Pagtuman sa Atong Ministeryo sa Gingharian Uban sa Tabang Gikan sa Index
1 Aron sa pagtabang kanato nga makatuman sa atong ministeryo, si Jehova nagtagana ug bahanding giya diha sa masangkarong librarya sa bililhong mga publikasyon. Kita ba makagamit niini nga mas maayo? Ang unang tabang sa pagbuhat niini mao ang Watch Tower Publications Index, nga padayong gipatik sukad sa 1961.
2 Sa unsang paagi ang Index makabulig kanimo sa pagtuman sa imong ministeryo? Pinaagig pagtudlo sa dalan ngadto sa ekselenteng tambag ug mga pagpatin-aw nga gikatagana na. Ang Index gitagana alang sa interong panag-igsoonay. Gikan sa mga anak ngadto sa mga apohan, bag-ong mga estudyante sa Bibliya ngadto sa mga ansiyano, ang tanan makakaplag ug mga reperensiya nga ilang gikinahanglan alang sa bisan unsang makaayong katuyoan.
KON UNSAON SA PAGPANGITA SA IMONG GIKINAHANGLAN
3 Kon ikaw interesado sa pagkaplag sa kahulogan sa tinong bersikulo, makita mong mas maayong mopakli ka una ngadto sa ‘scripture index’ nga anaa sa likod. Aduna bay misitar sa Juan 10:30 aron sulayan sa pagpamatuod sa Trinidad? Ang ‘scripture index’ motultol kanimo ngadto sa materyal nga nagapatin-aw kon nganong gisulti ni Jesus ang maong mga pulong. Ang ‘scripture index’ magpadagaya sa atong personal nga pagbasa sa Bibliya samtang atong pangitaon ang katin-awan sa mga bersikulo nga daw nagapahibulong o dili klaro.
4 Ang ‘subject index’ nagataganag lainlaing mga dalan ngadto sa samang impormasyon. Pananglitan, hayan gikinahanglan mong mahibaloan kon unsay buhaton kon ang di-magtutuong kapikas mosupak sa imong pagdala sa imong mga anak ngadto sa mga tigom. Mahimong paklion mo ngadto sa mga ulohang “Husbands,” “Wives,” “Children,” “Opposition,” o “Meetings.” Kon dili mo makita ang tubag ubos sa unang ulohan, sulayi ang lain. Kon makita mo ang dakong ulohan nga daw husto, una pangitaa ang ‘cross-references’ nga anaa ra sa ubos niana. Kini sagad magdaginot sa panahon pinaagig pagbutyag sa laing ulohan nga mas laktod sa punto.
5 Ang kahanas sa paggamit sa Index makadugang ug dako sa kalamposan sa pagtuman sa atong sagradong mga kaakohan. Atong mga pamilya, atong mga estudyante sa Bibliya, ug atong mga kongregasyon mabenepisyohan samtang kita mahimong mas hanas sa paggamit niini nga himan. Ang umaabot nga mga gula sa Atong Ministeryo sa Gingharian mousisa sa tinong mga luna diin ang Watch Tower Publications Index mahimong bililhong tabang sa pagtuman sa atong ministeryo sa Gingharian.