Pagtanyag sa Maayong Balita—Pinaagig Tracts ug Handbills
1 “Ako nakaagi sa usa ka babaye nga mitunol kanakog usa ka ‘Bible tract,’” misulat ang usa ka lalaki ngadto sa Sosyedad. “Kini mabasa, ‘Kinabuhi sa Malinawong Bag-ong Kalibotan.’ Ako masulob-on sa wala ko pa mabasa kini, apan sa ulahi ako nadasig kaayo ug anaa sa kalinaw.” Ang maong tawo misulat alang sa dugang impormasyon ug miorder ug librong Live Forever.
2 Daghan karon nga nagadayeg kang Jehova napaaghat ang ilang espirituwal nga gana pinaagig tracts ug sa mensahe nga anaa sa likod sa handbills. Ikaw ba nagagamit sa ‘tracts’ ug ‘handbills’ sa imong ministeryo? Daghan ang nagagamit niana. Sa Brooklyn lamang, kapin sa 122 ka milyong Peaceful New World tracts ang gipatik, maingon man duolan sa 250 ka milyong kopya sa laing tulo ka ‘tracts.’
3 Dili ta gayod pakamenoson ang gahom sa Pulong sa Diyos ingon sa gipatin-aw niining mubong mga mensahe. (Heb. 4:12; itanding Zacarias 4:10; Santiago 3:4, 5.) Ang usa ka Saksi gikan sa Arizona misulat: “Ang mga tawo karon dili mogahin ug dakong panahon sa pagbasa, apan ang ‘tracts’ may gitas-on sa paghimog importanteng mensahe pero dili taas kaayo nga mag-abog sa mga tawo sa dili pa gani sila motan-aw niana.”
4 Ang mga tawo sagad magduhaduha sa pagkuhag literatura gikan kanato. Apan daghan ang modawat ug usa ka ‘tract’ lamang. Usa ka magtatan-aw sa sirkito adunay gamayng ‘plastic holder’ ug nagapakita sa ‘tracts,’ nga ginapapili ang tagbalay sa iyang gusto.
SA UNANG KONTAK
5 Nakaplagan sa ubang magmamantala nga ang paghatag ug ‘tract’ o ‘handbill’ maoy usa ka maayong paagi sa pagsugod ug mga panaghisgot. Sa pagtanyag ug usa, ang tagbalay nga maduhaduhaon sa pag-abli sa pultahan mahimong madasig sa pag-abli. Ang pagpakita sa eskedyol sa tigom diha sa ‘handbill’ mahimong makabukas sa dalan sa panaghisgot sa atong buluhaton ug katuyoan.
6 Kon ang tagbalay dayag nga puliki o masulob-on, hayan ang ‘tract’ mao ra ang gikinahanglan. Usa ka babaye nahupay kaayo pinaagig tract bahin sa paglaom sa mga patay nga siya misulat ngadto sa Sosyedad alang sa dugang impormasyon.
SA MGA BALIKDUAW
7 Sa pagbalikduaw diin ang pipila ka interes gipakita sa miagi, ang usa makaingon: “Sa una natong pagkahibalag, ako nasumeter kaayo sa paggahin mo ug panahon sa pagpakighisgot sa Bibliya. Aduna akoy pipila dugang impormasyon nga basin magpainteres kanimo. Makaplagan kini niini nga ‘tract,’ Kinabuhi sa Malinawong Bag-ong Kalibotan. Kon imong mahinumdoman, sa miagi atong gihisgotan ang saad sa Bibliya sa matuod ug malungtarong kalinaw alang sa katawhan. Apan, kay daghan man ang naghunahuna lamang sa langit sa dihang ilang mabasa kining mga saara, matikdi ang Salmo 37:29 nga nagabutyag nga kining mga panalangina mahitabo dinhi sa ibabaw sa yuta. [Basahang teksto, nga nagapakita sa tagbalay kon hain kana diha sa tract.] Dili ba kana makapainteres paminawon? [Hisgoti ang pipila ka parapo.] Adunay dugang pang makapalig-ong mga teksto niini nga ‘tract’ ug imong makaplagan nga kini makapalipay. Sa sunod nga pag-anhi ko, tingali duyog nga mabasa ta ang pipila niini sama ra sa atong gihimo karon.”
8 Sa pagkamatuod, ang atong tracts ug handbills maoy mga gasa gikan kang Jehova. Hinaot nga gamiton ta kini nga epektibo ngadto sa iyang kadayegan ug sa atong dumalayong panalangin.—Prov. 22:29.