Pangutana

◼Tukma ba ang paghimog mga kopya sa mga basahon sa Sosyedad aron ipanagtag ngadto sa uban?

Latas sa mga katuigan, ang Sosyedad nagpatunghag masangkarong han-ay sa mga basahon nga nagahisgot sa halos tanang bahin sa kahibalo sa Bibliya. Ang mga indibiduwal nga nakakat-on sa kamatuoran sa ulahing katuigan mobating nasayloan nila ang mga kaayohan sa materyal nga napatik sa nangagi ug nga kana dili na mabatonan pinaagig Sosyedad. Ang pipila mihimog igo-igong paningkamot aron makabaton ug mga kopya sa mas daang mga basahon, ug ang uban naghimog kaugalingong pagkopya sa mga basahon sa Sosyedad ug naghimo niining mabatonan sa nagkadaiyang mga paagi. Kini naglakip sa aktuwal nga pagpatik pag-usab sa mga basahon maingon man sa mga pagkopya pinaagig kompyuter. Sa pipila ka kaso, kini gihimo alang sa pinansiyal nga ganansiya.

Ang matinumanong “ulipon” nasayod sa atong espirituwal nga mga panginahanglan ug nagahimog mga tagana “sa tukmang panahon.” (Mat. 24:45) Sa dihang may panginahanglan sa pagluwat pag-usab sa materyal nga napatik sa nangagi, ang Sosyedad naghimog mga kahikayan alang niana. Pananglitan, ang mga tomo sa The Watchtower gikan sa 1960 ngadto sa 1985 gipatik pag-usab ug mabatonan. Bisan pa niana, sa dihang ang mga indibiduwal maghimog kinaugalingong pagkopya ug pagpanagtag sa maong materyal, ang wala-kinahanglanang mga suliran maugmad.

Mamugna ang seryosong mga kakulian kon kining maong materyal kopyahon ug ipanagtag alang sa pinansiyal nga ganansiya. Ang “Pangutana” diha sa Agosto 1977 nga Atong Pag-alagad sa Gingharian nagkanayon: “Labing maayo nga dili daoton ang teokratikanhong mga panag-uban pinaagig paghaylo o pagpahibalo sa bisan unsang epektos nga baligya o mga serbisyo sa komersiyal nga bentaha diha sa Kingdom Hall, sa mga pagtuon sa libro sa kongregasyon ug sa mga asembliya sa katawhan ni Jehova. Kini mobulig nato nga ihatag ang bug-os nga pagtagad sa espirituwal nga intereses nga angay niana ug ibutang ang kalihokang komersiyal sa iyang hustong lugar.” Busa, mahinungdanon nga maglikay ta nga mahimong mahunahunaog-ganansiya kon bahin sa pagnegosyo sa Pulong sa Diyos o mga butang nga nalangkit niana.