Gigamit Mo ba ang Imong Nahuptan?
1 Si Jesu-Kristo mihatag ug giya sa iyang mga tinun-an sa mga butang maylabot sa matuod nga pagsimba. Mahitungod sa panaghisgot ni Jesus uban sa iyang duha ka tinun-an, si Lucas mitaho nga si Jesus “mibadbad ngadto kanila sa mga butang mahitungod sa iyang kaugalingon diha sa tibuok Kasulatan.” (Luc. 24:27, 32, 45) Segurado nga ang mga disipulo napahayahayan ug dako ug napalig-on sa iyang instruksiyon. Miabot ang panahon, hinuon, nga sila kinahanglang biyaan ni Jesus. Sa unsang paagi sila makaarang sa pagsabot sa sinulat nga Pulong sa Diyos nga wala siya? Hibalo ba sila kon unsaon sa pagpadapat kana diha sa ilang mga kinabuhi?
2 Wala ra pasagdi ni Jesus ang iyang mga tinun-an, nga gitugyan sa ilang kaugalingong di-hingpit nga paghukom. Sila nakaamgo sa wala madugay nga sa panahon nga siya dinhi sa yuta uban kanila, si Jesus mitaganag dagayang impormasyon nga magamit nga epektibo alang sa ilang pagtultol maylabot sa tumang pagkadaiya sa mga butang. Sila nakasabot kon unsay buhaton samtang sila “nakahinumdom sa iyang mga pulong.” (Luc. 24:8; Juan 14:26) Miabot ang panahon, daghan sa mga pulong ni Jesus gitala diha sa Pulong sa Diyos alang sa atong kaayohan.
3 Sa misugod sa paglihok ang Kristohanong kongregasyon, kadtong nanguna mitabang sa mga igsoon sa paghinumdom sa unang gitudlo ni Jesus. Sa iyang ikaduhang sulat, si Pedro misulat: “Ako nagpukaw sa inyong matin-aw nga mga panghunahuna pinaagig usa ka pahinumdom, nga inyo gayong hinumdoman ang kanhing mga pulong nga gibungat sa balaang mga manalagna ug ang sugo sa Ginoo ug Manluluwas pinaagi sa inyong mga apostol.” (2 Ped. 3:1, 2) Busa, sa daghang hitabo, bisan sa panahon nga ang importante kaayong mga butang ang gitagad, ang paagi mao lamang ang paggamit nianang gikatagana na.—Buh. 15:12-21.
4 Ang maong instruksiyon sa bisan unsang panahon wala makawang, ni biya na sa panahon. Sa miaging katuigan, si Jehova sa mauswagon mihatag sa iyang katawhan ug mas tin-aw nga pagsabot sa iyang kabubut-on. (Prov. 4:18) Ang mga pagbag-o sa pagsabot natino kaayo ug matin-aw nga dokumentado pinaagi sa organisasyon. Sa tanan niini, ang pasukaranang mga prinsipyo nagpabiling mao ra. Maoy hinungdan, pananglitan, nga ang Wali ni Jesus sa Bukid sama ra kamapuslanon karon sa panahon nga kana gipamulong sa duolan sa 2,000 ka katuigan kanhi. Wala ing panginahanglan sa bag-ong mga pagpadayag sa kamatuoran sa dihang ang gikinahanglan ta gikatagana na man.
PAGTAGANA SA PRESENTENG ESPIRITUWAL NGA MGA PANGINAHANGLAN
5 Sukad sa mga tuig 1870, ang modernong Kristohanong kongregasyon nagmauswagon na sa mas matin-aw nga pagsabot sa Pulong ni Jehova. Sa miaging mga katuigan, ang dakong pagkalainlain sa mga pangutana mitungha nga nagkinahanglan ug matin-aw nga mga tubag. “Ang matinumanon ug maalamong ulipon” mitagana sa maong “pagkaon sa hustong panahon.” (Mat. 24:45) Sa tinagsatagsa, ang mga pangutana sa bug-os gidukiduki sumala sa kahayag sa kamatuoran sa Bibliya, ug ang tinong pagtultol gikatagana alang sa katawhan ni Jehova. Kining tanang impormasyon gikapasa na nganhi kanato pinaagig mga publikasyon sa teokratikanhong organisasyon, ilabina ang magasing Watchtower.
6 Sa pagsubli sa napatik na sa miaging katuigan, maoy dayag nga ang mga basahon sa Sosyedad nakatagana na ug pagtultol o gimbut-an sa bisan unsa gayong ulohan sa Bibliya nga mahinumdoman. Ang doktrinal nga mga pagtulon-an sa bug-os naanalisar. Ang mga prinsipyo maylabot sa Kristohanong panggawi sa tin-aw gibutyag. Ug ang mga kinahanglanon sa pagtuman sa dakong buluhaton sa pagsangyaw nalaraw na pag-ayo. Ingong resulta, ang usa ka bahandi sa impormasyon sa Bibliya natigom na alang sa kaayohan sa tanan. Pananglitan, ang tinahing mga tomo sa Watchtower ug Awake! maoy pundohanan sa instruksiyon. Kon aduna kitay mga tomo sa Watchtower ug Awake! gikan sa 1960 ngadto sa 1988, kita aduna, kon maohon, usa ka 58-tomo nga ‘encyclopedia’ nga puno sa hinungdanon Kasulatanhong kahibalo maingon man sa impormasyon diha sa di-maihap ubang nataran. Ang bahin nga “Questions From Readers” nakatino na sa daghan ginatos nga mga pangutana. Dili ta ikasulti ang usa ka ulohan nga wala pa makobrehi sa pipila ka paagi diha sa usa sa mga publikasyon. Subay niana, sa gikinahanglan ta ang pagtultol sa pipila tinong paagi, maoy sagad yanong paagi ang paghinumdom sa gidala na sa atong atensiyon sa miagi.
7 Bisan pa niana, ang pagtino sa espisipikong impormasyon nga atong gikinahanglan sa pagkakaron mahimong dakong buluhaton kon kita mosalig lamang sa atong kaugalingong panumdoman. Sa ikalipay, ang organisasyon mitaganag Watch Tower Publications Index 1930-1985 nga atong magamit sa pagkaplag sa tinong mga detalye sa pipila lang ka minutos. Ang Index may reperensiya sa kapin sa 200 ka publikasyon nga giluwatan sa yugtong 56 ka katuigan. Nakakat-on ka ba sa paggamit sa Index aron kaplagon ang impormasyon nga imong gikinahanglan? Imo bang gigamit ang imong nahuptan? Usab, aduna ing pupanahon nga Index sa lainlaing mga linguwahe, ug ang ubang publikasyon adunay ilang kaugalingong indese.
MAHIMONG MAGTUTUMAN—DILI MALIMTANONG MAMIMINAW
8 Ang organisasyon, pinaagi sa mga basahon niini, nagabulig kanato sa pagsabot sa kabubut-on ni Jehova. Kinahanglan kitang mahimong mga magtutuman ug mopadapat sa atong nakat-onan inay kay mahimong malimtanong mga mamiminaw. (Sant. 1:25) Kon unsa ang gidala sa atong pagtagad dili gayod isipon ingong instruksiyon nga isalindot lang ug kalimtan human sa lumalabay nga pagtagad. Hinunoa, kita kinahanglang magpatalinghog uban sa tumong nga hinumdoman kana sa dihang adunay panginahanglan niana sa umaabot. Aron mabuhat kini, “gikinahanglan alang kanato nga himoon ang mas pa kay sa kasagarang pagtagad sa mga butang nga atong nadungog.”—Heb. 2:1.
9 Sa unsang paagi atong mahimo “ang mas pa kay sa kasagarang pagtagad”? Ang Marso 15, 1989, nga Bantayanang Torre, panid 14, nagpatin-aw nga: (1) Atong gikinahanglan ang pag-apresyar sa organisasyon ni Jehova ug ipakita kana pinaagig atong kooperasyon ug regular nga pagtambong sa tigom. (2) Kita kinahanglang makugihon sa personal nga pagtuon sa Pulong sa Diyos ug sa mga publikasyon nga gitagana sa matang nga ulipon. (3) Maoy hinungdanon sa pagpalandong sa mga butang nga atong nakat-onan aron kini ikapadapat sa atong mga kinabuhi ug magamit sa pagtabang sa uban.
10 Ang mga publikasyon nagataganag padayong instruksiyon kon sa unsang paagi makabuntog sa mga hagit nga atong ginaatubang sa pag-atiman sa atong mga pamilya, sa paghupot nga mahinlo kanunay sa moral, ug sa pakiglabot sa uban. Giunsa mo man sa pagsanong sa maong instruksiyon? Gitagad mo ba kana uban ang pagpabili, nga nagamatikod pag-ayo sa mga butang nga mapadapat kanimo sa personal? O basta giisip mo lang kana ingong lumalabay, nagaaging interes? Ang pagpabili kinahanglang magpalihok kanato sa pagpasulod sa impormasyon ug palandongon kana uban sa tumong nga hinumdoman sa ulahi ug bug-os nga gamiton kana.—Isa. 48:17.
11 Gikinahanglan tang himoon ang mas pa kay sa pagbasa lang sa gitagana. Sagad mahimo kanang sa takulahaw o daklit lang ug inayom-ayom. Hinunoa, kita gayod magtuon niana. Ang pagtuon nagakahulogan sa pagpahimutang sa hunahuna diha sa usa ka ulohan sa paaging sistematiko aron kat-onan kana alang sa umaabot nga paggamit, sa paghimo sa usa ka butang nga tumong sa pagtagad uban sa pagpadapat. Kini nagakahulogan nga ang atong panghunahuna sa materyal maoy aktuwal nga motino sa giladmon nga kana masilsil sa atong hunahuna ug ikapadapat sa atong inadlawng mga kinabuhi. Samtang kita magtuon, kita gayod padayong mangutana: Sa unsang paagi kini mapadapat kanako? Sa unsang paagi akong magamit kini sa pagpauswag sa akong espirituwal nga progreso? Unsang mga kausaban ang kinahanglang akong himoon? Sa unsang paagi akong magamit kini sa pagtabang sa uban? Sa unsang paagi ikapatin-aw ko kini ngadto sa uban?
PAGPAUSWAG SA ATONG MINISTERYO SA KANATARAN
12 Ang Atong Ministeryo sa Gingharian sa makanunayon nagaanalisar sa mga panginahanglan ug mga hilig sa ministeryo sa kanataran, nga nagapunting sa mga paagi nga makaabag kanato sa pagbaton sa labing epektibong mga resulta. Sanglit kay kini gipatik sa binulan, ikaw ba mahilig sa pag-isip sa instruksiyon niana ingong balido o kasaligan hangtod lamang sa sunod nga gula? Ang usa sa pasukaranang mga tumong sa ministeryo mao gayod ang pag-abot sa mga kasingkasing sa katawhan uban sa balita sa Gingharian. Ang tawhanong interes, mga pagbati, ug mga tinamdan sa pasukaranan nagpabilin nga mao ra gihapon sa nangaging katuigan. Ang dakong pagkalainlain sa mga paagi magamit man nga epektibo sa pagpukaw sa interes. Ang Atong Ministeryo sa Gingharian yanong nagapaalinggat kanato sa gigamit sa uban nga malamposon. Samtang ang pipila ka paglainlain gisugyot na sa miaging panahon, ang pasukaranang mga paagi nagpabilin nga mao ra gihapon. Ang kinabag-ohang mga sugyot hayan nahisgotan na sa miagi, ug mahimong gamiton kini pag-usab sa umaabot.
13 Ang laing talagsaong tagana mao ang basahong Nangatarongan. Ang panid 8 nagpatin-aw nga ang “paggamit niini nga handbook makaabag kanimo sa pag-ugmad sa katakos sa pagpangatarongan gikan sa Kasulatan ug sa paggamit niana nga epektibo sa pagbulig sa uban.” Daghang magmamantala miasoy sa makalipayng mga eksperiyensiya nga nagpakita kon sa unsang paagi kining libroha gigamit sa pagpatunghag makatagbaw kaayong mga resulta. Ang impormasyon niini mapuslanon nga magamit sa bisan unsa gayong situwasyon nga masugmak diha sa atong ministeryo. Makaayo kaayo sa pagsubli sa piniling mga bahin sa dili pa moambit sa pag-alagad sa kanataran sa matag semana. Kita gayod magdala kanunay ug kopya sa atong sudlanan sa basahon. Girekomendar na nga atong ilakip kini uban sa mga basahon nga atong kanunayng ginadala ngadto sa mga tigom. Tungod kay kini anaa kanunay ug nasinati na sa mga sulod niana, kita gayod makapanikaysikay nga mahimong “bug-os nga masangkapan alang sa tanang maayong buhat.”—2 Tim. 3:17.
14 Atong gipakita ang apresasyon sa gitagana ni Jehova pinaagig maayong paggamit niana diha sa atong ministeryo. Ang gikinahanglang espirituwal nga pagkaon uban sa giya sa atong ministeryo gihimo nang mabatonan diha sa kadagaya. Gikinahanglan tang “mamalandong niining mga butang; matugob diha niana.” (1 Tim. 4:15) Kini magpaarang kanato sa paghinumdom sa atong gikinahanglan sa tukmang panahon. Sa panahong gikinahanglan ta ang tabang sa paghinumdom, aduna kita ing mga basahon nga gidesinyo sa pagpalihok sa atong hunahuna. Inay kay kanunay magdahom sa butang bag-o, kita gayod mahinangpon sa pagpasalamat sa atong nahuptan ug gamiton kana sa bug-os. Sa pagbuhat niana, atong gipakita ang atong kaugalingon nga hamtong nga mga tawo “kinsa pinaagig paggamit ang ilang mga gahom sa panghunahuna nabansay sa pag-ila sa maayo ug daotan.”—Heb. 5:14.