Magpugas nga Madagayaon Apan Duyog ang Pag-ila
1 Ang matag mag-uuma nahibalo nga kon siya magpugas nga madagayaon sa iyang binhi, siya lagmit magaani nga madagayaon, apan kon siya magpugas nga tagidyot, siya tinong magaani nga tagidyot. (2 Cor. 9:6) Ang mga mag-uuma mainampingon nga dili mag-usik sa binhi pinaagi sa pagpugas sa dapit nga walay posibleng motubo. Ang susamang pag-ila gikinahanglan sa dihang atong itanyag ang atong literatura diha sa kanataran. Ang atong tinguha mao ang pagbilin ug literatura kanilang interesado nga mobasa niana.
2 Nakaplagan ba nimo nga ang mga magasin, mga brosyur, ug ubang mga publikasyon nagatipun-og diha sa estante sa balay sa dihang kini magamit unta sa pagtultol sa takos nga mga tawo diha sa inyong teritoryo ngadto sa kahibalo sa kamatuoran? (Itandi ang Mateo 25:25.) Ikaw ba usahay nagpanuko sa pagtanyag ug mga magasin o ubang literatura diha sa unang pagduaw tungod lamang kay imong gibating bakikaw ang pagsulti kon sa unsang paagi ang buluhatong pagsangyaw sa Gingharian gipaluyohan? Nakaplagan sa batid nga mga magmamantala nga ang mapabilhong mga tagbalay mosanong sa usa ka yano, deretsong pahayag sa dihang sultihan sila kon sa unsang paagi ang mga donasyon alang sa buluhaton sa Gingharian ginapaigo.
3 Ikaw tingali moingon:
◼ “Ikaw tingali nahibulong kon sa unsang paagi among ikatanyag ang literatura nga walay tinong kantidad. Kini maoy usa ka bahin sa tibuok-kalibotang edukasyonal nga buluhaton nga gipaluyohan pinaagi sa boluntaryong mga amot. Kon buot mong mohatag ug gamayng donasyon alang sa buluhaton, malipay gayod ako sa pagdawat niana.”
4 Daghang tagbalay mangutana kon pilay bayad sa literatura.
Ikaw makatubag:
◼ “Walay tinong kantidad alang sa literatura tungod kay ang among buluhaton gipaluyohan pinaagig boluntaryong mga donasyon. Kon buot mong mohatag ug gamayng donasyon karon, malipay kami sa pagtino nga kini gamiton diha sa tibuok-kalibotang buluhaton sa pagsangyaw.”
5 Sa buluhatong pagmagasin ginapakita sa pipila ka magmamantala ang panid sa sulod sa magasin ug moingon:
◼ “Sumala sa imong makita dinhi, ang among buluhaton gipaluyohan pinaagi sa boluntaryong mga donasyon. Kon buot nimong mohatag ug gamayng donasyon sa pagtabang niini nga buluhaton, ako ang mopaigo niana.”
6 Dili gayod kita magpanuko sa pagpugas ug binhi sa Gingharian tungod kay kita nagduhaduha sa pagsulti kon sa unsang paagi ang buluhaton gisuportahan sa panalapi. Sa samang panahon, ang pag-ila gikinahanglan aron ang atong literatura dili mausik diha sa ‘batoong yuta.’ (Mar. 4:5, 6, 16, l7) Kadtong mopabili sa maayong balita nga atong gidala malipay sa pagbaton ug kahigayonan nga moamot alang sa materyal nga pagpaluyo niana.—Itandi ang Mateo 10:42.