Pangutana

◼ Unsa man ang pamaagi nga angayng sundon sa dihang magapresentar ug mga resolusyon ngadto sa kongregasyon?

Ang usa ka resolusyon gikinahanglan sa dihang ang usa ka desisyon kinahanglang himoon bahin sa hinungdanong mga butang sama sa pagpalit ug kabtangan, pag-usab o pagtukod sa Kingdom Hall, pagpadalag espesyal nga mga amot ngadto sa Sosyedad, o pag-atiman sa mga galastohan sa magtatan-aw sa sirkito. Sagad labing maayong magpresentar ug usa ka resolusyon alang sa pag-uyon sa matag panahon nga igahin ang mga pundo sa kongregasyon.

Ang usa ka eksepsiyon hayan mahimo sa mga kaso nga nagalangkit sa mga espesyal nga mga panginahanglan maylabot sa hinungdanong mga proyekto o mga kalihokan. Pananglitan, ang kongregasyon mahimong magkauyon sa usa ka higayon sa pag-amot ug tinong kantidad ngadto sa Sosyedad alang sa tibuok kalibotang pagwaling buluhaton o sa ‘Kingdom Hall fund.’ Usab, ang kasagaran nga mga galastohan sa pagpalihok sa Kingdom Hall, sama sa koryente ug mga suplay sa pagpanghinlo, wala magkinahanglag resolusyon.

Kon adunay panginahanglan, ang lawas sa mga ansiyano kinahanglang maghisgot ug maayo sa maong butang. Kon ang kadaghanan mouyon sa pagbuhat ug usa ka butang, usa sa mga ansiyano, tingali usa ka membro sa Komite sa Pag-alagad sa Kongregasyon, angayng mag-andam ug sinulat nga resolusyon alang sa pagpresentar diha sa Tigom sa Pag-alagad.

Ang ansiyano nga magalihok ingong tsirman kinahanglang sa mubo apan tin-aw nga magasaysay sa panginahanglan ug kon unsay girekomendar sa lawas sa mga ansiyano sa pag-atiman niana. Unya ang kongregasyon hatagan sa kahigayonan sa pagsuknag may kalabotang mga pangutana. Kon ang butang maoy komplikado, hayan labing maayo nga iuswag una ang pagboto hangtod sa sunod Tigom sa Pag-alagad aron paghatag sa matag usa ug panahon sa paghunahuna bahin niana. Ang aktuwal nga pagboto himoon sa mga membro sa kongregasyon nga magapataas sa ilang mga kamot.

Ang pagboto sa resolusyon limitado ngadto sa dedikado ug bawtismadong mga membro sa kongregasyon. Maoy dili tukma alang sa mga bisita gikan sa ubang kongregasyon nga makig-ambit.

Human nga maaprobahan ang resolusyon, kinahanglan nga kana napetsahan, napirmahan, ug nabutang diha sa payl sa kongregasyon.