Tabangi ang mga Di-Batid nga Makasabot
1 Sa atong paghimog tinun-an nga buluhaton, ginatudloan nato ang uban kon unsay gikinahanglan sa Diyos kanila. (Mat. 28:19, 20) Ang kalamposan niining buluhatona dili masukod pinaagig mga oras nga gigahin, sa literatura nga napahiluna, o sa mga pagtuon sa Bibliya nga nasugdan. Atong makab-ot ang atong tumong sa dihang ang mga tawo makasabot ug molihok kon unsay ilang makat-onan.
2 Ang pagtabang sa uban sa espirituwal nagalangkit sa “paghimo sa mga di-batid nga makasabot.” (Sal. 119:130) Ang mga kasingkasing matandog ug ang katawhan mapalihok lamang sa dihang ilang ‘masabtan ang diwa niini.’ (Mat. 15:10) Samtang nagadako ang atong buluhaton, mapabilhan nato sa dugang ug dugang pa ang panginahanglan sa pagsulti ug pagtudlo uban ang kayano. Mao kanay hinungdan kon nganong ang Sosyedad nagpatik sa brosyur nga Unsay Gikinahanglan sa Diyos Kanato? Ang mga leksiyon mugbo, ang pamulong di-lisod, ug ang instruksiyon sayong sabton.
3 Kining brosyura itanyag duyog sa mga magasin sulod sa mga bulang Abril ug Mayo. Girekomendar nga maghikay ka sa pagtanyag ug mga magasin sa mga Sabado ingon sa naandan apan itanyag ang brosyur sa ubang mga adlaw sa semana. Dad-a ang brosyur ngadto sa mga tawo nga midawat ug literatura sa miagi. Hinumdomi nga makatabang kini ilabina sa pagtudlo sa mga bata ug niadtong limitado ang katakos sa pagbasa.
4 Gamita ang Yanong Paagi: Sa dihang magtanyag sa Gikinahanglan nga brosyur, tan-awa ang panid 2, diin gisaysay niini nga “gilaraw kini nga brosyur ingong usa ka tun-anan sa Bibliya.” Ipunting sa parapo 3 sa panid 3 aron ipakita kon nganong ang tawo kinahanglang magtuon sa Bibliya. Pukawa ang iyang interes uban sa pipila ka ulohang mga tun-anan nga nagbutyag sa simpleng mga kamatuoran sa Bibliya. Ipasundayag kon unsaon niining brosyura paghimo sa pagkat-on nga usa ka kalipay, ug itanyag ang paghatag kaniya ug personal nga tabang.
5 Dumalaha ang Mauswagong Pagtuon: Ang atong tumong mao ang pagbuhat ug labaw pa kay sa pagdumala lamang ug mga pagtuon—buot kitang makahimo ug mga tinun-an nga mahimong malig-ong mga tigpaluyo sa matuod nga pagsimba. Ang brosyur makobrehan sa pipila ka semana lamang ug angayng magtultol dayon ngadto sa pagtuon sa Kahibalo nga libro. (Tan-awa ang potnot sa panid 31.) Sugod gayod sa sinugdan, tabangi ang estudyante sa pag-ila sa organisasyon ni Jehova. (Tan-awa ang Nangatarongan nga libro, mga panid 279-80; mga panid 283-4 sa Ingles.) Ipasiugda ang bili sa mga tigom sa kongregasyon, ug isaysay nga ang pagtambong niini magtaganag linangkob nga pagsabot kon unsaon pagtuman ang matuod nga pagsimba.—Heb. 10:24, 25.
6 Ang bug-os nga pagpakig-ambit niining linaing buluhaton sa Abril ug Mayo magdala kanatog kalipay samtang atong tabangan ang mga sinsero sa “pagbaton ug pagsabot” nga motultol sa kinabuhi.—Prov. 4:5.