Mga Batan-on​—Lipaya ang Kasingkasing ni Jehova

¹ Sa dihang ang usa maggamit sa kusog ug kabaskog sa pagkabatan-on sa hustong paagi, ang kinabuhi makalilipay gayod. Ang maalamong Haring Solomon misulat: “Pagkalipay, batan-ong lalaki, sa imong pagkabatan-on, ug tugoting magmaayo kanimo ang imong kasingkasing sa mga adlaw sa imong pagkabatan-on.” (Eccl. 11:9) Kamong mga batan-on magapanubag ngadto sa Diyos sa inyong mga linihokan.

² Kon giunsa nimo pagkinabuhi ang imong kinabuhi magahimog kalainan dili lamang kanimo apan ngadto usab sa imong mga ginikanan. Ang Proverbio 10:1 nagakanayon: “Ang usa ka maalamong anak makapalipay sa usa ka amahan, ug ang usa ka buangbuang nga anak maoy kaguol sa iyang inahan.” Apan labi pang hinungdanon, kon giunsa nimo pagkinabuhi ang imong kinabuhi makaapektar sa imong Maglalalang, si Jehova nga Diyos. Mao kanay hinungdan nga ang Proverbio 27:11 nagadasig usab sa mga batan-on: “Magmaalamon, akong anak, ug lipaya ang akong kasingkasing, aron nga akong matubag siya nga nagatamay kanako.” Sa unsang paagi kamong mga batan-on makalipay sa kasingkasing ni Jehova karong adlawa? Kini mapalampos sa daghang paagi.

³ Pinaagig Hustong Panig-ingnan: Kamong mga batan-on nakasinati sa “makuyaw nga mga panahon nga lisod sagubangon” nga gitagna sa Pulong sa Diyos. (2 Tim. 3:1) Kamo mahimong mapailalom usab sa mga pagpit-os gikan sa di-matinuohong mga kaeskuwela ug bisan gikan sa mga magtutudlo nga mahimong magatamay sa inyong binase sa Bibliya nga mga pagpanglantaw. Pananglitan, usa ka magtutudlo nagpresentar sa teoriya sa ebolusyon ingong kamatuoran ug ang Bibliya ingong sugilambong. Bisan pa niana, ang usa ka batan-ong magmamantala nianang maong klase maunongong nagpanalipod sa Bibliya. Ingong resulta, ubay-ubay nga mga pagtuon sa Bibliya ang nasugdan. Ang pipila ka interesado misugod sa pagtambong sa mga tigom. Ang inyong pagtuo mga batan-ong igsoong lalaki ug babaye nagatunglo sa di-diyosnong kalibotan ug nakadani sa mga mabuot-kasingkasing ngadto sa kamatuoran.​—Itandi ang Hebreohanon 11:7.

⁴ Madasig ba ninyo ang inyong mga katalirongan sa kongregasyon aron dili sila monunot sa daotan? Pinaagig pagpahilunag maayong panig-ingnan sa eskuwelahan, sa balay, ug sa kongregasyon, mapalig-on ninyo ang pagtuo sa ubang batan-ong mga magmamantala. (Roma 1:12) Lipaya ang kasingkasing ni Jehova pinaagig pagpahiluna ug panig-ingnan alang sa uban.

⁵ Pinaagig Senina ug Pamostura: Usa ka batan-ong igsoong babaye gisungog ug gibiaybiay tungod sa iyang kasarangang senina ug ginganlag “di-matandog.” Kini wala magpahulga kaniya ngadto sa pagpahiuyon sa di-diyosnon nga mga suntoan sa kalibotan. Sa baylo, iyang gisaysay nga siya maoy usa sa mga Saksi ni Jehova ug ang hataas nga suntoan sa mga Saksi mao ang iyang gibatonan. Ikaw ba may ingon niana nga kalig-on? O gitugotan ba nimo ang kalibotan ni Satanas sa pag-umol kanimo ngadto sa iyang paagi sa panghunahuna ug panggawi? Pagkamakalilipay ang pagpaniid nga daghan kaninyo mga batan-on ang nagasugot sa pagtudlo ni Jehova ug nagasalikway sa gidlay nga mga estilo, mga uso, mga idolo, ug mga pagtulon-an sa kalibotan. Sa pagkatinuod, ingon sa atong nakat-onan sa atong bag-o pang distritong kombensiyon, kinahanglang ilhon nato nga kanang mga butanga nga nagagikan sa kalibotan giimpluwensiyahan sa mga demonyo!​—1 Tim. 4:1.

⁶ Pinaagig Kapilian sa Kalingawan ug Lulinghayaw: Ang mga ginikanan kinahanglang maghupot sa hunahuna sa panginahanglang tabangan ang ilang mga anak nga maalamong mopili sa hustong matang sa kalingawan ug lulinghayaw. Usa ka igsoong lalaki nagsulting mapabilhon sa usa ka maayong pamilya nga iyang nakat-onan sa pagmahal kaayo. Ingong mahunahunaon sa espirituwal, ang mga ginikanan nagtaganag paggiya nga gipadapat usab sa lulinghayaw sa pamilya. Ang igsoong lalaki nagmatikod: ‘Ako nakadayeg sa duyog nilang pagbuhat sa mga butang. Dili lamang kay gitabangan sa mga ginikanan ang mga anak sa pagpangandam alang sa pagsangyaw, apan sa dihang panahon na sa lulinghayaw, sila malipayon sa paglakawlakaw, pagduaw sa mga museyo, o diha ra sa balay ug magadula ug magabuhat sa mga proyekto. Ang ilang gugma sa usag usa ug sa uban pa magpabati kanimong masaligon nga sila magalakaw sa kamatuoran sa umaabot, bisan pa kon unsay mahitabo.’

⁷ Siyempre, may mga panahon nga dili posible alang sa tibuok pamilya sa pag-apil sa lulinghayaw ug kalingawan. Kamong mga batan-on kinahanglang masayod niini ug ang pagkaseryoso sa pagpili kon unsaon ninyo paggugol ang pipila sa inyong bakanteng panahon. Si Satanas determinado sa paglimbong sa daghan kutob sa maarangan. Ang batan-on ug way-kasinatian maoy ilabinang madutlan sa iyang malinglahong mga buhat ug malimbongong pagpangdani. (2 Cor. 11:3; Efe. 6:11) Busa karon si Satanas nagagamit ug nagakadaiyang mga paagi sa pagdani kaninyo nga mahitipas ug mangagpas sa usa ka kinabuhi sa mahakogong pagpangita-kalipayan ug pagkadimatarong.

⁸ Ang telebisyon maoy usa ka batid nga tigpasalaag nga nagapasiugdag materyalistiko ug imoral nga estilo sa kinabuhi. Ang mga pelikula ug mga video makanunayong nagapasundayag ug kapintasan ug dayag nga sekso. Ang popular nga musika nagasamot sa pagkangil-ad ug pagkalaw-ay. Ang mga pagpanghaylo ni Satanas mopatim-aw nga daw inosente, bisan pa niana linibo nga Kristohanong mga batan-on ang nalit-agan niini ngadto sa sayop nga panghunahuna ug panggawi. Aron pagsukol nianang maong mga pagpit-os, kinahanglang manlimbasog gayod kamo sa pagpangagpas sa pagkamatarong. (2 Tim. 2:22) Kon ang mga pagpasibo gikinahanglan sa inyong panghunahuna o panggawi maylabot sa kalingawan ug lulinghayaw, sa unsang paagi kini mahimo? Ang salmista nagahatag sa tubag: “Uban sa akong tibuok kasingkasing ako nangita kanimo. Ayaw ipahinabo kanako nga mahisalaag gikan sa imong mga kabalaoran.”​—Sal. 119:10.

⁹ Ang pag-idolo sa mga artista sa mga dula ug kalingawan maoy sagad. Ang kahadlok kang Jehova makatabang kanimo pagpahilayo gikan sa pag-idolo sa dili-hingpit nga mga tawo. Bisan ang seksuwal nga imoralidad giidolo karon sa daghan. Ikaw makabantay batok niini nga kahiligan pinaagig paglikay sa pornograpiya ug makadaot nga musika. Mahitungod sa musika, ang Abril 15, 1993, nga gula sa Ang Bantayanang Torre nagmatikod: “Ang musika maoy usa ka gasa sa Diyos. Alang sa kadaghanan, hinunoa, nahimo kining dili-maayong alatubangon. . . . Himoang imong tumong ang pagbutang sa musika sa iyang dapit ug himoang ang kalihokan ni Jehova maoy imong unang tagdon. Magmapilion ug magmabinantayon sa musika nga imong paminawon. Sa ingon imong magamit​—dili magaabuso​—niining gasa sa Diyos.”

¹⁰ Ugmara ang bug-os nga pagdumot sa daotan. (Sal. 97:10) Sa dihang tintalon sa pagbuhat ug daotan, hunahunaa kon giunsa paglantaw ni Jehova ang maong butang, ug tagda ang mga sangpotanan: wala-kinahanglanang pagmabdos, napasa nga mga sakit sa sekso, pagkadaot sa emosyon, pagkawala sa pagtahod sa kaugalingon, ug pagkawala sa mga pribilehiyo sa kongregasyon. Likaying maladlad ang kaugalingon sa mga salida sa TV, mga pelikula, videos, mga awit, o mga kukabildo nga nagadasig ug pagkadaotan. Likayi ang pagpakig-uban niadtong giklasipikar sa Bibliya ingong “mga buangbuang.” (Prov. 13:19) Magmapilion; pilia alang sa suod nga panag-uban kadtong anaa sa kongregasyon nga nahigugma kang Jehova ug sa iyang matarong mga suntoan.

¹¹ Oo, ang mga batan-on nga buot gayod nga maglipay sa kasingkasing ni Jehova mosanong sa maayong tambag nga makaplagan sa Efeso 5:15, 16: “Padayong pagbantay pag-ayo sa inyong paglakaw dili ingon nga dili maalamon apan ingong maalamong mga tawo, nga nagapalit sa kahigayonan alang sa inyong mga kaugalingon, tungod kay ang mga adlaw tuman-daotan.” Unsa man ang makatabang kaninyo sa padayong “pagbantay pag-ayo” sa inyong pag-uswag niining kataposang mga adlaw?

¹² Pag-atiman sa Espirituwal nga mga Panginahanglan: Sa Mateo 5:3, si Jesus nagkomento: “Malipayon kadtong matinguhaon sa ilang espirituwal nga panginahanglan.” Ikaw magmalipayon usab pinaagig pagkamatinguhaon sa imong espirituwal nga panginahanglan. Ang pagtagbaw nianang panginahanglana nagalakip sa masibotong pakig-ambit sa pagsangyaw sa maayong balita, sanglit kini nagapalig-on sa atong pagtuo sa mga butang nga atong nakat-onan.​—Roma 10:17.

¹³ Gikan sa personal nga kasinatian ikaw nahibalo nga dili kanunayng sayon ang pagpakig-ambit nga makanunayon sa ministeryo. Kini mahimong tungod sa kakulang sa pagsalig. Busa, ang lig-ong determinasyon sa imong bahin maoy gikinahanglan. Pinaagig pakig-ambit sa ministeryo sa makanunayong paagi, ikaw makapausbaw sa imong kahanas sa pagpamatuod ug makatukod ug pagsalig sa imong katakos sa pagsangyaw.

¹⁴ Himoang mga kahikayan sa pagkuyog sa labawg kasinatian nga mga magmamantala sa kongregasyon, sama sa mga regular payunir ug mga ansiyano. Paminawa pag-ayo ang ilang mga presentasyon ug kon giunsa nila pagdumala ang mga pagsupak diha sa pultahan. Gamitag maayo ang librong Nangatarongan ug ang mga sugyot nga gipresentar sa Atong Ministeryo sa Gingharian. Sa dili madugay mabatonan mo ang mas dakong kalipay gikan sa ministeryo tungod kay gihatag mo ang imong tanan ngadto kang Jehova.​—Buh. 20:35.

¹⁵ Ang pipila nakahimo sa pagpahimulos sa mga kahigayonan sa pagpamatuod diha sa eskuwelahan ug nagmalamposon gayod sa paghimog mga tinun-an. (Mat. 28:19, 20) Ang usa ka Kristohanong batan-on miingon: “Sulod sa mga panahong walay klase, ako may daghang kahigayonan sa pagpamatuod, ilabina sa panahon sa kalibotanong mga piyesta opisyal. Sa dihang nagbilin ko ug mga basahon sa Bibliya sa akong lamesa diin ang uban makakita niana, daghang interesadong mga estudyante ang miduol kanako.” Sa kadugayan, ang ubay-ubay nga mga estudyante ug bisan ang magtutudlo misugod sa pagtambong sa Kristohanong mga tigom. Sa pagkatinuod, ang magtutudlo miuswag ngadto sa pagkahimong usa ka dedikadong Saksi. Si Jehova malipay kaayo sa dihang ang batan-ong mga magsisimba sama kanimo magadala ug kadayegan sa iyang ngalan.

¹⁶ Ang laing paagi sa pagtagbaw sa imong espirituwal nga panginahanglan maoy pinaagig personal nga pagtuon. Aron lipayon ang kasingkasing ni Jehova, kinahanglang mokuha ta ug kahibalo kaniya, sa iyang mga katuyoan, ug sa iyang mga kinahanglanon alang kanato. Nagagahin ka bag panahon alang sa personal nga pagtuon? Nagatuon ka ba nga makanunayon, sama gayod nga ikaw nagagugol ug panahon sa pagkaon nga makanunayon? (Juan 17:3) Ikaw ba may personal nga eskedyol sa pagbasa sa Bibliya nga dugang pa sa pagsulay nga makanunot sa eskedyol sa pagbasa sa Bibliya sa Teokratikanhong Ministeryong Tunghaan? Nagapangandam ka bag maayo sa tanang tigom? Ginabasa ba nimong makanunayon ang mga magasing Bantayanang Torre ug Pagmata!? Sa linain, nagagugol ka bag panahon sa pagbasa sa matag artikulo diha sa “Mga Batan-on Nangutana . . . ” nga serye, nga maampingong nagatan-aw sa matag teksto? Ug ayawg kalimti ang libro nga ilabinang gidesinyo sa Sosyedad alang sa imong espirituwal nga mga panginahanglan, Mga Pangutanang Gisukna sa mga Batan-on​—Mga Tubag nga Mosaler. Ang Kristohanong mga batan-on ug ang ilang mga ginikanan sa tibuok kalibotan misulat aron sa pagpatugbaw kon sa unsang paagi kining libroha nakatabang kanila nga mas masuod kang Jehova.

¹⁷ Kon ikaw magabasa sa Bibliya ug teokratikanhong mga tabang sa pagtuon sa Bibliya, kana magasulti kanimo bahin kang Jehova, sa iyang panghunahuna, ug sa iyang mga katuyoan. Tagda kon sa unsang paagi kining impormasyona mapuslanon kanimo. Ilangkit ang imong gibasa sa kon unsay nabasa nimo sa miagi. Kini nagalakip ug pagpamalandong. Ang pagpamalandong nagatugot sa impormasyon nga motuhop sa kasingkasing ug mopalihok kanimo.​—Sal. 77:12.

¹⁸ Kita nagakalipay sa pagtan-aw sa mga batan-on kinsa matinguhaon sa ilang espirituwal nga panginahanglan nga nagatambong sa mga tigom sa kongregasyon. Kamong Kristohanong mga batan-on makadasig sa uban pinaagig makanunayong paghatag ug makahuloganong mga komento sa panahon sa mga tigom. Himoang tumong nga mohatag ug labing menos usa ka komento sa kada tigom. Ugmara ang mainit nga mga pakiglabot sa mga tawo sa tanang grupo sa pangedaron diha sa kongregasyon pinaagig pagpakig-ambit sa makapalig-ong panag-ubanay una pa ug human sa mga tigom. (Heb. 10:24, 25) Usa ka batan-ong igsoong lalaki nagkomento nga ang iyang mga ginikanan nagdasig kaniya sa pagpakigsulti sa labing menos usa ka edaran nga igsoong lalaki o babaye sa matag tigom. Karong adlawa iyang gipabilhan ang kasinatian nga iyang naangkon sa pagpakig-uban sa edaran nga mga membro sa kongregasyon.

¹⁹ Pangagpasa ang Espirituwal nga mga Tumong: Makapasubo nga ang mga kinabuhi sa daghang batan-on kulang sa katuyoan ug pagtultol. Hinunoa, dili ba maayo nga makasinati sa pagbati nga magagikan sa pagpahilunag teokratikanhong mga tumong ug unya malamposong makakab-ot niana? Kining mga tumonga, nga gipangagpas uban ang kadan-agan sa balaang edukasyon, makatagbaw sa personal nga paagi karon ug sa kataposan magatultol ngadto sa dayong kaluwasan.​—Eccl. 12:1, 13.

²⁰ Sa dihang magapahilunag mga tumong, himoa kana diha sa pag-ampo. Pakigsulti sa imong mga ginikanan ug sa mga ansiyano. Susiha ang imong kaugalingon ug ang imong mga katakos, ug ipahimutang ang mapuslanong mga tumong sumala sa kon unsay imong maarangan sa pagtuman ug dili sa pagtandi sa uban. Ang matag usa magkalahi sa pagkagamâ​—sa pisikal, sa kaisipan, sa emosyonal, ug sa espirituwal. Busa, ayawg dahomang mapalampos ang tanang butang nga mahimo sa laing tawo.

²¹ Unsa man ang pipila ka tumong nga imong mapangab-ot? Kon ikaw dili pa usa ka magmamantala o dili pa bawtismado, nganong dili kini nimo himoong mga tumong. Kon ikaw usa ka magmamantala, mahimo mong tumong ang paggugol ug tinong gidaghanon sa panahon sa ministeryo kada semana. Panikaysikay nga mahimong takos nga magtutudlo sa mga balikduaw, ug himoang tumong nga makadumala ug pagtuon sa Bibliya. Kon ikaw usa ka bawtismadong batan-on sa eskuwelahan, nganong dili nimo himoong tumong nga makaoksilyare payunir sa mga bulang ting-init? Adunay “daghang mahimo diha sa buluhaton sa Ginoo.”​—1 Cor. 15:58.

²² Tabang Gikan sa mga Ginikanan Hinungdanon: Ang mga batan-on sa kongregasyon dili gayod angayng mobati nga sila nag-inusara sa ilang pagpanlimbasog sa pagbaton ug kinabuhi. Si Jehova, pinaagi sa iyang kapunongan, nagtaganag tambag aron pag-abag niining mga batan-ona sa paghimog matag adlaw nga mga desisyon ug pagbuntog sa mga kababagan sa kinabuhi. Ang dedikadong mga ginikanan, siyempre, may pangunang kaakohan sa pagtabang sa ilang mga anak sa paghimog tukmang mga desisyon. Sa 1 Corinto 11:3, ang Bibliya nagapaila sa bana ingong ulo sa panimalay. Busa, sa usa ka Kristohanong panimalay, uban sa asawa nga suod nga makigtambayayong kaniya, ang amahan nagapanguna sa pagtudlo sa mga anak sa mga kabalaoran sa Diyos. (Efe. 6:4) Kini mahimo pinaagig matanlagong pagbansay nga magsugod sa pagkabata. Sanglit ang utok sa bata makatulo ka pilo modako sulod sa molabay nga unang lima ka tuig sa kinabuhi, ang mga ginikanan dili gayod angayng magpakamenos sa katakos sa ilang bata sa pagkat-on. (2 Tim. 3:15) Samtang ang mga anak modako, ang mga ginikanan kinahanglang mausbawong magatudlo kanila sa paghigugma kang Jehova ug sa pag-ugmad sa maayong relasyon uban kaniya.

²³ Sa “Balaang Pagpanudlo” Distritong Kombensiyon, dihay usa ka pakigpulong nga nag-ulohag “Paghago Alang sa Kaluwasan sa Imong Panimalay.” Ang nagakadaiyang mga puntos gipaambit nga nagabulig sa mga ginikanan sa pagsabot sa mapuslanong mga paagi nga matabangan nila ang ilang mga anak. Ang usa ka maayong ginikananhong panig-ingnan mao ang labing maayong dapit sa pagsugod. Kini makahimo ug labaw pa sa pagtabang sa imong mga anak sa espirituwal kay sa daghang pakigsulti kanila bahin sa kon unsa ang ilang angay o dili angayng buhaton. Ang pagpahilunag tukmang ginikananhong panig-ingnan maglakip sa pagpasundayag sa mga bunga sa espiritu sa sulod sa panimalay, ngadto sa imong kapikas ug ngadto sa imong mga anak. (Gal. 5:22, 23) Daghan ang nakakita gikan sa kasinatian nga ang espiritu sa Diyos maoy usa ka gamhanang impluwensiya sa maayo. Kana makabulig kanimo sa pag-umol sa mga hunahuna ug mga kasingkasing sa imong mga anak.

²⁴ Nahisgotan usab sa kombensiyon ang panginahanglan alang sa mga ginikanan sa pagpahilunag maayong panig-ingnan sa personal nga mga batasan sa pagtuon, pagtambong sa mga tigom, ug regular nga pagpakig-ambit sa ministeryo sa kanataran. Kon ikaw mainitong makigsulti bahin sa kamatuoran sa balay, masibotong nagapanguna sa ministeryo, ug positibo bahin sa personal nga pagtuon, ang imong mga anak madasig sa pagbaton ug sinserong interes sa espirituwal nga mga butang.

²⁵ Kon mahunahunaong giandam, ang usa ka regular, makahuloganong pagtuon sa Bibliya sa pamilya mahimong makapainteres ug makalilipay, usa ka panahon sa pagseguro sa panaghiusa sa pamilya. Gugola ang panahon sa pag-abot sa kasingkasing sa imong mga anak. (Prov. 23:15) Samtang daghang pamilya nagagamit niining higayona sa pag-andam sa senemanang Pagtuon sa Bantayanang Torre, sa pupanahon hayan makapadasig nga tagdon ang usa ka tinong panginahanglan sa pamilya. Ang pagsuknag punto-de-bistang mga pangutana ug pagpatalinghog sa mga komento sa kada membro sa pamilya makapahikat-on ug makapahayahay. Ang pagdumalag pagtuon nga makabenepisyo sa matag membro sa pamilya maoy usa ka tinuod nga hagit sa ulo sa pamilya. Apan pagkamagantihon sa dihang ang tanan magatubo sa espirituwal! Pinaagig paglangkit kanunay sa matag usa, ang usa ka malipayong espiritu magapabilin.

²⁶ Ang imong mahigugmaon, binatid nga pagbansay karon maoy hinungdanon sa pagluwas sa mga kinabuhi sa imong kaliwat. (Prov. 22:6) Uban niini sa hunahuna, maoy sayon sa pagsabot nga kini mahimong ang labing hinungdanong pagtudlo nga mabuhat mo sukad. Ayaw gayod paghunahuna nga nag-inusara ka niining linain ug hinungdanong gimbuhaton. Pagkat-on sa hilabihang pagsalig kang Jehova alang sa paggiya sa pag-atiman sa imong mga kaakohan sa pamilya. Dili lamang kini ra. Aduna pay uban nga mahimong dako usab ug ikatabang.

²⁷ Kon Unsay Mahimo sa Uban sa Pagbulig: Ang mga ansiyano makalakip sa mga batan-on, kauban sa ilang mga ginikanan, sa paghinlo sa Kingdom Hall. Dasiga ang kabataan sa mga tigom sa kongregasyon. Ang mga ansiyano ug ministeryal nga mga alagad nga gitudlo sa mga bahin sa Tigom sa Pag-alagad angayng magbantay sa mga kamot sa mga bata nga giisa sa dihang may mga bahin alang sa pagpakig-ambit sa mamiminaw. Pangitaang mga kahigayonan sa paggamit sa maayog panig-ingnan nga mga batan-on sa mga pasundayag uban sa ilang mga ginikanan. Ang pipila mahimong mainterbiyu ug makahimog mubo nga mga komento.

²⁸ Ayawg ibalewala ang ilang mga panikaysikay. Ang mga batan-on napamatud-ang usa ka tinuod nga tabang sa kongregasyon. Pinaagi sa ilang maayong panggawi, daghan ang ‘nagdayandayan sa pagtulon-an sa atong Manluluwas, ang Diyos.’ (Tito 2:6-10) Magmahunahunaon sa panginahanglan sa pagdayeg sa mga batan-on nga nagapakig-ambit bisan sa gamayng paagi. Kini magapadasig kanila sa pagpangandam ug magtinguha sa pagbuhat niana pag-usab sa umaabot. Ang maong kaikag diha sa mga batan-on pinaagi sa mga edaran maoy bililhon. Unsa man ka subsob nga ikaw ingong ansiyano o ministeryal nga alagad miduol sa mas batan-ong mga membro sa kongregasyon aron pagdayeg kanila tungod sa usa ka pakigpulong o usa ka presentasyon sa tigom?

²⁹ Mga payunir, unsay inyong mahimo sa pagbulig? Nganong dili repasohon ang inyong eskedyol sa pagtino kon unsaon paglangkit sa nagtunghang kabataan diha sa inyong mga kahikayan sa panahon sa kahaponon ug mga hinapos sa semana? Positibo ba kamong nagasulti bahin sa inyong pagpili sa bug-os panahong pag-alagad? Gipakita ba ninyo pinaagi sa inyong panagway nga nakakaplag mog kalipay sa inyong ministeryo? Andam ba ninyong ikarekomendar kana ngadto sa uban, ilabina sa mga mas batan-on? Sa dihang nagasangyaw sa mga ganghaan, ang inyo bang sinultihan makapalig-on ug positibo? Kon mao, nan ingong usa ka payunir ikaw usab nagapaambit niining hinungdanon kaayong kalihokan sa pagbansay.

³⁰ Ang tanan diha sa kongregasyon kinahanglang makaamgo gayod niining hinungdanong buluhaton sa pagbansay sa mga batan-on. Mahimo ba nimo ang tinong mga kahikayan sa pagduyog kanila sa pagsangyaw? Maensayo ba nimo ang usa ka presentasyon uban kanila sa pagpangandam sa ganghaan-sa-ganghaan nga buluhaton? Alisto ka ba sa mga kahigayonan sa pagdasig sa umaabot espirituwal nga mga kalihokan sa dihang duyog nga nagabuhat sa ministeryo? Ang kada magmamantala kinahanglang makaamgo nga bisan ang usa ka gamayng komento makapahimog positibong mga hunahuna sa tibuok-kinabuhing espirituwal nga mga tumong, ngadto sa walay kataposang kaayohan sa batan-ong tawo.

³¹ Mga Batan-on Makatabang sa Ilang Kaugalingon: Mga batan-on, kami nagadasig sa matag usa kaninyo sa padayong pagtamod sa mga pagtulon-an ni Jehova ug isalikway ang gitanyag sa kalibotan. Padayong sulayi ang inyong kaugalingon pinaagi sa pagsusi sa inyong panggawi ug kinasulorang mga pagbati. Unsa man ang inyong tinamdan kang Jehova ug kon unsa ang iyang gidahom kaninyo sa matag adlaw nga pagkinabuhi? Kamo ba nagapakigbisog batok sa impluwensiya sa mga ideya ni Satanas? (1 Tim. 6:12) Sanglit ang mga tawo, ug ang mga batan-on ilabina, sa kinaiyanhon nagatinguha sa pag-uyon sa ilang mga katalirongan, nakaplagan ba ninyo ang inyong kaugalingon nga nadaldal sa pagsunod sa panon sa pagbuhat sa daotan? (Ex. 23:2) Si apostol Pablo nakasabot nga adunay dakong pagpit-os sa pagpahiuyon sa mga paagi sa kalibotan.​—Roma 7:21-23.

³² Nagakinahanglag kaisog sa pagsukol sa impluwensiya sa kalibotan, sa pagsubay sa usa ka kurso nga lahi sa kalibotanong mga katalirongan, ug sa pagsugot sa mga pagtulon-an sa Diyos. Ang mga tawo sa karaang mga panahon nagbuhat niana uban ang dakong kalamposan. Tagda ang kaisog ni Noe. Iyang gitunglo ang tibuok kalibotan pinaagi sa iyang pagtuo ug pinaagig padayong pagpahimulag gikan sa mga mamumuhat ug daotan sa iyang panahon. (Heb. 11:7) Himoa ang pagpakigbisog tungod kay kini takos sa pagpaningkamot. Ayawg sundoga ang mahuyang, talawan, mga mahadlokon nga misunod sa panon ni Satanas. Sa kasukwahi, pangitaa ang panag-ubanay niadtong nakakaplag ug pabor sa mga mata ni Jehova. (Filip. 3:17) Paliboti ang imong kaugalingon sa mga kaubanang magamartsa kiliran por kiliran uban kanimo ngadto sa gisaad nga bag-ong kalibotan sa Diyos. (Filip. 1:27) Hupti sa hunahuna nga may usa lamang ka dalan nga nagatultol ngadto sa kinabuhing dayon.​—Mat. 7:13, 14.

³³ Kon kita nakakaplag ug kalipay sa pagsud-ong sa mga batan-on nga nagadala ug pagdayeg ug pasidungog sa atong Diyos, pagkamakapalipay gayod kini kaniya! Dili kaduhaduhaan nga si Jehova nakakaplag ug kahimuot sa pagtan-aw sa mga batan-on nga may bug-os nga pagpakig-ambit sa pagmantala sa iyang halangdong mga katuyoan. Sila maoy “usa ka panulundon” gikan kaniya, ug buot lamang niya ang labing maayo alang kanila. (Sal. 127:3-5; 128:3-6) Sa pagpamalandong sa interes sa iyang Amahan, si Jesu-Kristo nakakaplag ug dakong kalipay sa pagpakig-uban sa gagmayng mga bata, ug siya naggahin ug panahon sa pagdasig kanila sa ilang pagsimba kang Jehova. Siya nagpasundayag ug malumong pagbati alang kanila. (Mar. 9:36, 37; 10:13-16) Ginalantaw ba nato ang atong mga batan-on sa samang paagi nga iya ni Jehova ug ni Jesu-Kristo? Ang mga batan-on ba sa atong mga kongregasyon nakaamgo kon sa unsang paagi si Jehova ug ang mga manulonda nagalantaw sa ilang pagkamaunongon ug maayong panig-ingnan? Sila angayng pagadayegon ug dasigon sa paglipay kang Jehova pinaagig pagpangab-ot sa espirituwal nga mga tumong. Mga batan-on, pangagpasa ang mga tumong nga moresulta sa mga panalangin alang kaninyo karon ug sa umaabot.