat sa Kabubut-on ni Jehova Karon? ug sa unsang paagi kini makatabang kanato?
1 Sugod sa semana sa Oktubre 28, ang Kinsay Nagabuhat sa Kabubut-on ni Jehova Karon? maoy gamiton sa Pagtuon sa Kongregasyon sa Bibliya. Kining brosyura, nga giluwatan sa “Ampingi ang Imong Kasingkasing!” nga Distritong Kombensiyon, gidisenyo aron agakon ang mga Bible study sa organisasyon. Ang pagtuon niini makapalalom sa atong apresasyon nga kita bahin sa organisasyon ni Jehova ug makatabang usab nga masinati pag-ayo niining mapuslanong gamit para sa ministeryo.—Sal. 48:13.
2. Unsa ang paagi sa pagtuon sa brosyur sa kongregasyon?
2 Ang Paagi sa Pagtuon Niini: Ang nagdumala kinahanglang magbahin sa iyang panahon aron maangay pagkobre ang kada leksiyon. Iyang ipaila ang kada usa sa 28 ka leksiyon pinaagi sa pagbasa sa pangutana nga mao ang ulohan. Unya ipabasa niya sa magbabasa ang unang parapo. Dayon isukna sa nagdumala ang pangutana nga iyang giandam para niini. Human niana, ang matag seksiyon nga gisugdan sa bagang mga letra angayng basahon ug hisgotan. Humag basa, pakomentohon ang mga nagtambong kon sa unsang paagi kini nagtubag sa pangutana sa ulohan. Ang brosyur daghan sab ug hulagway nga mahimong pakomentohan. Kon itugot sa oras, angayng basahon ang pangunang mga teksto. Sa dili pa hisgotan ang sunod nga leksiyon, isukna sa nagdumala ang mga pangutana sa ubos sa panid ingong repaso. Kon dunay kahong “Pagsusig Dugang,” iya kanang ipabasa, ug pakomentohan kon sa unsang paagi makabenepisyo ang Bible study dihang sundon niya ang sugyot. Sa paniklop, mahimong isukna sa nagdumala ang ulohan sa mga leksiyon ingong repaso, kon may oras pa. Hinumdomi nga wala kini magpasabot nga mao gayod kini ang paagi nga sundon sa pagdumalag Bible study.
3. Sa unsang paagi bug-os kitang makabenepisyo sa pagtuon niini nga brosyur?
3 Aron bug-os makabenepisyo, tun-i ang leksiyon sa dili pa motambong. Paningkamot sa pagkomento. Panahon sa panaghisgot, hunahunaa kon nganong ang impormasyon makatabang sa mga Bible study. Hinaot ang atong pagtuon niining bag-ong brosyur magsangkap kanato sa pag-agak sa uban sa pagbuhat usab sa kabubut-on sa Diyos, aron makabaton usab silag paglaom sa kinabuhing walay kataposan.—1 Juan 2:17.