Panon sa mga Tawo ang Nahidugang
1 Sama sa unang siglo, ang pagtubo sa Kristohanong kongregasyon karong adlawa maoy talagsaon. (Buh. 2:41; 4:4) Sa miaging tuig, 366,579 bag-ong mga disipulo ang nabawtismohan, sa aberids nga kapin sa 1,000 sa matag adlaw! Kapin sa usa ka milyon ang nabawtismohan sa miaging tulo ka tuig. Sa pagkatinuod, si Jehova padayong nagadugang sa panonpanon sa mga magtutuo.—Buh. 5:14.
2 Ang daghang bag-ohan nanginahanglag tabang ug pagbansay gikan niadtong kinsa malig-on sa pagtuo. (Roma 15:1) Taliwala sa unang mga Kristohanon mao ang pipila kinsa, bisan mga tuig human sa ilang bawtismo, napakyas nga ‘mouswag ngadto sa pagkahamtong.’ (Heb. 5:12; 6:1) Mao kanay hinungdan nga, sa iyang sulat sa mga Hebreohanon, gipasiugda ni Pablo ang mga butang nga nanginahanglag pagtagad aron ang mga Kristohanon motubo sa espirituwal. Unsa man kini, ug unsaon pagtagana sa gikinahanglang tabang?
3 Pagbaton ug Maayong mga Batasan sa Pagtuon: Uyon sa instruksiyon ni Pablo, ang pagkahimong maayong estudyante nagalakip sa aktibong pagkat-on, pagsubli, ug paggamit sa “gahing pagkaon” nga gitagana sa organisasyon ni Jehova. (Heb. 5:13, 14; tan-awa ang Agosto 15, 1993, Bantayanang Torre, mga panid 12-17.) Pinaagig pagpaambit uban sa bag-ong mga magtutuo sa bililhong mga mutya sa kamatuoran nga imong nakaplagan pinaagig personal nga panukiduki, mahimong imong madasig sila sa paghupot ug maayong mga batasan sa pagtuon. Usahay tingali makadapit ka ug usa ka bag-ohan sa pagduyog kanimo sa imong personal o pamilyahanong pagtuon.
4 Pagtambong sa mga Tigom nga Makanunayon: Ang imong matinumanong panig-ingnan ug mahigugmaong mga pulong sa pagdasig makatabang sa bag-ong mga membro sa kongregasyon nga malikayan ‘ang nabatasan’ sa pipila sa dili pagtambong sa Kristohanong mga tigom. (Heb. 10:24, 25) Tabangi sila sa pagpabili nga ang mga tigom mao ang ilang espirituwal nga kutay sa kinabuhi ngadto sa kongregasyon. Unang paninguha aron pabation silang ginaabiabi ingong bahin sa atong panag-igsoonay.
5 Pagbuol Kang Jehova Uban ang Pagsalig: Aron mabuntog ang unodnong mga kahuyangan ug mga tatsa sa personalidad, kinahanglang mangita kita kang Jehova diha sa pag-ampo. Ang mga bag-ohan kinahanglang makakat-on nga sa pagpangamuyo kang Jehova alang sa tabang, ingon sa giagda ni Pablo, angay nga sila dili mag-ukon-ukon. (Heb. 4:15, 16; 10:22) Ang pagsugid sa imong personal nga mga kasinatian maylabot niini magpalig-on sa pagsalig sa usa ka bag-ohan nga si Jehova nagapatalinghog sa kinasingkasing nga mga pag-ampo.
6 Paggahin ug Panahon Alang sa Ministeryo: Gipakita usab ni Pablo nga sa dihang “managtanyag kita kanunay sa Diyos ug halad sa pagdayeg,” kana makapalig-on sa espirituwal. (Heb. 13:15) Makadapit ka ba ug bag-ong magmamantala nga moduyog kanimo sa imong senemanang mga kahikayan sa pag-alagad sa kanataran? Tingali kamong duha duyog nga makaandam sa inyong mga presentasyon o konsiderahon ang usa ka bahin sa ministeryo nga wala pa masulayi sa bag-ohang magmamantala.
7 Ang paghago ta sa atong kaugalingon sa pagbansay ug pagmaymay sa bag-ong mga membro sa kongregasyon makatabang kanila nga maugmad ang malig-ong pagtuo nga gikinahanglan sa ‘pagtipig nga buhi sa ilang mga kalag.’—Heb. 3:12, 13; 10:39.