Usa ka Bag-ong Galamiton sa Pagtabang sa mga Tawo nga Makakat-on sa mga Kinahanglanon sa Diyos
“ANG yano, direkta, ug malulotong paagi niini makapatunghag mga resulta nga molabaw sa mga pagdahom. Ang mga ulohan gipresentar nga dili-komplikado ug sa maayong paagi nga ang bisan kinsang tim-os, nagasusi nga tawo matukmod sa pag-ingon, ‘Ang Diyos anaa gayod taliwala kaninyo.’” (1 Corinto 14:25) Maoy ingon sa usa sa mga Saksi ni Jehova sa Thailand sa dihang naghubit sa bag-ong brosyur, Unsay Gikinahanglan sa Diyos Kanato? Giluwat kini sa Watch Tower Society sa “Mga Mensahero sa Diyosnong Pakigdait” Distritong mga Kombensiyon sa 1996/97.
Kining 32-panid, daghag-kolor nga brosyur gidisenyo ingong kurso sa pagtuon sa Bibliya. Nagkobre kini sa pangunang mga pagtulon-an sa Bibliya. Ang pamulong yano ug mugbo, nga nagbatbat nga tin-aw kon unsay gikinahanglan sa Diyos kanato. Ang mga magbabasa dili gayod malisdan sa pagsabot niini. Unsaon nimo pagdumala ug pagtuon sa Bibliya niining bag-ong brosyur?
Gamita ang mga pangutana. Adunay mga pangutana sa sinugdan sa matag leksiyon. Sa parentesis tapos sa matag pangutana, imong makita ang mga numero sa mga parapo nga niana makita ang mga tubag. Kini nga mga pangutana mahimong gamiton ingong pasiuna ug ingong repaso nga tabang sa pagtudlo. Pananglitan, sa pagsugod sa usa ka pagtuon sa Bibliya sa balay, ikaw tingali mosukna sa estudyante sa mga pangutana aron makuha ang iyang mga komento. Imbes nga itul-id ang bisan unsang sayop nga mga tubag dihadiha, ikaw mahimong mopadayon sa pagtuon. Sa kataposan sa matag leksiyon, ikaw mobalik sa mga pangutana sa pagtino kon ang estudyante makahimo na karon sa pagtubag niini nga uyon sa Bibliya.
Tan-awa ang mga kasulatan. Sa matag leksiyon, ang mugbong mga pahayag sa mga kamatuoran sa Bibliya ginaubanan sa nagapaluyong mga kasulatan. Sanglit kadaghanan sa mga kasulatan gisitar, wala kutloa, hinungdanon nga dasigon ang estudyante nga tan-awon kini nga mga teksto diha sa iyang kaugalingong Bibliya. Siya kinahanglang mobasa ug magpalandong sa Pulong sa Diyos sa dili pa niya kini ikapadapat sa kinabuhi.—Josue 1:8.
Ipasiugda ang mga hulagway. Ang brosyur madagayaong nag-ilustrar sa mga hulagway ug mga dibuho—kapin sa 50 ka tipik nga buhat sa arte tanantanan. Kini gitagana dili lamang sa pagdani sa panan-aw kondili usab ingong dugang nga mga tabang sa pagtudlo. Pananglitan, ang kataposang duha ka leksiyon (usa ka panid matag usa, sa nag-atubang nga mga panid) nag-ulohang “Pagtabang sa Uban sa Pagbuhat sa Kabubut-on sa Diyos” ug “Imong Desisyon sa Pag-alagad sa Diyos.” Ang mga hulagway nga makita diha sa duha ka panid nagsubay sa espirituwal nga pag-uswag sa samang tawo, nga nagpakita kaniya nga nagasangyaw nga impormal, nagapakigbahin sa balay-ug-balay nga buluhaton, naghimo sa iyang pagpahinungod, ug sa kataposan nagpabawtismo. Pinaagi sa pagtultol sa pagtagad sa estudyante niini nga mga hulagway, imong gitabangan siya nga makita ang mga lakang nga gikinahanglan aron sa pag-alagad sa Diyos.
Komosta kon ang interesadong tawo dili maayong mobasa o dili gayod makamaong mobasa? Ang Sosyedad naghimo niining bag-ong brosyur nga mabatonan sa audiocassette diha sa daghang pinulongan. Ang cassette naundan sa teksto sa brosyur ingon man sa daghang gisitar nga mga kasulatan. Girekord kini sa mosunod: Ang unang pangutana gibasa, gisundan sa parapo (o mga parapo) nga nagtubag niini, uban sa pipila ka gisitar nga mga kasulatan. Dayon ang sunod nga pangutana gibasa, gisundan sa teksto ug sa mga kasulatan nga nagtubag niini, ug padayon. Ang estudyante makapaminaw sa rekording samtang siya nagaandam alang sa pagtuon. Ang cassette magamit usab sa dihang magdumala ug pagtuon.
Kadtong diha sa kombensiyon naghinamhinam sa paggamit niining bag-ong brosyur sa ilang ministeryo sa kanataran. Pananglitan, mga adlaw lamang human madawat ang brosyur, duha ka payunir (bug-os panahong mga ebanghelisador) gikan sa Tinipong Bansa nakapahimutang niini sa batan-ong magtiayon nga ilang giduaw. Sa dihang gitan-aw sa magtiayon ang mga kaundan, ang leksiyong “Mga Buhat nga Gidumtan sa Diyos” nakakuha sa ilang pagtagad. “Naghunahuna ako kanunay nga ang Diyos dili magdumot—siya kanunayng mahigugmaon,” nag-ingon ang batan-ong babaye. “Kini maoy akong unahon pagbasa.” Sa dihang ang duha ka payunir mibalik sa misunod nga semana, ang batan-ong babaye miingon: “Akong gibasa ang bag-ong brosyur. Lisod kaayong buhaton ang tanang butang nga angay namong buhaton. Si Jehova wala mahimuot kanamo—kami wala makasal. Apan nakadesisyon na kami. Gihikay na namo nga magpakasal sa sunod nga Biyernes.” Mihalog sa duha ka payunir, sila midugang: “Gikasubo namo nga dili regular ang pagtuon, apan kini naghatag kanamog dakong kahupayan.”
Sa tanang paagi, gamita ang bag-ong Gikinahanglan nga brosyur. Usa kini ka maayong galamiton sa pagtabang sa uban nga makakat-on sa mga kinahanglanon sa Diyos.
[Hulagway sa panid 17]
Unsaon nimo paggamit ang bag-ong brosyur?