Kon Unsaon Paggamit ang Kinsay Nagabuhat sa Kabubut-on ni Jehova Karon?
Bag-ong Brosyur nga Gidisenyo Aron Giyahan ang mga Bible Study Ngadto sa Organisasyon
1. Unsa ang tulo ka katuyoan sa brosyur nga Kabubut-on ni Jehova?
1 Nasulayan na ba nimo paggamit ang bag-ong brosyur nga Kinsay Nagabuhat sa Kabubut-on ni Jehova Karon? Ang katuyoan niini maoy aron (1) masinati ang mga estudyante sa Bibliya kon kinsa kita, (2) masayod sila sa atong mga buluhaton, ug (3) makita nila kon sa unsang paagi nagalihok ang atong organisasyon. Ang brosyur nga Kabubut-on ni Jehova adunay usa ra ka panid nga mga leksiyon nga dali rang makobrehan sa lima ngadto sa napulo ka minuto human sa matag pagtuon.
2. Unsa ang pagkadisenyo niini nga brosyur?
2 Ang Pagkadisenyo Niini: Kini nga brosyur gibahin sa tulo ka seksiyon, nga ang matag usa niini naghisgot sa lainlaing aspekto bahin sa organisasyon ni Jehova. Ang ulohan sa tanang 28 ka leksiyon gipresentar ingong pangutana, ug ang bagag letrang mga sub-ulohan sunod niini nagtubag sa maong pangutana. Ang mga hulagway sa kapig 50 ka nasod may mga kapsiyon nga nagpakitang internasyonal ang atong buluhaton. May mga leksiyon diin makita ang mga kahon nga “Pagsusig Dugang,” nga may mga awhag nga imong ikasugyot sa imong estudyante nga buhaton.
3. Unsaon nato paggamit ang brosyur nga Kabubut-on ni Jehova?
3 Kon Unsaon Nimo Kini Paggamit: Una, ipakita ang pangutana nga maoy ulohan sa leksiyon. Dayon, samtang inyong basahon ang leksiyon, ipasiugda ang bagag letrang mga sub-ulohan. Sa kataposan, tubaga ang repasong mga pangutana sa kinaubsan sa panid. Mahimong hutdon nimo pagbasa ang leksiyon o tagsatagsaon pagbasa ug paghisgot ang mga seksiyon niini. Depende na nimo kon unsang gisitar nga teksto ang basahon. Ayaw kalimti paghisgot ang mga hulagway ug ang mga kahon nga “Pagsusig Dugang.” Sagad, ang mga leksiyon hisgotan nga sunodsunod. Pero, puwede nimong unahon ang ubang mga leksiyon nga buot nimong ipasiugda sa estudyante. Pananglitan, kon may umaabot nga asembliya o kombensiyon, puwede kang moderetso sa leksiyon 11.
4. Nganong malipayon ka nga ikaw nakabaton niining bag-ong galamiton?
4 Kon may Bible study ta, ato siyang tabangan nga mailhan ang atong langitnong Amahan. Apan, kinahanglan usab nato siyang tudloan bahin sa organisasyon ni Jehova. (Prov. 6:20) Malipayon gayod kita nga duna tay bag-ong galamiton nga makatabang nato niini!