Pagtanyag sa Maayong Balita—Pinaagig Maisogong Pagpamatuod sa Teritoryong Negosyohanan
1 Ang kaisog gikinahanglan sa pagtanyag sa maayong balita. Ilabinang tinuod kini sa teritoryong negosyohanan. Ang pipila ka magmamantala maduhaduhaon sa pagsangyaw sa ‘business territory.’ Pero tungod kini tingali sa kakulang sa kasinatian. O hayan adunay panginahanglan sa ‘pagbaton ug kaisog.’—1 Tes. 2:2.
2 Mitaho ang usa ka magtatan-aw sa sirkito nga sa siyam ka buntag sa pagsangyaw sa teritoryong negosyohanan, ang total nga 177 ka libro ang napahimutang. Dugang pa unta ang mapahiluna, pero nahurot na ang suplay. Ikaw usab makahimog kalamposan kon manlimbasog ka sa pakig-ambit sa pagsangyaw sa ‘business territory.’
HUPTI ANG POSITIBONG TINAMDAN
3 Ang pagkamalamposon nagadepende sa atong tinamdan. Basin bation sa pipila ka magmamantala nga ang pagpamatuod ngadto sa mga tindero-tindera malisod. Miingon ang usa ka magmamantala: “Gidahom ko nga negatibo ang sanong. Apan, sa akong kahibulong, ang reaksiyon sa mensahe sa Gingharian maoy sa kaatbang. Sila gayod buotan ug mahigalaon ug andam sa pagdawat sa mga magasin.” Oo, kadtong nagasangyaw sa teritoryong negosyohanan makakaplag nga kana maoy mabungahong buluhaton nga magpatunghag mga panalangin.
4 Ang mga ansiyano, ilabina ang magtatan-aw sa pag-alagad, kinahanglang manguna. Hayan makaayo sa pag-andam ug espesyal nga mga mapa sa teritoryo nga maylabot lang sa ‘business areas.’ Sa ubang dapit, ang mga lugar negosyohanan masangyawan man uban sa residensiyal nga teritoryo. Paneguroang dili masayloan ang mga ‘shops,’ mga opisina, mga pabrika, ug uban pa. Basin makita sa mga ansiyano nga maoy angay sa pagpili sa takos nga mga magmamantala sa pagsangyaw sa dasok teritoryong negosyohanan.
5 Kadtong makig-ambit niining buluhatona kinahanglang mahapsay ang panapot ug manlimbasog nga mub-on ug diretso sa punto sa makontak ang mga negosyante. Ang mga presentasyon nga dili mokapin sa usa ka minuto o mas pa maoy labing angay. Ang pagpili sa mga adlaw ug mga panahon nga dili kaayo puliki maoy importante sa pagbaton ug mas maayong mga resulta. Nakaplagan sa pipila nga sayo sa Sabado sa buntag maoy tukma, apan ang uban nagaduaw sayo sa ubang mga adlaw diin ang mga tindahan dili kaayo puliki.
KON UNSAY ATONG IKASULTI
6 Sa dihang mosangyaw sa teritoryong negosyohanan, atong ikatanyag ang mga magasin, ang karong tanyag, o ‘tracts.’ Sa itanyag ang mga magasin kita makaingon: “Tungod kay sagad malisod nga ikahibalag ang mga negosyante nga maana sa balay, kami nagapanlimbasog sa pagkontak kanimo karon. Sa kinaulahiang gula sa The Watchtower, adunay artikulo nga nag-ulohang [ipakitang ulohan] nga nasudlan sa impormasyon nga sa personal nagaapektar kanimo. Gibati namong malipay ka sa pagbasa niining artikuloha maingon man sa uban pa. Among gitanyag ang The Watchtower uban sa Awake! sa amot nga ₱5.00 lamang.”
7 Niining bulana atong itanyag ang mga suskrisyon sa Pagmata!, ug daghang negosyante makakaplag niana nga mapuslanon ug matulon-anon sa pagsuskriber. Ikaw makaingon: “Ingong negosyante gikinahanglan mo nga padayong masayod sa kinabag-ohang mga hitabo sa tibuok-kalibotan, ug ang Awake! makatabang kanimo sa pagbuhat niana. Pananglitan, sa Oktubre 8 nga gula, matikdi kon unsa ang giingon bahin sa sangpotanan sa gubat. Nagapakita kini nga ang Diyos lamang ang makasulbad sa suliran sa kalinaw ug kasegurohan ug kana moabot sa dili madugay. Sa kada bulan duha ka gula sa Awake! ang patikon uban sa pagkadaiya sa mga artikulo ug imong masuskriber kini sa usa ka tuig sa ₱60.00 lang.”
8 Anaa ing panginahanglan gayod sa pagkabug-os sa atong pagpamatuod aron maluwas ang mga kinabuhi. (Buh. 20:24) Tungod kay sagad man malisod nga maabtan sa balay ang mga negosyante, kita kinahanglang makigsulti kanila sa ilang dapit sa trabaho. Bisan tuod kining buluhatona mahagiton, kita magmalamposon man kon atong ‘batonan ang kaisog sa pagsulti sa maayong balita nga iya sa Diyos.’