Pangutana

◼ Unsang pagbantay ang gikinahanglan sa dihang atong ginakobrehan ang peligrosong teritoryo?

¹ Sa pagkamalamboon, atong madungog ang mga taho sa kapintasan, mga hold-ap, sosyal nga mga kasamok, ilabina sa mga siyudad. Bisan tuod ug mobati kitag kabalaka, kita nahibalo nga bisan sa mga dapit nga samok, adunay sinserong mga tawo nga mosanong sa mensahe sa Gingharian. Busa kinahanglan kitang magmaisogon, masaligon sa panalipod ni Jehova.​—Prov. 29:25; 1 Tes. 2:2.

² Sa dihang moadto kita sa peligrosong dapit, si Jehova nagadahom kanato nga magmabinantayon ug magagamit ug maayong pagpanghukom. Magmaalisto. “Maalamon ang usa nga nakakita sa katalagman ug mopadayon sa pagtago sa iyang kaugalingon, apan ang walay-kasinatian molabay lamang ug kinahanglang mag-antos sa silot.” (Prov. 22:3) Ang eskperyensiyadong mga magmamantala nagapabili sa kaalam sa duyog nga pagbuhat nga tinagurha o bisan sa ginuropo sa ubay-ubayng mga magmamantala, kon gikinahanglan. (Eccl. 4:9, 12) Ang mga kriminal sagad nagapangita niadtong nagainusara ug busa mas sayon nga biktimahon.

³ Magmabinantayon sa pagdawat ug pagdapit sa pagsulod sa usa ka balay o apartment. Ayawg pakiglalis niadtong maorag nagapanghulga o nagapanghagit. Magmaalisto sa pagpaila sa imong kaugalingon ingong usa sa mga Saksi ni Jehova. Ang pipila ka magmamantala kanunayng nagakupot ug Bibliya o usa ka Bantayanang Torre o Pagmata! ingong timailhan.

⁴ Bantayi ang mga tawong nagabarog-barog sa maong lugar. Ayawg sul-ob ug mahalong mga alahas. Kon kinahanglang mogula ka nga gabii na, likaying magalakaw sa ngitngit nga mga kalye diin diyutay ra ang mga tawo. Kon ikaw biktima sa pagpanghold-ap, ayawg sukol kon ang kuwarta lang nimo o mga kabtangan ang ilang gusto; ang imong kinabuhi bililhon pa kay sa bisan unsang butang nga imong gibatonan.​—Mar. 8:36.

⁵ Ang mga igsoong lalaki nga nagapanguna kinahanglang alisto, nga kanunayng nagasusi sa mga magmamantala diha sa teritoryo. Maoy labing maayo ang paghupot sa grupo nga tingob sa usa ka lugar aron nga ang uban kanunayng anaa sa duol. Kon ang bisan unsang matang sa kasamok mahitabo diha sa duol, ang grupo kinahanglang mobiya dayon sa teritoryo.

⁶ Kon kita alisto ug mabinantayon, kita makapadayon sa pag-abot bisan kanilang anaa sa peligrosong mga dapit kinsa “nagapanghupaw ug nagaagulo sa tanang dulumtanang butang nga ginabuhat.”​—Ezek. 9:4.